［性別講看覓］—「我有頓印仔」

我的外公真濟年前佇外口中風，予人送去病院，想辦法通知我阿舅，一、二工就過身去。

有一工，我的老母共我講：「我有頓印仔。」我老母講話攏無頭無尾，雄雄來一句，我知影伊的意思，就是「放棄繼承」啦！

我袂曉講伊當時的表情佮心內佇想啥物？是一種：

我真乖，照古早傳統的做；

阿舅（伊的小弟）叫我頓印仔，我都頓予伊；

阿媽（伊老母）嘛按呢講；

逐家攏按呢；

查某囝無人佇提外家的財產

…….

一陣時日了後，老母閤講：「六嬸婆仔講：『恁遮查某囡仔嘛袂遐戇，頓印仔進前，嘛愛提一寡錢來。』」這擺我閣較看無我老母的意思，無啥物意思的表情。六嬸婆仔是我外公兄弟的太太，老母綴阮囡仔仝款叫「六嬸婆仔」。

老母講，手續是阿姨去替阿舅辦的，按呢阿姨戇人加一級（這句是我講的）。

幾若十年了後，老母聽著伊的新婦攏有提著外家的財產，伊才知影代誌毋著，開始佇阮的面頭前罵阿舅，講伊自私、貪心，家己一个人得著，無分予伊佮阿姨。我想的是，印仔是你家己頓的，已經頓落去，閣較罵時間嘛輾袂轉來，我兜無人應伊一句半句。

外公的老家是佇山內的地主，抱七、八个某埔囡仔做養子，上尾才生一个後生。彼个後生大漢了後食鴉片，我袂記得我老母講的，是佇改鴉片所，抑是佇日本時代空襲的時陣死去。

我毋知影阿舅得著偌濟山？值偌濟錢？我無去想這个問題。

老母２年前過身。阿舅通知阮講有一筆錢通繼承，原來是有一筆土地，公家公告，無人來認，拍賣出去，錢寄佇政府內面。有一个代書毋知按怎揣著，通知阿舅有這筆錢，他想欲代辦，會使賺三分之一的土地金，阿舅的查某囝毋願予伊賺，家己去辦。辦出來，阮兜嘛有錢通領，雖然攏總幾十萬爾爾，老母上尾仔嘛有繼承著財產，毋過伊已經過身矣！毋知影。

我大漢小弟講，這筆土地當初應該無包括佇放棄繼承的財產內底，因為逐家攏毋知，所以逐家分。

Daniel Diesenreither on Unsplash