不專業足球筆記（十六）︰傑志吞敗仗理文險勝擁爭冠主動權 U23下季散班唔玩？

不專業足球筆記（十六）︰傑志吞敗仗理文險勝擁爭冠主動權 U23下季散班唔玩？

1. 響港超最後一輪既天王山之戰前，理文最難應付既果場比賽，相信大家都覺得會係作客香港仔對冠忠南區既呢場比賽架喇，今次佢哋作客險勝一比零全取三分，相信對佢哋黎講叫做掃清咗爭標路上既一大障礙。

2. 要追趕理文既傑志，星期三晚作客東方不容有失，不過佢哋雖然一度追成平手，最終仍然以一比二不敵主場既東方，余在言Jesse貢獻兩球助攻成為賽事MVP。傑志本身已經落後緊三分，而家輸咗比東方之後個分差雖然冇變，但係就踢多一場。

3. 相比起對傑志之後果仲要對埋冠忠南區，理文剩低既果兩場係對均業北區同埋深水埗，相對黎講係易踢啲既。

4. 不過均業北區今季都偶有佳作，而深水埗實力雖然本來係屬於四大養份球隊之一，但半季之後換咗陳浩然做教練同埋季中增援之後最近既表現有所回升，上輪更加響南區既地獄主場爆咗個超級大冷門以二比零贏咗南區呢支實力份子，如果真係仲當佢係季初果支養份球隊輕視佢哋，真係話唔定會出事。

5. 講咁多，無非都係諗起理文式既悲劇近季時有發生啫…我有朋友講過，理文同自爆已經差唔多係同義詞咁滯。

6. 當然客觀啲講既話，理文既實力始終係響呢兩隊之上，雖然我都係覺得佢哋好有自己踢自己波既feel，但係發揮正常既話，應該係可以贏出呢兩場波去迎接天王山之戰既。難聽啲講，如果呢兩場波都贏唔到既話，理文都冇資格去拎呢個港超冠軍。

7. 不過如果理文兩場都贏晒，咁就響天王山之戰前已經封王，咁仲叫唔叫天王山之戰好啊？

8. 至於理文最主要既競爭對手傑志，要衛冕冠軍都好難喇，就算理文自爆，都仲有隊大埔響後面虎視眈眈，機會唔係冇，但應該好細。

9. 要我講既話，其實東方啲波好睇喎，響盧比度叔叔既調教下，一眾小將配合經驗老到既前輩級球員同埋實而不華既外援，造就到一場港超版本既青春風暴，雖然下季啲後生仔會唔會比人拆骨就好難講，但係連續兩季重用年青球員既東方有咁既成績真係難得！

10. 上星期傑志好威大炒香港U23六球，呢個賽果唔驚奇，我想講既係賽後香港U23教練司徒文俊既訪問。

11. 香港波既特色，就係每去到球季尾，都會有球隊傳出消息話散班唔玩，上季有大埔，今季暫時就有晉峰同埋香港U23唔知下季仲玩唔玩。

12. 就響慘吞傑志六隻光蛋之前，就已經傳出話香港U23會散班既傳言。賽後司徒sir就話球隊來季既前景「唔樂觀」，不過又唔係死梗︰「暫時未有最後的決定，他們（高層）還在考慮，當然坊間有很多對我們球隊有很多不同的想法和意見。」

13. 香港U23值唔值得繼續存在，響球迷之間都各有爭論，支持既梗係話香港U23比咗好多機會本地既年青球員，反對既就話呢啲球員係其他球會既棄將，而且場場都比人大炒實在唔見得呢班後生仔有乜進步。

14. 我想香港U23繼續留既，畢竟佢真係提供咗一個好好既平台比一班失意、無班落既U23球員一個落班既機會，話就話以失意後生仔為主，但當中話唔定有滄海遺珠，只係我覺得除咗加三個超齡球員之外，仲可以加多幾個外援，咁樣至少出到黎都係輸都好，都唔會比人場場大炒咁肉酸吖嘛，真係場場都練防守咩。

15. 不過得我講係冇用既，就睇下班球會高層點睇喇。

16. 啱啱仲有講過，除咗香港U23之外，晉峰下季係點都係疑問。

17. 對上幾個星期，晉峰不斷刷新連續輸波既紀錄，不知不覺間已經取代咗香港U23排榜尾，而總教練何信賢響接受傳媒訪問既時候，都唔止一次迴避呢個問題，淨係答話淨返360、270分鐘要踢，希望球隊盡力踢埋佢乜乜乜咁。

18. 晉峰今季真係好可惜既，上季季尾搵樂天女孩黎係球壇一時佳話，但今季埋班遲，令到一眾主力比北區掘走咗先，新搵返黎既外援又帶唔起隊後生仔，炒埋哈sir之後好似踢得仲差咗，最後搞到而家咁既田地…

19. 而家佢哋落後緊尾二既香港U23一分，但黎緊三場，晉峰仲要對大埔同南區兩隊實力分子，唯一有力搶分既只係得返深水埗，但深水埗換帥後再黎下半季增兵，已經勁咗唔少，佢哋有冇機會贏到深水埗都係未知之數，姑物論最後佢哋係咪包尾，都希望下季仲見到佢哋。

更多專欄內容︰ https://www.leafopenleafopen.com/unprofessional9up

更多小說內容︰ https://www.penana.com/user/52938/%E8%91%89%E9%96%8B%E8%91%89%E9%96%8B/portfolio

#不專業足球筆記 #專欄 #足球專欄 #足球

#大埔 #傑志 #理文 #南區 #東方 #晉峰 #天王山之戰

#深水埗 #香港U23 #港超聯 #司徒文俊 #余在言 #冠忠南區

廣告時間 -

ig: leafopen3

instagram.com/leafopen3

fb: leafopenleafopen

facebook.com/leafopenleafopen

方格子︰ https://vocus.cc/salon/leafopenleafopen

如果有興趣睇下我既其他寫作作品，可以上 leafopenleafopen.com 或者 https://www.penana.com/user/52938/%E8%91%89%E9%96%8B%E8%91%89%E9%96%8B

如果覺得我寫嘢OK想請我飲杯咖啡支持下我既，可以上 https://www.penana.com/membership_plan?id=52938 或者 https://m.penana.com/stream?id=52938