「我們都是香港說書人」本土故事作者訪問：問題(二)

(回上題)

十三郎：
你哋覺得香港呢個地方，除咗網上，會唔會有其他途徑發展連載小說？實體書合定本、月刊、閱讀會、教學寫作班等等。

子遴：
當然報刊、雜誌仍然可以刊登連載小說，不過呢種方式要配合讀者嘅閱讀習慣，好似宜家已經少咗人睇報紙雜誌，係呢類平台上發表小說，追讀嘅人亦可能會少咗。閱讀會、教學寫作班等平台需要讀者在場，更屬於少眾參與嘅活動，情況就好似宜家嘅「讀戲劇場」咁。

羊之歌：
網上無可置疑是最方便的平台，就好似「紙言」已經造就左唔少人的出書夢。實體書合定本其實係唔錯的做法，PENANA第一本DSE不限時比賽就係好例子，競勝中又可以得到進步，呢樣野可以長推。連載月刊呢樣都唔錯，如果這是直接將實體書合定本月刊化的意思，我非常贊成。閱讀會同寫作班都難了，現在生活時間太多活動，但如果要求寫作質量提升的話，閱讀會、寫作班就當然是最好的。

萬歲森林：
我認為網上小說喺香港正急速發展，只係而家宣傳力度不足，或者講，係啲人唔知點宣傳，又或者唔想放資源去宣傳，可能同現有書商、書店、印刷商嘅利益有關。假如可以將印體體書嘅資源放在網站推廣上，相信看網上小說嘅人會倍增。當然，最初一定要邀請一啲知名作家加盟助威，打響頭炮。至於出實體書合訂本絕對係一個加強宣傳嘅渠道，書唔使印得多，但一定要有，因為放喺書店係最直接接觸讀者方法，好過你大賣港鐵廣告。
至於月刊、閱讀會同教學寫作班，要等作家出咗名先至有得搞。除非你本月刊有金鏞、倪匡之類嘅名牌坐鎮，否則好難持久。

3D八爪魚：
連載小說尼回事，網絡連載已經係最佳途徑。一來免費，二來方便。搭車或食飯，上堂太悶，等女朋友買衫，閒時攞手機出來碌兩下，比實體書方便太多。以現今科技來講，網絡已是最好既載體。

短頭髮：
呢個問題對於我呢個路人甲嚟講有啲難答。我覺得閱讀會會有用啲，大家互相分享想法，增強社區對連載小說的討論度，吸引大家的注意，讓大家感受連載小說魅力。

天洛卡：其他途徑，唔係無，而係難。相對可以自由進出嘅虛擬網絡世界，傳統做法較為難於控制成本，難於持續發展，難於普及。可能有人會認為我提及「成本」、「利益」之類嘅話題，睇落好市儈，但偏偏呢個係唔可以唔諗嘅要素。即使不求賺錢，亦希望可以攞返成本，咁樣先有資源同能力去持續發展。所以網絡仍然係首選方法。
其他傳統方法（例如問題提及嘅幾個方法）唔係唔得，而係唔適宜喺未有足夠同穩定資金來源嘅時候舉辦。唔似網絡咁有廣大嘅「觸及層面」，效益唔高嘅同時，成本亦未必較為低。除非，舉辦者係有「號召力」嘅人，能夠有效將「觸及層面」大大拉闊。即使未能夠將效益同成本形成正比，亦可以放手一試。
世上無必嬴嘅仗。但可以盡量提高勝算，減少失敗嘅機會。

沒有名字的人：
係香港依度，其實除咗網上之外，真係無咩地方發展連載小說。真係要講嘅話，我諗係大學嘅校刊，因為而家嘅香港人唔會同以前一樣特突去買唔同嘅月刊嚟追連載小說。

(續)