對我講一聲「I do, I do」
韓國人搞婚禮，以實際同快速見稱。
一般嚟講，韓國人喺呢方面，秉承咗佢哋完全唔浪漫嘅「優良傳統」（唔好同我講：唔係吖，睇韓劇佢哋好浪漫㗎！你盞俾我恥笑）。佢哋唔會有「求婚」呢幕；婚事絕大部份都係一對新人、甚至係佢哋雙親坐埋一齊傾出嚟嘅；甚少有韓仔拎住隻兩卡 Tiffany 六爪單膝跪嘅場面出現。所以，港女們可以抹返啲水（我意思係口水）。
由雙方家長第一會面，到婚禮舉行嗰日，一般唔會超過三四個月。港女們嗰啲成年幾兩年前開始籌備嘅「夢幻婚禮」，喺一般韓國人眼中，係智障嘅行為。
韓國婚禮，絕大部份都係喺一啲「結婚會堂」舉行。咩係「結婚會堂」？你想像一吓，一間好似香港/世界/萬國殯儀館咁嘅建築物，裏面有唔同大細嘅禮堂，專為結婚喜宴而設；呢啲就係韓國嘅結婚會堂（我比較喜歡叫佢做「愛情殯儀館」）。
一般嚟講，一對新人同雙方家長嘅其中一次會面，就係喺呢啲結婚會堂舉行。一路食一路傾，傾掂晒啲細節（即係雙方家長點樣攤分婚宴嘅費用），就會叫會堂嘅職員準備合約，然後簽字落訂；tada！禮成。到婚禮當日，一切有禮堂安排好晒，一對新人只需要準時到場招呼朋友就得；唔使勞心勞力。
剩返落嚟要做嘅嘢，就係去搵間婚紗鋪影婚紗相。
禮金？差啲唔記得講，韓國人結婚，係「嫁女」，唔係「賣女」，同香港唔同；所以冇「禮金」呢回事。
既然係咁，點解Ricky同美恩嘅婚禮，會玩到我同 Chloe 一頭煙？
咪就係因為佢哋唔想喺愛情殯儀館舉行婚禮，係都要喺酒店搞囉……
九月四日，星期六。
我姐姐終於嫁喇！過埋今日，我同 Chloe 就唔使再做小書僮，唔使俾佢兩公婆「紅綠燈」咁點紅點綠喇！諗起都興奮！
早上九點。
Chloe 喺我嘅協助之下，已經著好全套韓服。佢著咗韓服個樣真係好靚，優雅大方；我今朝嘅視線好少離開佢，我嘅心跳都比平時快。
「蠢蛋呀，我今日靚唔靚呀？」坐喺梳妝檯前面化緊妝嘅佢，望住我喺鏡中嘅倒影，同我傾緊計。
坐喺佢後面嘅我，望住鏡中嘅佢，微笑不語；其實我心跳仲好快。
「嘻嘻，你好鍾意我著韓服呢個樣呢？」
我望住鏡中嘅佢，微笑不語。
「我等咗呢日好耐㗎喇！我其實一直都想，搵個機會，著我呢套韓服俾你睇㗎！」佢笑得好甜。
我望住鏡中嘅佢，微笑不語。
「你個樣好咸濕呀！嘻嘻！唔好啦，趕時間呀，一陣遲到就唔好啦！」
我望住鏡中嘅佢，微笑不語。
「乜你咁㗎！望到人哋都心郁郁𠻹……嘻嘻！」
我望住鏡中嘅佢，微笑不語。
「乖啦，今晚啦！今晚返嚟，我俾你一層一層咁除晒佢吖！」
我都係仍然望住鏡中嘅佢，微笑不語。由始至終，我一粒聲都冇出過。
點解我哋嘅相處，突然間咁老夫老妻 feel 嘅？
上午十點半，Swiss Grand 平台花園。
話晒都係五星級酒店，就算個 wedding alter 出咗事，佢哋都可以補到鑊。現場嘅 setting 已經搞掂晒，巨型嘅冷氣婚禮 marquees 已經全部準備好，要用嘅嘢都搞掂晒；一對新人喺視察完畢後都好滿意。
「唔……我一定可以駕御你㗎！」Chloe 深呼吸，除低佢最愛嘅 AJ13，換上一對吋半 Sergio Rossi。「過埋今日，我要三日唔著鞋、一年唔著 heels！」
「妹妹呀，」신부 （Sinbu / 新婦，即係新娘）美恩都換緊鞋，不過係對四吋嘅 Louboutin。「點解你咁鍾意著籃球鞋嘅？」
「因為呢對係情侶籃球鞋嚟㗎，」Chloe 摸住對 AJ。「我哋一齊買㗎！」
「你兩個真係甜蜜！」美恩有啲羨慕。
「今日最甜蜜嘅，應該係你呀姐姐！」Chloe 一邊講、一邊攬住美恩。
「多謝妹妹！你同弟弟都要咁甜蜜呀！」美恩今日個樣，的確好甜。
婚禮預定喺十二點半開始，Ricky 嘅親戚同我哋差唔多時間已經到場，幫手作最後嘅打點。至於美恩嘅屋企人呢，就仲未見人。
差唔多十二點，美恩嘅父母終於施施然到場。從佢哋嘅態度同表情睇得出，佢哋對呢頭親事非常之不滿；好似連同 Ricky 嘅父母、佢哋嘅襯家打個招呼都唔想。
但點唔鍾意都好，韓國人到底都係愛面子嘅人，兩個老人家仍然要堆起笑容，喺會場嘅入口外邊迎賓同收禮。
由於美恩同 Ricky 係唔同國籍嘅人，呢個婚禮本身，就係一個「混血婚禮」。一對新人嘅雙親棟喺門口收禮，然後派餐券，再排隊同新人影相，呢一 part 係韓式；wedding alter 行禮、然後 party 跳舞，呢一 part 係西式。
大約十二點半，婚禮嘅嘉賓已經嚟得七七八八。值得一提嘅係：由於美恩係護士長（啱啱升職）嘅關係，唔少佢醫院嘅同事都有到賀。其中有幾個幾靚女嘅俏護士。
好明顯，Chloe 都察覺到呢件事，所以當佢唔使彈琴，或者唔使陪住姐姐嗰陣，佢就用人釘人戰術，釘得我好緊。如果佢識踢波的話，佢應該係個唔錯嘅防中。
婚禮嘅過程，其實都係大同小異，冇乜驚喜亦冇乜鑊氣；所以我亦都唔特別花篇幅去講喇。不過，其中有啲 trivia，我覺得幾得意，可以分享一吓：
- 美恩嘅父母唯一有笑容嘅時刻，就係喺 reception 收禮嗰一刻；
- 韓國婚禮一般嚟講都係喺門口擺低人情，然後啲「迎賓」按人頭發餐券，賓客憑券點餐。由於我哋嘅牧師比較早到場，未有領取餐券，差啲搞到冇餐開；結果要我幫佢伉儷兩位搵餐券，女家啲人以為我想食霸王餐；
- 女家嘅親戚對男家嘅親戚態度唔係太友善，好多時都會私下指指點點，講啲好 mean 嘅嘢，恰人哋唔識聽，但我識；
- 因為美恩貪心，既想Chloe做佢嘅伴娘，又想 Chloe 幫佢彈琴，結果 Chloe 經常要喺台上跑嚟跑去。由於佢未能駕御佢對 Sergio Rossi，所以跑動時動作生硬，經常惹來笑聲；個傻妹就以傻笑解嘲，幾搶鏡；
- 有個靚護士姐姐（個樣有啲似朴恩惠）對我好有興趣，坐咗喺我隔離，不停英韓並用咁同我傾計；後來俾 Chloe 一句收皮：「姐姐（有敵意嘅一句，暗示佢老），呢個係我男朋友嚟㗎。」韓妹之間嘅相處真係好兩極。
點都好，婚禮順利進行。見到我呢個曾經喺情路上重創嘅姐姐出嫁、見到我嘅好朋友娶得嬌妻、其實真係非常戥佢哋高興。我暗暗祝禱，希望呢對有情人白頭到老、永結同心。
酒過三巡。
眼中所見，美恩嘅親慼朋友都走得七七八八，現場著住韓服嘅人比開始嗰陣少咗好多；但係仲有幾個俏護士喺度跳緊舞。至於 Ricky 嘅親慼朋友，大部份仲喺度飲緊酒跳緊舞盡興緊；菲律賓人真係比較熱情。
我企咗喺會場嘅後面，一面睇緊佢哋好高興咁跳緊舞，一面飲緊杯 Ballantine’s 17 neat — 去飲自備威士忌，我諗我係韓國第一人。呢個時候，Chloe 的住對高踭鞋行緊過嚟。
「我投降喇！」唔使睇都知，佢對腳應該都損晒；佢係我認識嘅女仔之中，最唔識著高踭鞋嘅一個。「哥哥幫我袋好對鞋吖。」
我幫佢收起對鞋喺我個隨身背囊度，然後同佢講：「小姐，賞面跳隻舞嘛？」
佢則一則頭、笑一笑、然後遞隻手俾我拖住、一對冇著鞋嘅腳就踏咗上我鞋面；我哋就係咁，喺會場嘅後面隨音樂起舞。
跳咗大約兩三首歌，我哋停咗落嚟。Chloe 著返佢對 AJ（ 韓服襯 AJ ），然後我哋靠住後面嘅一張長檯，分享緊我嘅「私伙」Ballantine’s 17，relax 緊。
我覺得，係時候實行我嘅「大計」。
我喺個背囊度，攞咗我個「老拍檔」 — Sony Discman 出嚟，然後遞咗一隻 earphone 俾 Chloe，示意佢戴上。
「哥哥又有歌俾我聽？」佢仍然係則一則頭、有少少疑惑咁笑。
我點頭。當佢戴上 earphone 之後，我㩒 play；耳機傳嚟呢首歌：
為妳鍾情 傾我至誠
請妳珍藏 這份情
從未對人 傾訴秘密
一生首次盡吐心聲
望妳應承 給我證明
此際心弦 有共鳴
然後對人 公開心情
用那金指環做證
對我講一聲終於肯接受
以後同用我的姓
對我講一聲 I do I do
願意一世讓我高興
為妳鍾情 傾我至誠
請妳珍藏 這份情
然後百年 終妳一生
用那真心痴愛來做證
音樂停咗之後，Chloe 望住我。佢個樣有啲不解，因為佢一粒字都聽唔明。我當然知佢聽唔明，我有心嘅；否則，我邊有位開口講我想講嘅嘢？
「哥哥，唔明呀。」Chloe 用廣東話答我。但係佢嘅表情話俾我知，佢開始 get 到我想點。
我喺褲袋攞咗個 baby blue 嘅小布袋出嚟 — 裏面有一隻 Tiffany 1837 系列嘅戒指。（我知，冇石冇誠意吖嘛！我啲誠意喺個心度，唔係喺舊化石度。）
我輕輕捉住佢隻左手，將戒指套上佢嘅無名指 — 唔會唔啱size，因為我係拎住佢戴開嘅戒指去買。戴好之後，我捉住佢雙手，喺佢耳邊講：
「은미 씨 저랑 결혼해 주세요. 」（銀美小姐，嫁俾我。）
我之前諗咗好耐，喺呢個場合求婚，係因為我想借婚禮呢個咁甜蜜嘅 mood 嚟幫一幫我；但始終呢個都係美恩同 Ricky 嘅婚禮，我唔想太喧賓奪主，所以冇單膝跪，亦都冇大動作。
不過，呢次仍然係我一世人最果斷嘅一次。
佢聽咗之後，笑容開始僵硬、個人呆咗、眼眶開始紅；然後，我見到一滴眼淚悄然落下。
呢個場面，為時大約半分鐘；我開始擔心，我究竟係咪太唐突嚇親佢？我哋其實係咪未去到呢個地步？
「小美……你冇事吖嘛……我……」我其實唔係好知應該講乜……
Chloe 俾我嘅聲音驚醒，佢望一望我，然後輕輕撲過嚟攬住我，喺我耳邊有啲啞咽咁講：
「I do, I do!」
佢應承咗！佢應承咗肯做馮太！
我開心到抱起咗佢、轉咗個圈，佢輕輕尖叫咗一聲；滿面眼淚，但係帶住一個燦爛嘅笑容。
可能我哋嘅動作大咗少少，引咗個新娘過嚟 — 美恩行咗過嚟，睇吓我哋發生乜事。
「你哋冇事吖嘛？」美恩對眼前嘅景象有啲疑惑。
仍然係滿面眼淚嘅 Chloe 撲過去攬住佢，笑住同佢講：「姐姐！蠢蛋哥哥向我求婚呀！我要結婚喇！」
輪到美恩尖叫。
「恭喜你哋呀！」美恩都開始有啲眼濕濕，佢攬住我同 Chloe。「知道你哋終於結婚，我好開心呀！」
美恩嘅歡呼引嚟咗在場大部份人嘅注視，Ricky 同幾個我哋熟嘅朋友都走過嚟「八卦」一吓發生咩事。然後係更多嘅歡呼、恭賀嘅說話、祝酒等等。
我唔知 Chloe 當時嘅感覺係點、諗緊乜；但係對於我嚟講，現場其他人嘅表現、同對我講嘅說話，其實我都唔係聽得好清楚。因為我個心，已經俾一件事填滿咗：
我同 Chloe，終於都邁向人生嘅另一章 — 結婚。
（待續）
