有一个無蹛佇台北的朋友介紹一个朋友Ｖ予我熟似，講：「恁攏蹛台北，較近。」
伊予我Ｖ的line，加一句：「伊真有孝。」
我佮Ｖ聯絡，約見面。伊這馬佇陪老母，無上班。一開始是伊的老爸破病，愛人照顧，大家參詳落來，叫沒結婚的小妹V辭職，轉來顧老爸看起來是上好的安排。厝內面的人予伊錢，等於倩伊顧。
七、八年了後，老爸過身，老母嘛老啊！伊接落去顧。伊管伊老母所有的代誌，陪看病，煮飯，管伊這會使食，彼袂使食，一工會使食偌濟？……，２个人的脾氣攏無好，嘛會冤家，嚷來嚷去。
我問伊：「這間厝，你後擺會使蹛無？」
「會。」伊凊彩應我，敢若這是奇怪的問題。
有一擺地動誠大，伊馬上用line問我按怎？我回沒代誌，嘛問伊佮伊的老母有按怎無？伊講：「阮直直唸阿彌陀佛。」
有一擺，天氣足寒，我約伊去體育館內面行路，那行那講話。無到２點鐘，伊就講伊欲轉去啊！我共伊講：「你愛共你阿兄講，你一个月愛歇２工，出去參加活動，揣朋友，in逐家輪流來陪老母。」頭一擺，伊無應。我下擺閣講一遍，伊應我：「人已經付錢矣！」啥物？有付錢，你就全貿，攏無in的代誌啊！
查某囝中年的時陣，會當佇庴內陪老母，看起來是誠幸福的代誌，沒問題。毋過伊無同事、朋友，無退休金，可能嘛無勞保，伊儉的錢有通偌濟？等伊的老母過身了後，伊老來的日子欲按怎過呢？可能伊的阿兄會照顧伊，哪是伊的阿兄先走，遐仔姪仔對伊有仝心無？我想著就感覺足恐怖。
「你足有孝。」這句話我講袂出喙。
照片作者攝
