麥田67房間 004 │ 作者：麥田健二 │ 2026年1月5日
---------------------------------------------------------------------------------------------------
Hello！各位奇蹟故事館嘅朋友，今日係2026年1月5號。
數字「5」，對你嚟講，有冇咩特別意義呢？「5」不是中間，而是偏心？
喺1到10之間，好多人直覺以為「5」係最中間、最平衡嘅位置。但你認真數下，佢前面有1、2、3、4，四個數字；後面卻有6、7、8、9、10，五個數字。其實，佢一啲都唔中間。我反而覺得佢有啲偏心，好似專登企喺度，默默守護住前面嗰班相對弱小嘅朋友。
雖然「5」喺數字上唔係絕對嘅中間點，但佢呢種「偏心」，卻巧妙地為無數上班族帶嚟咗一星期中最期待嘅開心——無錯，就係星期五。
星期五的集體狂歡：Happy Hour的誕生
「Happy Hour」呢個概念，唔知係邊個商家最先創造，但佢早已成為一種都市文化，代表住辛勞工作後嘅放鬆，同埋對週末嘅期盼。無論星期五收工之後，大家係飲一杯定兩杯，都有個happy hour嘅價錢，為嘅就係嗰份集體嘅快樂。
不過，係咪每一個人都享受到呢種集體嘅快樂呢？
一個人的Happy Hour：阿John的孤獨與救贖
喺我哋「奇蹟故事館」嘅世界入面，另一個主題房間《下班後......物語》，聽日將會登場嘅文章主角阿John，佢嘅Happy Hour就同人哋有啲唔一樣。 佢曾經滿懷期待咁邀請同事去Happy Hour，換嚟嘅卻係無人赴約嘅孤獨，只能返到屋企，繼續對住佢嘅寵物貓同電腦。
但故事嘅奇妙之處在於，正正係呢個寂寞嘅星期五，催生咗佢嘅自我救贖。喺另一個星期五晚上，佢為自己嘅寵物平台，舉行咗第一次線下讀者活動，搵到咗真正屬於自己、充滿連結同溫暖嘅「Happy Hour」。
5號的循環：感覺的落差與現實的無奈
阿John喺故事入面搵到自己嘅救贖，但現實中，關於「5」號嘅故事，往往更加複雜。就好似出糧咁。
回想起好多年前，初出茅廬嘅我，公司就係5號出糧。當時支出唔多，5號收到錢反而可以慢慢儲起一啲金錢，感覺自己係個幸運兒。
咁我想問下各位讀者，你哋究竟鍾意1號出糧，定係5號出糧呢？
你可能會諗，梗係1號好啦！但你又知唔知，有啲朋友1號出糧，聽落好似早啲有錢使，但現實係，租金、家用、仔女嘅學費補習費...所有賬單都好似約好咁，集中喺月頭幾日爆發。到咗5號，當我哋呢啲人仲期待緊出糧嗰陣，佢哋嘅薪金可能已經消耗咗一半有多，提早成為「月光族」，又要勒緊褲頭，帶飯飲水食麵包捱多二十幾日。
其實，無論1號定5號出糧，數來數去都係30日一個循環，邏輯上根本冇分別。5號出糧嘅人，只不過係將啲費用延遲到5號之後先處理。
但其實兩者「感覺」差好遠。1號出糧，感覺上係上個月付出咗30日努力，今日就即刻得到回報，係一種應得嘅獎勵。但5號出糧呢？感覺就好似我明明做足全個月，點解仲要無意義咁等多五日，先攞得返份糧？嗰種等待嘅煎熬，嗰種回報被延遲嘅不爽，先係最磨人嘅。
當然，對於年少無憂、冇乜家庭負擔嘅人嚟講，遲幾日可能冇乜所謂。但對於有家庭負擔嘅朋友，呢種感覺嘅落差，同埋現金流嘅壓力，就係一個實實在在嘅比較。
你呢？你又係邊一種情況？你會唔會未到月中，已經成為月光族？歡迎你同我哋分享下你嘅故事。
我的告白：比起星期五，我更愛星期六
雖然我圍繞住「5」講咗咁耐，但如果你問我一個星期最鍾意邊一日，唔好意思5號仔，我要拋棄你。我最鍾意嘅，其實係星期六。
星期六早上可以瞓晏啲，更重要嘅係，佢畀我一種城市煥然一新嘅感覺。我仲記得細個時，星期六嘅街頭總會見到賣旗嘅朋友，我哋會用少少零用錢，去為呢個社會嘅弱勢社群出一分力，嗰種感覺好實在。
「五」的使命：從不說「不」的力量
但你唔好誤會，我並唔係討厭5號。無論係星期五、每月5號，定係每年嘅五月；當我哋打開拳頭，伸出嘅係五隻手指；當我哋腳踏實地，都係用緊五隻腳趾。每一個「5」，都有佢哋嘅使命同生存價值。佢哋從來都唔會同我講「唔（五）得」、「唔（五）好」、「唔（五）做」。
上一篇文，我同大家分享過，我會為自己定立目標，但唔會被數字捆綁。今日諗返，數字其實都可以係一種靈感。可能我今年真係有5個目標，又或者，我希望超額完成，喺5月份就達到我嘅年度願望。
希望每一個支持我哋「奇蹟故事館」同麥田健二嘅朋友，可以繼續畀我哋能量，甚至未睇文就先畀個心心。日後如果開咗YouTube頻道，你哋就係我最珍貴嘅觀眾。
多謝大家陪我哋過咗2026年嘅頭五天，期望以後嘅50天、500天，一直有著你們。
感激，感謝！
-------------------------------------------------------------------------------------------------------
如果你都對「出糧日」呢個話題好有共鳴，或者被阿John嘅故事觸動到，請唔好吝嗇你嘅「心心」支持！
你嘅每一個心心，都係灌溉奇蹟嘅養分。
更重要嘅係，我想邀請你：
喺留言區分享你嘅「出糧故事」！
- 你鍾意1號定5號出糧？點解？
- 你係咪都好快變「月光族」，要勒緊褲頭捱到月尾？
- 你有冇咩特別嘅理財小秘訣，可以同大家分享下？
我哋好想聽下，喺數字背後，屬於你嘅感受同生活智慧。
記得**「追蹤」我哋嘅「奇蹟故事館」，一齊喺呢度分享彼此嘅故事，並期待聽日 《下班後物語》**欄目，阿John完整嘅救贖故事！
------------------------------------------------------------------------------------------------
------------------------------------------------------------------------------------------------------
