紅魔鬼賽後評 社區盾 曼城 8(1)-(1)7 曼聯 (10-8-2024)
社區盾 曼城 8(1)-(1)7 曼聯 (10-8-2024)
1. 真心講，經過季前賽搞到三件重傷，我對呢場波既第一樣期望係唔好有人再傷…好彩冇事。
2. 講返場波，社區盾其實一向係屬於半熱身賽半正式比賽既性質，都預咗兩隊唔會去到盡。
3. 不過同樣係半力出擊，我覺得曼聯今場算係排出響現有人腳中最強既陣容出戰。或者曼聯呢邊可能更加係形勢所逼先要半力出擊。
4. 賀龍抖六個星期，曼聯要踢無鋒陣；約羅抖三個月、連迪路夫輕傷、馬拉仔仲為咗回歸賽場做緊康復、梳爾唔fit、雲比要賣，結果逼住包括老將伊雲斯、啱啱先好返既麥佳亞正選上陣，而馬天尼斯仲要客串左閘，後備入面得返後生仔阿馬斯一個左閘係後衛…
5. 講返場波，開波頭二十五分鐘，曼城係比較控制到大局，而曼聯就算拎到控球權，都被逼響自己後場猜波傳唔到出去，其中23分鐘仲逼到馬天尼斯誤傳麥卡迪差啲先開紀錄，好彩中柱。
6. 不過企穩咗陣腳之後，曼聯之後既六十五分鐘都係表現較好既一隊，創造出既黃金機會亦遠遠比曼城多，其實只要華舒福生性，果兩球禁區空晒對住艾達臣既黃金機會是旦射入一球，成場波局面都會唔同晒，結果兩球都唔中龍(第二球中外柱，算係近少少)，以攻擊球員黎講，佢今場既把握力真係好恐怖。
7. 仲有之後麥湯文尼響禁區入面接應福仔頭鎚二傳，佢只要掂到個波已經可以入網，但佢竟然踢空氣，白白流費咗一次黃金機會。麥湯文尼雖然有隨隊去踢美國既熱身賽，但係加埋今場在內，都睇到幾唔fit下，好多下禁區入面easy波佢拎到甩晒腳或者控唔到，如果佢連後上入球既能力都下跌既話，唔好話要爭正選，連後備上陣機會都唔易得到。
8. 點解咁講？因為中場中黎講，今場後備上陣既新仔哥利亞表現都好過佢，入波果球都係佢有份逼甩搶走對手個波打反擊。除此之外，呢個後生仔肯跑、搶截能力唔錯，係傳波保守同轉守為攻做得差咗少少，但整體黎講，呢位20歲既新仔，今場表現係合格有突。
9. 防中位，真係要講埋卡斯米路，佢今場真係踢得唔錯，前幾場甩漏冇咗，亦都殺咗唔少波。雖然未去到第一季黎最fit既水平，但睇落似上緊力，希望佢越踢越好。
10. 踢得好既仲有響熱身賽已經表現突出既戴亞路，佢上半場幾次右路突破射門同傳中都製造到唔同程度既混亂，比較可惜係五十幾分鐘佢已經退下火線，但毫無疑問，佢一定夠晒說服力去代替安東尼去踢正選右翼。
11. 但講到表現最好既，一定係後備出黎既入球功臣，今場同樣都係踢右翼既加拿祖，除咗球入波盡顯功架之外，佢既右邊反擊都製造唔少威脅，福仔生性啲佢賺多球助攻添。
12. 至於輸果球，都冇得好講，客串右閘既栢列斯查真係唔夠頂就唔夠頂，慢鏡睇到佢已經係飛到盡，但無奈佢真係細粒，爭少少就真係爭少少頂唔到。
13. 至於到最後係互射十二碼輸就冇乜得好講，不過今場波整體表現係幾唔錯，尤其是攻勢係造得幾好，但都睇得出把握力一定要提升，如果唔係你製造出幾多次機會，但一球都入唔到其實即係冇用。今場講緊唔係普通機會，果啲錯失既機會其實係白金級架，對職業球員黎講，果三個機會一球都入唔到要打屎忽喇。
#不專業足球筆記 #足球專欄 #專欄 #我愛紅魔鬼 #英超 #社區盾
#紅魔鬼賽後評 #MNCMUN #曼聯 #曼城 #足球 #賽後評
#英超賽後評 #足總盃賽後評 #加拿祖 #華舒福
更多專欄內容︰ https://www.leafopenleafopen.com/unprofessional9up
更多小說內容︰ https://www.penana.com/user/52938/%E8%91%89%E9%96%8B%E8%91%89%E9%96%8B/portfolio
廣告時間 -
ig: leafopen3
instagram.com/leafopen3
fb: leafopenleafopen
facebook.com/leafopenleafopen
方格子︰ https://vocus.cc/salon/leafopenleafopen
如果有興趣睇下我既其他寫作作品，可以上 leafopenleafopen.com 或者 https://www.penana.com/user/52938/%E8%91%89%E9%96%8B%E8%91%89%E9%96%8B
如果覺得我寫嘢OK想請我飲杯咖啡支持下我既，可以上 https://www.penana.com/membership_plan?id=52938 或者 https://m.penana.com/stream?id=52938
