台灣愛行出家己的主體性，佮查某人愛認同家己的完整性，是仝款的代誌

我自2019年開始寫台文。一開始寫真少，誠久才寫一段短短的。敢若2023年開始，想著我較想欲寫的主題：性別，才寫較濟。落尾變做生活的代誌，閣有頭殼內面咧想的攏用台文寫，嘛貼佇「方格子」內底，將文章抾做伙，家己的面冊，抑是面冊的社團，欲揣進前的文章誠歹揣。

我咧寫的時，寫著改做台語講法的字詞遐爾仔濟，我家己就學袂完，正字對囡仔來講遐歹寫，囡仔欲學偌久才學會曉呢？猶閣愛佇華語的空縫中間爭取學的機會，想著遮，感覺囡仔講台語這件代誌足無力，真無希望。

後來閣想，我做我做會到的代誌就好，其他的就毋是我會當管的。看起來，台語的環境會愈來愈好，我毋免加煩惱，我家己學我的，寫我的就好。最近想著，查某人的處境佮台灣誠仝，我想辦法共我的想法寫出來，看講有清楚無？

▓自私，為家己想—是人佮政權、團體攏會按呢做的

●爸母嘛是自私的，看起來是因為咱的「例」、「傳統」的關係，

一句話逐家紲喙就講出來，變做逐家攏為家己拍算，無為查某囝、查某人想。

最近咧上一對一的線頂課，我講著身為女性，攏無予人看著阮是一个「人」，干焦予人當做工具，生來愛做啥物代誌的。細漢的時就愛來鬥做厝內面的工課，阮老爸定定講的是這句：「查某囡仔大漢嫁人，就是別人的。」敢若我大漢就予伊擲掉，無愛矣！（華語講的「被遺棄的感覺」）猶閣，是按怎一定愛是啥物人「的」，我家己袂當活？

閣有這句：「妳大漢嫁人，厝內面的工課就做袂著，這馬愛趕緊做。」我這馬愛做，嫁人了後愛做較濟，我這世人啥物時陣才會使歇睏呢？

我較大漢了後，聽著同學講，有的外省人的家庭，較惜查某囝，有的爸母講：「妳後擺結婚了後愛做，這馬佇厝內毋免做。」阮老爸佮in的想法差遐爾仔濟。我的感覺是，阮老爸無動伊的頭腦，去想彼个話是啥物意思？查某囝本人聽著，有啥物想法？干焦綴人講；抑有，人攏是自私的，伊干焦想著伊家己佮伊的家庭的利益，無想著我的立場，共我當做啥物？共查某囝看做無價值的物仔，儘量用，是誠濟人的做法。

阮咧準備結婚的時，阮翁佮in兜的人冤家，詳細情形我毋知，準備結婚的代誌逐家一定會冤、相諍的，看啥人佮啥人冤爾爾。什麼例佮典禮的代誌我無管，in兜人真濟，伊是屘囝，欲結婚，逐家誠歡喜，共代誌攏分去做，我干焦管我家己的衫佮化妝。伊的上細漢的阿姊寫批予伊，伊予我看，我看著有一段：「我知道你想結婚，照顧爸爸和你……」啥物！in看結婚的作用是按呢？阮的意思是阮欲想蹛做伙，互相陪伴耶！我毋免佮in諍，緊咧共婚禮辦完就好。

結婚了後，就一直無閒，我家己嘛無發覺，看著的代誌攏提來做，人的希望攏幫in完成，拍算囡仔較大漢了後，才來做我愛做的代誌。囡仔猶未大漢，阮冤甲誠厲害，我共伊講：「幸福、快樂，毋是你、恁老爸佮囡仔幸福、快樂就好，我嘛愛幸福、快樂。」伊應該聽毋捌，伊干焦知影叫我做這、做彼，毋捌想過我會傷忝無？所有的代誌攏是成就in的，無管我家己想欲做，想欲達成的願望是啥物？

阮這沿的，自細漢到大漢，聽人講的，報紙、冊頂懸寫的，攏是咧講查某人愛按怎有孝序大，共翁婿的工課、事業鬥相共，共囡仔𤆬（tshuā）好，厝內面的工課按怎做較好……，查某人家己的工課、家己的人生呢？無咧每一个人的頭殼內底，包括查某人家己嘛無咧想；查某人若講欲做啥，厝內面的人應的就是：「毋免，你共囡仔𤆬（tshuā）予好就好。」

這一、二十，二、三十年來較有咧講查某人成就家己的講法，毋過愛推廣到逐家攏有彼个想法，愛誠長的時間。查某人家己愛確定家己的價值就誠無簡單，因為自厝內面、序大人遐學著的觀念佮做法，欲改變需要誠大的覺察佮學習啊！

●「台灣」嘛仝款，無予人當做完整的地區、國家

想著台灣的處境嘛按呢，外口來的人攏是暫時來踮一下，抑是有啥物需要，有啥物利益來占一下，袂講西班牙人、荷蘭人，日本政府是清朝割讓予日本的，上近的國民政府，阮細漢的時讀的是：「我們的故鄉在大陸」、「壯闊的長江、黃河」、「台灣是反共復國的基地」無共台灣當做一个地區，一个完整的主體性，干焦利用台灣的人事物，來做in反攻大陸的資源，反攻大陸的跳板，完成in的願望爾爾。逐擺我看著中國地名的街仔路名，感覺誠礙虐，共in家己懷念的「故鄉」的地名來號做台灣各地的街仔路名，當時這款的做法是足暴力的。

我看過有人的文章寫：「不能住廈門，就住廈門街。」家己笑家己，一點仔就無好笑。

我有朋友博士班讀煞，去師院教書，伊講：「我的同事說，台灣沒有歷史。」啥物？伊講的「歷史」是啥物？啥物才號做「歷史」？台灣的歷史只是伊無讀到，抑是猶未研究出來、寫出來爾爾，地球生出來，任何所在攏有歷史，毋管是用啥物物仔去記錄、表示出來爾爾。這款人做師院的老師？毋過咧三、四十年前，聽著遮的講法，嘛誠歹去佮伊理論，共台灣意識的想法講出來。

▓講台語，寫台文，嘛是我家己（查某人）的認同之路

我這幾若年講台語，寫台文，發覺毋但是趕緊共台語講講轉來，寫落來，袂予台語死去，嘛是我家己的認同之路。我毋知影我是佗位的人？以前認為我是中國人，開放去中國觀光了後，我踏佇中國的土地時，知影我毋是中國人；咧捌台灣的種種的時，想到我的國家的名號是啥物？土地有偌大？人民有幾个？歷史是啥物……，攏是毋知影、無確定的代誌。

我講台語、寫台文了後，華語突然間變做「外來語」，袂癮講華語，雖然我的台語、台文猶閣無遐爾仔輾轉，毋過「到底我是啥物人？」的問題出現囉！會使確定的是，我毋是中國人，台灣人生做啥物款？台灣的主體性咧佗位？猶是愛探討的大代誌。對我來講，講台語佮寫台文已經是一條不歸路，袂回頭，直直行去就是。

我想欲佮我的規个人鬥予好，袂閣散咧規塗跤，認袂出來我家己的面目，確定我是一个完整的人，有家己的想法佮做法、家己的人生，毋是專門共人鬥相共，服務別人（家人），完成別人（家人）的願望爾爾，這件代誌佮台灣是一个完整的地區、國家，有家己的意識佮特色，因為一直予人割來割去，占來占去，破壞甲誠厲害，變成破碎的，愛逐家來共鬥起來，發展出來，是仝一款的代誌，仝款的工課。

所以，講台語、寫台文對我來講，毋但是語言佮文字爾爾，佮我規个人生有誠大的關係，用仝款的方法來進行。

▓家己的厝內面，愛佮家己的囡仔講；莫為了講台語的代誌冤家

進前，我干焦想著學好了後，去教別人的囡仔，毋著，家己厝內面的囡仔嘛愛講台語，經過查某囝佮囝婿的同意，我佮查某孫講台語，２歲外的時，招一團台語囡仔團，招囡仔來同齊耍，講台語。

我毋捌共查某囝講：「請妳講台語。」我干焦對伊、囝婿佮查某孫一直講台語，查某囝有當時仔會講出較短的台語來。我知曉台語是我的母語，毋是伊的母語，這嘛是我造成的，毋過毋是我的責任，是政府的政策，我當時毋知影只要一直共囡仔講台語，in就會曉台語，我幾若年前才知影，厝內面有固定一个人佮囡仔講Ｘ語，伊自細漢就會曉２（３）種語言。

頂禮拜一，查某囝講較濟台語，我講：「咱拜一來講台語。」進前囡仔團咧拜一，這馬改做拜六。伊應我講：「你不要叫我講台語，我想講的時候就會講。」好，我莫閣講。

有朋友講，伊的翁婿咧講公司的代誌，台語講講一下換華語，伊共翁講：「請講台語。」伊的翁無歡喜。我講按呢影響著翁仔某的感情就毋好矣！

（2024.9.20.）