英國生活 - 洗牙記
英國生活 - 洗牙記
1. 黎咗英國都一段時間，我諗諗下不妨記低一啲生活上面既事黎同大家分享下。不過又係帶定頭盔先，英國咁大，每個地方既風氣、治安、社區既和睦程度都有所不同，加上每個人既性格、過到黎英國既感受都係唔同，我啲分享，你哋睇下、參考下係OK既，但係英國呢個地方合唔合適你，你要唔要移民，你哋自己考慮清楚先好落決定。
2. 因為啱啱洗完牙既關係，所以呢個新專欄既第一篇文不妨就講講我響呢度洗牙既經歷，反正我都係得閒先會寫下，唔需要由我搬黎Manchester既第一日開始慢慢講。
3. 移民咗過黎英國既朋友應該都知，要響英國註冊NHS既Dentist並唔容易，尤其是COVID疫情期間，佢哋好似係停止咗接受新症，到而家疫情過咗兩年之後先至好返少少。
4. 至於點樣註冊唔好問我haha，因為我有個好老婆，係佢幫我哋一家大細搞註冊既，不過我知道既係佢其實都搵得幾辛苦，果陣又電話留言同埋留Email等啲牙醫診所回覆。
5. 最後我哋一家係先後響兩間唔同既牙醫診所註冊咗既。先前第一次check牙果間就比較遠(雖然揸車都係二十分鐘左右就到)，不過因為唔想太耐都未check到牙所以佢有位既時候我哋將就住註冊咗先。
6. 第一間既牙醫診所其實入面啲人幾nice既，但係個牙醫都算check得有啲求其，可能係我哋差唔多收工時間先過去，佢又想早啲有得走，所以快快脆脆咁應付咗我哋一家四口就算喇啩。
7. 我哋當下其實都有啲不以為意，係返到屋企既時候，老婆突然話睇返我哋比個錢既check list，係應該包埋X光照牙既，但係我哋就冇做到呢part，當時牙醫連提都冇提過，我哋send email去問返，佢最後先覆返我哋，話個牙醫當時睇完我哋啲牙，覺得我哋棚牙幾靚，唔照X光都得喎，如果想照都唔緊要，我哋可以約個時間再照過，唔收錢。
8. 其實唔係收唔收錢既問題(事實上我已經比咗錢)，如果真係好似佢Email咁講，牙醫當下係咪應該就同我哋講清楚呢？然後先建議我哋唔照X光，再由我哋決定吖嘛，我覺得擺明係趕收工啫。不過佢真係咁坦白回覆果下好嘢…
9. 好彩疫情之後，牙醫新症既waiting list係加快咗速度清理既，所以唔駛等多一年再去果間牙醫診所，我哋就已經排到去另一間近少少，距離屋企步行都係十五分鐘既牙科診所。行十五分鐘！呢個距離響英國黎講真係極近！
10. 其實可能咁啱好彩架咋，響第二間牙醫診所先後遇過兩個牙醫，一個檢查、另一個補牙洗牙，兩個既態度都好唔錯，幫我哋一家檢查都好細心，而今次仲真係照埋X光片添，結果我哋一家大細都冇乜大問題，除咗我。
11. 我大概幾年前響香港食飯既時候，咬中舊鐵崩咗其中一隻臼齒既中間，響香港補過，但係應該補得唔係幾好，補牙舊嘢一路以黎都形住會甩會甩咁，最後黎到英國之後真係甩咗，不過今次補牙呢個用料同態度都好唔錯，至於手勢…唔知係咪英國人慣咗比人粗暴對待，雖然打咗麻醉針，但其實都有啲痛，不過補完之後，同響香港補果次感覺係唔同，上次個感覺係塞咗舊嘢入去，今次係好似搵咗啲嘢填滿咗個牙窿，到目前為止都暫時唔覺得會有跌落黎既跡象。
12. 另外可以講埋洗牙，都係第二間診所，同一個牙醫去洗，態度都係好好，不過手勢都係果句「唔知係咪英國人慣咗比人粗暴對待」，我諗都真係我呢世人入面洗過最痛既洗牙…雖然未至於痛到忍唔到，但呢啲痛楚真係希望可免則免…佢同我洗完牙之後，我係成口都係血…
13. 可能響出發黎英國之前因為疫情冇得洗牙既關係，dup到今年先洗啲牙比較污糟，所以個牙醫先至起勢係咁出力洗洗洗洗洗，希望下次洗牙果陣可以輕力少少…
14. 不過又咁講，就結果而言，其實真係洗得幾乾淨下(咁大力咁痛，唔乾淨有鬼)，甚至我覺得比起香港幫襯開果個牙醫洗得更加好，清潔得更乾淨。
15. 最後都係帶多次頭盔，我覺得遇到個牙醫好唔好都真係撞彩，我都係去到第二間牙醫診所先遇到個好啲，你哋如果真係排隊之前其實可以去google上面睇下佢哋既review同評分，呢度都幾多人會評分。
更多專欄內容︰ https://www.leafopenleafopen.com/unprofessional9up
更多小說內容︰ https://www.penana.com/user/52938/%E8%91%89%E9%96%8B%E8%91%89%E9%96%8B/portfolio
#英國生活日常 #專欄 #英國生活 #移英生活
#英國洗牙 #曼徹斯特 #洗牙 #英國洗牙 #Manchester
#移民英國 #NHS #NHSdental
廣告時間 -
ig: leafopen3
instagram.com/leafopen3
fb: leafopenleafopen
facebook.com/leafopenleafopen
方格子︰ https://vocus.cc/salon/leafopenleafopen
如果有興趣睇下我既其他寫作作品，可以上 leafopenleafopen.com 或者 https://www.penana.com/user/52938/%E8%91%89%E9%96%8B%E8%91%89%E9%96%8B
如果覺得我寫嘢OK想請我飲杯咖啡支持下我既，可以上 https://www.penana.com/membership_plan?id=52938 或者 https://m.penana.com/stream?id=52938
