●轉去庄跤接柑仔園
我的美容師講，伊的老爸佇庄跤種柑仔，年歲較大的時陣，愛有囝轉去接，彼當時仔，伊的２個阿兄工課穩定，已經佇台北買厝，小弟做總舖，猶未買厝，伊的小弟決定轉去接柑仔山，規家伙仔搬轉去庄跤。
伊的弟婦仔佇庄跤蹛袂慣習，提出離婚，家己離開，２个囡仔留予小弟蹛。小弟顧桔仔園，時間較自由，囡仔讀書的時，早暗接送攏無問題。２个囡仔誠捌代誌，知影老爸誠辛苦，in毋捌講到老母。美容師家己有一个後生，逐工暗時仔攏會敲電話轉去庄跤佮彼２个姪仔講話。
我聽著，感覺真傷心，in小弟轉去庄跤，對逐家攏好，老爸有人陪，種一世人的柑仔山袂拍損，２个阿兄佮美容師嘛安心，小弟本人的生活可能嘛毋免遐緊張，囡仔好好仔來大漢。毋過對小弟的太太來講，足無公平的，in本來蹛台北，因為這个決定，伊的婚姻煞無去。幾若年了後，閣來過身，彼２个囡仔真正無老母矣！
做老母的人要求離婚，共囡仔放落來，可能予人佇尻川後議論，罵伊，我感覺伊誠有勇氣，生活無甲意，就離婚，毋是為囡仔來忍耐一世人這條路爾爾。囡仔可憐是無毋著，毋過，這个結果是啥物人、啥物代誌造成的？無人做毋著。
●開雪山磅空
我開始蹛礁溪的時，無愛坐客運，猶原搭火車。當年開雪山磅空的時，我知影磅空內底拄著大水，機器（潛盾機）埋佇內底，救袂出來，大水落８年才流煞，人按怎欲做這款的代誌，去動著大山？我感覺行彼个磅空是足恐怖的代誌，我無愛行。
幾若个月了後，我開始佇網路上看雪山磅空的資料，講到，開彼个磅空真困難，足歹做，做誠久，有的人因為做這个頭路「家庭破碎」，我想，可能規年迵天攏無轉去厝內，轉去嘛無法度幫忙啥物，in某纘袂牢，𤆬 tshuā囡仔來離開。這嘛是悲哀的代誌。
●孤查某囝佇台北陪老爸
我的同學講伊的厝邊仔朋友是孤查某囝，爸母干焦生伊一个，伊結婚了後，住美國。伊的老母過身了後，老爸較濟歲，囡仔嘛較大漢了後，伊除了定定轉來陪老爸，嘛蹛誠久，有常時仔一蹛就半年，伊老爸直直叫伊轉去，講伊有家庭，莫按呢，伊就是袂放心老爸一个人蹛。
等到伊的翁退休了後，有當時仔是伊的翁，老爸的女婿佇陪。經過遐爾濟年，婚姻猶佇咧，毋過一離開伊家己的家庭就半年久，佮「家庭拆散」的意思嘛差不多。
●有一个袂使出國，就煞鼓
我的同事，嘛是學姊，當年交往的男朋友佇國內碩士讀煞，閣再出國讀冊是伊的向望，學姊是孤查某囝，無可能出國，２人就來煞鼓。
幾若年了後，學姊結婚，仝一工，彼个前男友嘛佇美國結婚，有這款拄好的代誌！因為in佇交往的時，學姊的老母幫前男友的阿姊育囡仔，分手了後，繼續𤆬 tshuā ，學姊佮前男友的阿姊的感情嘛誠好，所以知影前男友的代誌。
In猶未結婚，無算「家庭」，彼嘛是未結婚，就予情勢來拆散矣！
