不專業足球筆記（九）

不專業足球筆記（九）

1. 執筆既時候，賀歲盃先踢完冇幾耐，不過到呢篇文上架既時候，我估應該都已經過咗一個星期。呢次比賽真係純粹娛樂性質，啲防守都好性感下，所以最後比數七比三由世界明星隊贏出比賽，香港明星隊又有波入，都算係皆大歡喜。

2. 老實講，如果我真係仲響香港既話，我諗我真係會睇呢場賀歲盃多啲，我既童年回憶歐偉倫、李健和左倫右李組合，南華雙陳陳肇麒、陳偉豪，仲有我最欣賞既守門員豬仔范俊業，大戰一堆前世界級球星，如果有馬特拉斯再施展絕世頭鎚神功，又或者和叔搞笑咁省下球證、倫哥單刀橫傳，咁就真係正到痺。

3. 講完啲輕鬆嘢，又講下香港既其他足球消息。FIFA公佈咗最新既世界排名，香港贏中國果場友誼賽雖然最後確認為A級賽事有計算在內，但可惜響亞洲盃決賽周分組賽三場都輸晒，而有網友提醒FIFA既計分方法係唔計得失球，只計勝負和同埋對手既世界排名，所以就算港隊響決賽周賽事贏得口碑都好，最新既世界排名香港跌咗4位，仲要比也門同台灣超過咗。

4. 其實呢個計分方法都幾柒，入咗大賽既決賽周係咪應該有啲啲分加先呢？反而乜都唔做、冇資格參賽既球隊因為冇分落袋而上升，但有大賽踢既球隊反而會失分而回，都幾唔合理。不過算，我都係鳩UP下，如果佢一貫既計法係咁，又點會變吖。唯有希望之後港隊既國際賽可以踢出好成績喇。

5. 跟住仲有港隊教練安達臣既新聞，佢接受南華早報訪問既時候，首先就屌足總董事局班友，香港事隔56年再打入亞洲盃決賽周，竟然冇一個高層會飛去現場睇同比鼓勵。佢話見到人哋其他國家隊有成十幾個board members去支持，相比之下佢真係唔係幾高興。仲有，足總比既資源非常唔夠，啲教職員（如助理教練、守門員教練）好多都係part time，佢有同足總投訴過，但足總直接同佢講冇錢。

6. 然後，安達臣都承認，手頭上有啲佢幾有興趣既offer，佢雖然好鍾意香港球迷既狂熱支持，對佢哋印象非常深刻，但係佢都要為自己打算下。

7. 其實，雖然巨sir冇明言，但係言下之意都幾清楚，加上夠膽開口屌足總班垃圾高層，我覺得佢走既機會都好大。佢係一個好稱職既教練，敢起用新人，連梯隊都有幫手管理，甚至話幫手設計隊服，如果最後留唔住佢既，絕對係香港足球一個重大既損失。

8. 算喇，我哋都係唔好咁悲觀住，睇返啲好消息，就係理文既巴西中堅杜度同埋外借緊比東方(但仍然養緊傷)既洛迪古斯同樣拎到特區護照，雖然後者仲未知幾時可以正式復出，但杜度既入籍可以為港隊既防守球員帶黎多一啲既選擇。不過…較為可惜既係，兩者都已經33歲…呢個都係香港入籍兵既特色，因為要居港7年先可以拎到passport，再加上入境處做嘢都真係講唔上係快，所以到佢哋真係可以代表香港既時候，其實都開始進入球員生涯尾聲…

9. 如果可以響亞洲盃之前搞掂杜度就好喇…咁唔會搞到香港隊無中堅可用…搶人材搶人材，足球人材都係人材啊大佬。

10. 另一單香港球會既消息，理文上月正式落成咗一個室內訓練中心，入面有按摩床、球隊辦公室、會議室、一幅小型人造草地、健身室及冷暖水池等設施等等。雖然理文係冇自己既球場，但其實有個咁既訓練中心已經好好，皮費唔平架(香港01話成一千萬港紙)，我都唔見冇消息話有邊度贊助，亦都證明咗，李文恩真係好有心搞波。

11. 又睇返小小轉會消息，PSG前鋒麥巴比麥總終於都決定要走人唔會續約，其實兩年前如果唔係法國總統馬克龍出面，我懷疑果陣佢都已經過咗皇馬。不過今次忍者龜應該真係心意已決，就算馬克龍再出口應該都唔會有咩幫助。至於目的地？其實唔駛問喇，佢既國家隊隊友干拿迪都話，其實個個都知佢會去邊架喇。

12. 歐洲四大聯賽，響我執筆時呢一刻，除咗英超仲係利物浦、曼城、阿仙奴三頭車馬、叮噹馬頭之外，意甲既國際米蘭、德甲既利華古遜同埋西甲既皇家馬德里，都已經分別領先第二位既球隊9分(仲要打少一場)、8分同6分，我覺得呢三隊除非表現突然間好失準，如果唔係應該都十拿九穩架喇。

13. 講起德甲，上個星期先講球季過咗差唔多三份二落後5分都仲有得追，點知轉過頭輸埋比波琴，睇黎除非響歐聯都有所作為，如果唔係哈利簡尼今季都應該係繼續冇冠…

14. 果日臨瞓之前屎忽痕走咗去睇AC米蘭作客蒙沙既最後五份鐘，真係非常精彩，少打一人既AC米蘭88分鐘追成2比2，點知轉過頭就比蒙沙入返粒，之後空群而出，再入多粒，其中由AC米蘭外借緊比蒙沙既傳奇之子孫小馬甸尼響三比二果個入波仲要獻上一個助攻，真係唔知佢果陣係咩心情。但職業球員就係咁架喇。

15. 最後講下曼聯既消息喇，尋日(2月20日)曼聯終於官方宣佈Sir Jim Ratcliffe拉傑夫既收購完成。老實講，我真係好唔想格狗仲留響曼聯，不過而家都叫好開始，起碼真係見到拉傑夫係有心改革，真係周圍去搶人才，又真係同市政府去傾新球場啲嘢。作為曼迷，呢十年都慣咗冇乜期望就冇失望架喇，唯有希望一切順利喇吓。

16. 不過佢哋對盧頓果場就真係要㩒平安鐘，明明早早領先咗兩球，但又係好快失返一球，之後有三、四次單刀或者同龍門單對單既機會都把握唔到，搞到補時既角球人哋頂中楣頂住先驚險拎三分。

17. 下次繼續傾。

#不專業足球筆記

#香港隊 #安達臣 #足總 #垃圾足總

#杜度 #理文 #洛迪古斯 #東方 #拜仁慕尼黑 #利華古遜

#利物浦 #曼城 #阿仙奴 #國際米蘭 #皇家馬德里 #AC米蘭 #蒙沙

#SirJimRatcliffe #LUTMUN #曼聯 #盧頓

廣告時間 -

ig: leafopen3

instagram.com/leafopen3

fb: leafopenleafopen

facebook.com/leafopenleafopen

方格子︰ https://vocus.cc/salon/leafopenleafopen

如果有興趣睇下我既其他寫作作品，可以上 leafopenleafopen.com 或者 https://www.penana.com/user/52938/%E8%91%89%E9%96%8B%E8%91%89%E9%96%8B

如果覺得我寫嘢OK想請我飲杯咖啡支持下我既，可以上 https://www.penana.com/membership_plan?id=52938 或者 https://m.penana.com/stream?id=52938