23.08.2024|伯明翰(Birmingham)|樸素無華的第二大城市

Birmingham(伯明翰)呢個城市我細細個就聽過呢個名啦，當然我都係睇足球先識呢一個地方。讀中學嗰陣同朋友第一次喺香港大球場睇波就係睇伯明翰對港聯嘅比賽，印象中個場波都有好多入球。隔咗10幾年後，我而家係英國進行緊工作假期，而伯明翰呢對波已經由英超跌咗落英甲。

在出發去工作假期之前，我並沒將伯明翰列入我想去嘅城市入面，因為喺網上嘅討論區，或者社交網站都講伯明翰係一個治安比較差，市容一般嘅城市，同埋我覺得佢係一個比較沉悶嘅地方，所以就沒有好大興趣想去伯明翰一遊。

不過正值英國八月尾的長假（呢個係聖誕前嘅最後一個公眾假期，英國嘅假期真係比香港少好多，不過大假就多過香港好多），連續四日嘅假期，就想離開倫敦去近郊嘅城市走一趟，之前就去咗布里斯托同埋白禮頓等地方，所以就決定去伯明翰呢個近近地又唔算太遠嘅城市，睇吓係咪真係網上嘅人講到咁差。

伯明翰的交通

由倫敦出發去伯明翰嘅方法主要都係搭火車或者巴士，車程大約兩個半鐘至三個鐘。當日我就選擇咗由Victoria巴士總站搭National Express去伯明翰，來回車費大約20磅，車程就大約三個鐘，來回就要六個鐘。

去英國生活之前，我都唔敢想像自己可以搭到咁長途嘅巴士，但係經過之前去歐洲或者英國本地嘅旅行，漸漸地鍾意咗呢一個搭巴士或者火車遠征嘅感覺，喺巴士上面睇吓沿途風景，用吓電話，或者小休一陣就好快去到目的地。

今次就主要去咗伯明翰嘅市中心一帶，冇話特別去一啲住宅區實地考察。之前都聽過一啲移咗民嘅人都係伯明翰或者附近嘅Solihull落腳，將來有機會都可能都想去睇一睇。

1. 市中心(Bull ring)

落咗巴士之後，沿着大路行咗5分鐘去咗市中心嘅商場。呢個商場就有啲似喺倫敦嘅Westfield，你會見到林林總總嘅品牌和餐廳，行入去嘅感覺有啲似香港嘅又一城。

嚟到英國之後，其中一個同香港唔一樣嘅地方就係好少行商場，或者可以咁話係英國根本唔多商場行，所以每一次行呢一啲咁大型嘅商場，都會有一種好熱鬧，好多人，同埋返咗香港嘅感覺。

而商場隔離就有一個市集，呢個市集就賣一啲傳統手工藝，服裝同埋雜貨等。當我仔細在每一條窄巷入面穿梭嘅時候，就發現其實呢個市集賣嘅大部份能都係淘寶或者翻版嘅貨品。例如啲波衫一睇就好肯定佢係假貨，所以我都係喺呢個市集逗留咗一陣，行咗個圈就離開咗啦。

行完市集出返嚟之後就去咗條大街，或者可以話係行人專用區。大街嘅兩旁有體育用品店，化妝品店，以及大量的餐廳和咖啡店，我諗呢條大街就係伯明翰最旺最多人流嘅地方，我覺得呢個地帶就係伯明翰嘅銅鑼灣或者旺角。

2. Victoria Square

沿着大街行到尾，就去到咗伯明翰另一個著名嘅地方Victoria Square。如果係用其他歐洲嘅城市嚟形容嘅話，呢度就係伯明翰嘅舊城區。

佢只有好少部份嘅舊式建築。佢叫維多利亞廣場，顧名思義就係一啲維多利亞式風格嘅建築。雖然我就唔識形呢一個風格嘅建築嘅特色，或者歷史等等，但係每一次無論喺倫敦或者喺其他城市見到呢類型嘅建築，都會停下腳步欣賞，以及拍照。

我覺得呢啲建築係獨一無二，其他國家都未必會見到。雖然以前香港都係英國嘅殖民地，但係隨着咁多年嘅發展，有關維多利亞式嘅建築物都應該買少見少。其實香港點解唔好好去活化去保育呢啲建築，而家成日都話要日夜都繽紛，想喺旅遊業分杯羹，呢啲建築咪係可以成為香港嘅賣點。不過而家咩都拆晒啦，再講咩都冇用。

3.Canal Birmingham

然後就去咗一個喺英國比較少見到嘅景點，伯明翰運河。之前去過嘅英國城市入邊，印象中都冇見過運河，所以今次嚟到伯明翰知道有運河都特登走去睇一睇。

運河嘅長度唔算話好長，兩旁就會有啲好chill嘅酒吧，但係當日我就唔係太想飲酒，想搵一間咖啡店坐一坐，不過喺兩旁行咗一個圈都見唔到咖啡店。

喺運河兩邊欣賞緊風景嘅時候，就見到有啲遊客坐住觀光船喺運河遊歷，當時我見到有船行過，就立即跑上通往運河兩岸的橋上從高而下影低有船通過運河的畫面。

以我呢個係香港生長嘅人，由細到大影維多利亞港上嘅天星小輪就多，如果話喺運河影呢一啲有船通過嘅畫面應該都算係第一次，畫面就唔可以話好震撼，但係呢一啲就係英國，就係歐洲才有嘅畫面。

4. 港味茶餐廳(唐人街)

當日就去咗伯明翰嘅唐人街食午飯，唐人街規模，當然就冇得同倫敦相比，但係麻雀雖小，五臟俱全，觀察到都有幾間大型嘅酒樓，另外仲有茶餐廳，馬來西亞甚至一啲台灣嘅餐廳。

我揀咗去港味茶餐廳，入到去完完全全有一種返咗香港嘅感覺，首先侍應就會同我講廣東話，而餐廳上嘅電視就播放緊廣東歌嘅音樂節目，另外又聽到水吧大哥播緊一啲最新嘅廣東歌。

目測有接近八成嘅食客都係香港人，有啲叔叔似乎係長期打躉嘅茶客，呢一個真係好有香港茶餐廳嘅感覺。所以我都即刻除低耳機，八卦吓隔籬枱嘅人講緊啲咩。

當日我就嗌咗豉椒排骨炒河同凍奶茶，到咗倫敦生活之後，我都未食過一啲港式嘅炒粉麵，因為個價錢實在太貴啦，有啲唔捨得食。不過真心有啲掛住呢啲由細食到大嘅菜式，豉椒排骨炒河應該係我茶餐廳入邊三大鍾意食嘅菜式。當日嗰碟豉椒排骨炒河水準完全拍得上香港好食嘅茶餐廳，係而家寫稿嘅時間諗返都想去再食多一碟。

而凍奶茶就冇加冰嘅，佢比一個冰底你座住，當奶茶啱啱送到嘅時候係唔夠凍嘅，不奶茶都喺個冰底度座得耐之後就越嚟越凍。到左英國後，我發現啲凍奶茶都唔興加冰落去，可能佢哋擔心啲冰融咗之後會影響凍奶茶嘅味道。總括而言，我都好滿意呢一餐港式茶餐廳嘅美食。

去完伯明翰之後，就覺得呢個城市嘅節奏同倫敦相比係截然不同嘅，呢度啲人嘅生活節奏比倫敦係慢好多嘅。雖然我喺呢度就冇見到一啲好似網上啲人講到呢個地方咁恐怖嘅事，但係我又冇話特別鍾意呢個地方，如果你哋係住喺英國或者將來會嚟英國旅行，順路嘅話我覺得都可以嚟呢度到此一遊。