港隊賽後評
1. 五日內兩對烏茲別克，上次主場響實力有住巨大既差距之下輸咗兩球，表現其實唔算太差，我講「優勝劣敗」係指實力，面對住世界排名高成88位既對手，陣內又有意甲、法甲、土超球員，輸兩球算有交待。
2. 作客既情況可以預期更加惡劣，都係輸少當贏，希望入到波，踢出好表現，咁我就收貨。大家對港隊既期望可能都唔同，我係現實少少，如果今場港真係有分落袋，我非常非常意外兼會好開心，但輸波其實先係正常。都係果句頭盔廢話，如果我哋有唔同意見，一切以你哋自己為準。
3. 因應住上場比賽之後既傷兵情況，安達臣補選咗林樂勤入隊，而正選陣容方面都有唔少調整，李毅凱、潘沛軒代替因傷退隊既艾里奧同艾華頓，而米高就取代上場發揮欠佳既安永佳任正選箭頭。
4. 潘沛同米高上場後備上陣表現唔錯，今場我覺得兩個都有唔錯既表現，尤其是米高，以一個柱躉中鋒黎講，佢做支點停波都算幾稱職，你冇得要求佢球球都痴落地再一扭七，但佢都起碼停波停咗唔少次數再分比隊友，呢點比起上次波既安永佳係做得好既。而潘沛既技術一定唔夠艾華頓好架嘞，但佢勝在肯跑肯走位，今場上上落落都見到佢既身影。至於三叉戟左面既祖連奴，今場係勤力咗都現多咗位，但反而係冇前兩者咁搶鏡。
5. 一開波其實香港隊踢得唔錯，失第一球之前踢得一啲都唔被動，仲有幾次機會響烏豬門口製造到混亂，但係個波真係次次都好似波子機咁彈返去人哋度解圍。其實我覺得唔止係好彩，而係人哋起動得比港隊既球員早，先可以早到半秒截到個波。
6. 但係20分鐘左右，陳俊樂一陣中場失誤，控波控得太耐，被三個烏豬球員圍住偷到個波，雖然李毅凱第一下剷走到個波，但second ball依然落在烏豬腳下，最後個交到去右路傳個靚波出黎，比人哋既前鋒攝得好靚，伸腳射入。呢球阿凱第一下剷得靚，但係佢見到second ball落咗響烏豬腳下既時候，佢就選擇搏一鋪再向前剷多次，而唔係企起身返後，咁樣都無可厚非，因為佢就算返後都應該唔夠個波快，只能夠講今次真係搏輸咗。
7. 講起黎，今日港隊三個正選既中場中都唔係踢得好，樂仔今日啲決定有啲慢；陳肇鈞隱形，完半場前一次後場被偷波爭啲輸多球；而胡晉銘今日步頭好似好重，啲落腳唔準，幾下好輕易就比人過。
8. 失咗第一球波之後，港隊就完全失勢，變返好似上場響旺角場對烏茲別克既時候咁，完全被對手壓制，以我記憶所及，雖然幾次響對方禁區製造到混亂，但上半場好似一次似樣既射門都冇。
9. 下半場形勢基本上冇乜點變，葉鴻輝都有打醒十二分精神，下半場都救出咗幾個險波，果幾個失波老實講我覺得都冇計，有人屌佢第一球企響度冇反應，其實我自己覺得還可以，因為對面前鋒射既角度係幾刁鑽又近，就算有反應都救唔到喇。
10. 安達臣並唔想坐以待斃，佢用安永佳入替今日表現都幾差既少爺仔，然後似乎將米高拉落一格，但呢一個決定都間接令到港隊失第二球，當時米高響前場比人搶咗個波，然後對方策動反擊，佢雖然都有回防，但出腳都係趕唔切，而樂仔呢球又收得太入，孫銘謙又被對手擺脫，結果對方淡定射咗個好靚既遠射入網。呢下米高雖然係禍端，但坦白講我覺得當時港隊應該係夠防守球員，但竟然都比對手射得咁輕易，真係有少少失望。
11. 失第三球又係唔知點解對方一嘢就劏穿條防線上面既三個球員，網上有人話似乎係阿凱包咗越位，但我睇唔清楚，最後比對手單刀射成三比零。
12. 其實縱觀全場比賽，對手今場既表現，係冇上場作客香港時黎得咁凌厲，而港隊都有唔少控球機會，但真正製造到有威脅既埋門機會，我只係記得下半場米高有一球角球混亂下近射中龍門。
13. 上場我會覺得港隊對住呢隊高自己88位既對手踢得唔算太差，但今場我覺得有唔少球員比起上場踢出黎更加跌watt，最明顯就係中場三子，佢哋好似跟唔上比賽節奏咁。甚至外流果幾個球員，我覺得都係周緣德比較出色，而真係話係呢場波既MVP，唔係佢就係阿輝，兩個夾埋破壞咗烏茲別克唔少攻勢。
14. 我當然明白雙方實力上面既差距，都希望港隊可以踢場好波出黎，只係今場係好可惜，亦都冇好似亞洲盃果陣打咗雞血咁打出咁強既拼勁，但都明白雙方之間既差距，所以我都接受呢個係正常賽果，只係覺得其實三個失波，我哋其實都可以做得再好少少。至於進攻，真係盡晒力架喇，技術同意識既差距，唔係就咁一朝一夕之間可以彌補到。
15. 講到尾，除咗希望多啲球員可以外流兼有上陣機會之外(唔係去working holiday)，其實加強港超聯既強度都非常重要。呢樣嘢你知我知係人都知，但響而家香港既經濟既情況，真係有人拎舊錢出黎搞波保住個職業聯賽同啲球員飯碗已經好好，仲點可以要求咁多呢？
#不專業足球筆記 #足球專欄 #專欄 #我愛本地波 #世界盃外圍賽
#香港 #香港隊 #烏茲別克 #wearehongkong #足球 #賽後評
#香港隊勁揪 #香港加油
更多專欄內容︰ https://www.leafopenleafopen.com/unprofessional9up
廣告時間 -
ig: leafopen3
instagram.com/leafopen3
fb: leafopenleafopen
facebook.com/leafopenleafopen
方格子︰ https://vocus.cc/salon/leafopenleafopen
如果有興趣睇下我既其他寫作作品，可以上 leafopenleafopen.com 或者 https://www.penana.com/user/52938/%E8%91%89%E9%96%8B%E8%91%89%E9%96%8B
如果覺得我寫嘢OK想請我飲杯咖啡支持下我既，可以上 https://www.penana.com/membership_plan?id=52938 或者 https://m.penana.com/stream?id=52938
