港隊賽後評 世界盃外圍賽 香港 2-4 伊朗 (6-6-2024)
港隊賽後評
世界盃外圍賽 香港 2-4 伊朗 (6-6-2024)
1. 安達臣離隊之後港隊第一戰，表現可謂非常驚喜！
2. 賽前決選名單入面，好多恒常入選既球員好似艾華頓、黃威等都因不同原因落選，反而有一班後生仔首次入選，而最後兩位既港隊新丁效力東方既馬希偉和保頓U18既杜俊暉更加為球迷帶黎驚喜，兩位響地標戰對住亞洲勁旅都取得入球，認真威風！
3. 講返場波，港隊暫代主教練盧斯爾排出一個令人有少少意外既陣容，季尾響東方表現出色既鐘樂安同埋馬希偉呢兩個球員上演佢哋既港隊A級國際賽地標戰，而祖連奴、葉鴻輝、艾里奧呢啲有經驗既球員同埋一班中生代好似陳俊樂、胡晉銘、茹子楠呢啲都悉數上陣，個陣容可以話老中青三代都有。
4. 事實上場波港隊既表現真係非常之唔錯，老中青三代溝出黎既化學作用係幾好，例如艾里奧既經驗響後場殺咗、包咗唔少波，而中前場一班後生仔就用力咁逼搶，總之成個表現，係睇得出香港隊係有鬥心、有鬥志既。
5. 不過第一球失波有啲戇鳩，鐘樂安點會咁樣遞高隻手mark人架，呢啲情況之下，一定係十二碼，冇情講。講起Leon，其實第四球都係輸佢，響禁區入面將個波頂咗落地下彈咗比對手，再比對手轉身、推埋起腳。不過除咗呢兩球，其實佢表現都算係咁，第一球要屌，但第四球，真係可以話係個人能力唔夠對手黎，但對手畢竟係伊朗，我覺得情有可原。呢啲高水準既比賽，對於Leon黎講，都會係好寶貴既經驗。
6. 戰局當然係伊朗佔優，但港隊都唔係冇攻勢，啲反擊算做得唔錯，而胡晉銘既手榴彈，都為伊朗既禁區帶黎混亂。要讚既係落後一球之後，佢哋冇放棄過，好快由馬希偉入攝成功接應陳俊樂既傳中射成一比一平手。馬希偉入攝故然係靚，但樂仔逼甩對手，再傳個靚既中腰波，我覺得功勞更大。
7. 港隊輸既第二球又係十二碼。老實嘞，呢球有得相榷，因為睇慢鏡都幾明顯葉鴻輝係將個波撲橫咗先，之後係同對手有啲接觸，但點都唔算撲跌佢吖，不過球證要吹都冇辦法，結果伊朗半場憑住兩球十二碼，以二比一領先返更衣室。
8. 下半場港隊冇放棄進攻，但都係咁而比人打咗一次長傳，後上接應地波回後既達利美射個靚波，伊朗終於唔駛靠十二碼入波。
9. 唔知係咪盧sir既安排，另一位新丁杜俊暉呢個時候入替馬希偉，無獨有偶佢都響地標戰入波，佢響角球混戰入面射咗個靚波，為港隊追返二比三。
10. 失第四球上面講過，唔再重覆。今日想讚下陳晉一同埋陳俊樂，佢兩個季尾響傑志其實表現唔係幾好，但今場兩位都有超水準演出，對住伊朗球員一啲都冇落下風。當然其他人表現都唔差喇，好似茹子，真係香港第一右閘，總之成隊都踢得好好！
11. 講技術層面、戰術甚至體能，應該冇球迷會預計香港可以贏到伊朗，但係球迷係明白兩隊之間實力有好大既距離，我哋要既其實好簡單，有鬥心、搏盡、唔好揸流灘，今場球迷收到晒。係，戰果係輸，但係足球就係咁，身為香港人，唔通輸波就唔撐港隊咩？更何況今場港隊踢咗場好波？
12. 之後6月11號，港隊會作客去到土庫曼，係小組入面實力第三既球隊，雖然難啲，但都希望港隊有機會搶到分喇。
#不專業足球筆記 #足球專欄 #專欄 #我愛本地波 #世界盃外圍賽
#香港 #香港隊 #伊朗 #wearehongkong #足球 #賽後評
#香港隊勁揪 #香港加油 #馬希偉 #杜俊暉
更多專欄內容︰ https://www.leafopenleafopen.com/unprofessional9up
廣告時間 -
ig: leafopen3
instagram.com/leafopen3
fb: leafopenleafopen
facebook.com/leafopenleafopen
方格子︰ https://vocus.cc/salon/leafopenleafopen
如果有興趣睇下我既其他寫作作品，可以上 leafopenleafopen.com 或者 https://www.penana.com/user/52938/%E8%91%89%E9%96%8B%E8%91%89%E9%96%8B
如果覺得我寫嘢OK想請我飲杯咖啡支持下我既，可以上 https://www.penana.com/membership_plan?id=52938 或者 https://m.penana.com/stream?id=52938
