英雄、遺憾、偶像

回顧一下自己嘅睇波資歷，原來唔講唔覺，已經過咗十年有多。十年如一夢，睇返英超球隊嘅陣容，都好似冇邊隊有人打足十年，不免有啲感慨。當然，我知對於更多球齡比我長嘅球迷已經習慣晒呢種人事變動。由其英超嘅競爭咁激烈，球隊自然要透過買人嚟維持競爭力。雖然我都明白自己總會有日習慣呢種離離合合，但係喺我習慣之前，始終想講下三個對我嚟講幾有地位嘅球員。

我唔清楚係咪所有人都同我一樣，喺睇波嘅歲月入面，總會有三個球員喺你心目中，各自佔有一個獨特嘅位置。以我自己為例，就有標題講嘅三個：英雄、遺憾、偶像。到底呢三個名稱係咪意思呢？簡單嚟講就係，一個特別勁嘅，一個好可惜嘅，同埋一個陪住你成長嘅。而我嘅英雄遺憾同偶像，都係喺同一隊波成名，而上面就係佢哋其中一張有一齊影嘅隊照。

我啱啱開始認真睇波嘅年份大概係08年左右(細個有睇過下世界盃噉，不過其實唔係好知啲人喺度做緊乜)。嗰陣時可以話係曼聯自99年三冠王之後再次做返英超霸主嘅年代。要講嗰陣嘅球星，當中我相信絕大部分人第一時間講嘅一定係C朗。呢樣非常合理，C朗由佢加盟之初被視為碧咸接班人開始，就注定會成為焦點。而事實佢亦都冇令人失望，喺往後嘅十幾年一直發光發亮。只不過，比起C朗，我自己其實係留意朗尼多啲。無他，因為我係個英撚，重要睇住06年世界盃英格蘭點輸比葡萄牙。所以就算之後C朗點勁，喺我心目中，地位點都低朗尼少少，更何況朗尼留喺曼聯嘅時間長好多，對得耐感情點都多啲。

雖然成就同C朗真係有段距離，但其實以出道嚟計，外界對朗尼嘅評價係高過C朗。C朗作為葡超爆出嚟嘅潛質新星，大家對佢會有期望，但係望返朗尼，一出道就喺愛華頓遠射收死施文，已經俾人當係神童。如果以而家嚟計，年中有唔少球員會被冠上神童標籤就當然唔係啲咩啦，但係以當年嘅情況嚟講就完全唔同講法。啲傳媒甚至已經吹奏佢點帶領英格蘭重陣雄風。不過同唔少神童有啲相似，雖則縱觀嚟計數據唔錯，但係每逢大賽朗尼總係發揮唔到，永遠都唔可以帶領英格蘭再進一步(喺曼聯好多時都係噉，主角通常都唔係佢)。或者，呢個就係佢足球生涯嘅寫照：重要，不過一定唔係主角。

點解我會噉講？因為睇返佢喺曼聯嘅十三季，由年輕球員到老大哥，絕大部分時間都係球隊一個可靠嘅攻擊手，但就冇幾可係球隊嘅核心——初嚟報到嗰陣，就有雲尼斯達萊喺前面，冇得做正前鋒。等到雲佬走咗，又到C朗成長好，就算有得踢正前鋒，都要幫C朗衝鋒陷陣擔任開路角色。有段時間因為有迪維斯在陣同人手不足，更加要踢左翼。等到C朗都走埋，先至叫做真正成為進攻核心(其實嗰陣重有貝碧托夫喺度，不過冇之前咁慘噉解)。而身為一個射手，相對攻門，朗尼更多時被費格遜當係為其他球員開路嘅角色。而若然其他位有人缺陣，朗尼好大機會會被抽調去頂。我個人認為呢樣嘢對佢嘅成長有好大影響，係佢其中一個去唔到預期咁勁嘅主因(當然，無可否認，佢自身嘅態度都唔好)。不過，我好記得我睇波睇得最狂最投入嗰幾年，佢喺曼聯需要佢嗰陣挺身而出，將C朗離隊嘅影響減到最低，亦都創造咗好多精彩嘅入球。雖然曾經兩度鬧離隊，但而家睇返，都已經唔重要了，佢留畀曼聯球迷嘅，只有美好嘅回憶。

同樣係葡萄牙人，同樣係嚟自士砵亭，同樣係翼鋒，但係命運截然不同。喺C朗成功之後，爵爺食髓知味，喺2007年嘅夏季轉會窗簽入蘭尼。但係諗真啲，簽蘭尼可能係為咗做好C朗離隊嘅準備——事實上，C朗喺兩年後就加盟皇馬。當然啦，我相信唔係，因為蘭尼喺曼聯嘅前半段，都係踢左邊；C朗走咗之後，費sir選擇喺韋根簽嗰陣時冇乜名氣嘅華倫西亞打右路翼鋒位置，而唔係用已經踢咗兩季嘅蘭尼。可幸嘅係，呢個做法效果相當唔錯，左蘭尼右華西令到09/10球季嘅曼聯邊路進攻仍然相當有威脅，比較可惜嘅係當季始終都係失落聯賽冠軍。

之後一季啱啱開始，就有個嚴重打擊——華倫西亞喺歐聯分組賽受傷，球季報銷。於是乎費格遜被迫變陣，將蘭尼調去右路，左路就交畀傑斯同朴智星輪流上陣。而將蘭尼調去右路，不但止冇令佢表現回落，更令佢展示自己可以踢兩邊嘅長處。一季落嚟，蘭尼喺右路經常作出突破同傳中，貢獻唔少助攻。令曼聯嘅球迷對佢有好多幻想，希望佢可以代替C朗，又或者同華倫西亞雙翼齊飛。

其實及後嘅11/12球季，蘭尼嘅表現都唔錯，只係同一時間，球員最大嘅敵人，傷病亦都同時出現。傷咗一段時間之後，蘭尼嘅表現就開始走下坡，到咗2012/13球季，更加因為球證嘅誤判紅牌，令曼聯喺嗰季歐聯十六強止步，直接失去費sir嘅信任。雖然之後莫耶斯有同佢續約，球迷亦都希望佢攞返10/11球季嘅表現出嚟，但係莫耶斯比蘭尼更早離開曼聯，而蘭尼嘅曼聯生涯亦到此為止。記得嗰幾年，我久唔久就會搵蘭尼嘅片嚟睇，期待佢將來會喺曼聯創造啲咩歷史。不過，事實總係殘酷，幻想終歸只係幻想。

雖然動筆之際，佢重係曼聯球員，但我相信，下季佢應該唔會再喺度。平心而論，其實史摩寧喺曼聯九個球季，都唔算話踢得特別好，論重要性亦都唔可以同前面講嘅兩個球員相比。不過喺我心目中，史摩寧依然佔有一個獨特嘅位置。無他，喺呢漫長嘅九季入面，我見證住佢嘅成長，同曼聯嘅起起跌跌。

會留意史摩寧嘅原因，除咗因為佢當時係以備受期待嘅新星身份加盟曼聯之外，同時亦都因為以前我自己踢波都係打後衛，會留意下呢個位嘅球星。再加上同期嘅伊雲斯表現始終都係難以令人信服，令我更加希望史摩寧可以成功接到里奧維迪班。當時史摩寧受益於里奧成日受傷，有唔少機會上陣。雖然偶爾會有年輕球員笨拙嘅表現，但係史摩寧喺出場嘅時候表現都唔錯，值得期待。加埋之後一年有新泰利之稱嘅菲爾鍾斯加盟，令到唔少同時係英撚嘅曼迷都十分興奮，覺得未來嘅泰利里奧都喺晒曼聯。不過呢個由始至終都只係幻想，唔單止冇成真，甚至從未有一刻接近過。到而家我睇淡咗，唔會再對任何新乜乜新物物有任何幻想。如果一個球員嘅整個足球生涯都只係作為某個偉大球員嘅替身，噉佢嘅成就都唔會好得去邊。

哈哈，不過史摩寧嘅成就本身就唔會高啦。

廢話講完。返返嚟講史摩寧。喺經過咗四季嘅鍛練，攞咗兩個英超冠軍之後，後防兩個老大哥里奧維迪終於都離隊，史摩寧聯同青訓伊雲斯重有鍾斯，要由以前跟大佬變成領導防線嘅大佬。老實講，球迷都冇乜期望。因為三人入面，冇邊個喺前幾年踢得特別好：伊雲斯好似永遠都大唔透，成日都慌失失(然而今日睇返，佢已經淡定過連迪洛夫好多倍)，鍾斯就長傷，冇乜機會睇到佢嘅演出。至於史摩寧，就非常平凡，無功亦無過噉。大家嘅目光自然落咗喺新加盟嘅Rojo同白蘭特身上。之但係，世事往往就係咁神奇，嗰一季嘅史摩寧就迎嚟人生嘅高峰。不但喺後防事上一夫當關，更不時喺進攻嗰陣取得入球。當然啦，雖然話就話係球員生涯嘅高峰，不過同里奧維迪相比都有段距離，但至少，叫做係一個可靠嘅中堅。

然而，之後嗰季雲高爾轉返打四後衛陣式。本身都冇乜嘢，可能對於戰術執行力冇咁好嘅英格蘭後衛嚟講重更加好添，只不過，嗰陣曼聯飽受傷兵困擾，最終成季出得最多嘅中堅組合，係白蘭特加史摩寧。白蘭特號稱通天老倌，可以踢左閘、中堅同防中三個位。而周身刀下句係咩，唔需要我多講啦。我唔係想幫史摩寧搵藉口開脫，但係當你嘅拍檔有個致命嘅弱點(轉身慢)，其實或多或少，都一定會影響到自己嘅表現。

去到摩佬之後嘅事，大家都應該重有印象啦。拜利，同埋連迪洛夫，一個成日傷，另一個就……唔多講啦。總之個結果就係，喺史摩寧孭鑊孭咗兩季之後，終於沉冤得雪，真正嘅問題出喺邊，有目共睹。

嚟到呢度，叫做講完晒我呢十幾年嚟睇波嘅英雄、遺憾同偶像。足球世界當然會繼續發展落去，而我亦都相信喺未來嘅日子將會有更多球員成為我嘅英雄、遺憾或者偶像……呃，最後嗰樣未必啦，因為隨住我嘅年紀越嚟越大，我睇啲球員嘅心態都唔會再係一齊成長，而會係好似睇住個小朋友成為大人，可能係獨當一面，可能係一個無法兌現潛力嘅天才，可能只係一個普普通通嘅球員。但係可以肯定，上面講嘅三個人，喺我心目中都係佔有一個獨特嘅位置。就算將來有更加偉大球員出現，都唔會取代到佢哋。