裝修名人堂 Ken 認知是裝修核心 內部結構是工程根基

Ken娓娓道來一單又一單Case，每單都是30多年工程年資重要的一頁。21歲入行的Ken，本來在塑膠公模廠打工，學習繪圖、機器、燒焊，更重要是從製作塑膠公模的過程中學習逆向思維。他人生第一單親手掌控的工程並不是家居裝修，而是朋友找他幫忙焊報紙檔鐵架。
「以前興one-man band，然後搵人幫下手做，咁就開始咗做裝修。」裝修的學習模式從來不是乖乖坐著上課，而是學師，邊做邊學。Ken開公司後，跟著自家的木工師傅學習，他也會教員工自己所認識的技巧，互相學習。27歲決定重新上課，考電牌、防水牌等，以牌照取得公眾認可。
認知是裝修的核心條件
Ken說做裝修師傅在工藝之前，最重要的是對工程知識的「認知」，對工程知識的認知。「第一樣要講嘅唔係做得專唔專，係要有基本認知。例如而家流行嘅rain shower，有啲人唔會check rain shower個水力要求去到幾大，就應承個客會做俾佢，其實好多香港住家個磅數去唔到1bar水力，推唔到rain shower就會變左好似滴雨咁。」
「又例如一個浴缸轉企缸，企缸要升到幾高呢？廁所可唔可以換位呢？好多不良嘅裝修公司，都會答你可以，總之乜都應承咗先。但佢唔知你屋企內部結構，落咗搭跟住先搵判頭、電工同水喉工去睇，睇左話得就得，唔得就要加好多錢整，你就逼住要俾。」
「而我哋會先去現場睇內部結構嘅嘢，有清晰概念，喺一開始就幫您睇得清楚晒可唔可以改，同埋會牽涉幾多樣嘢，報價就方便好多。」
「其實係因為而家裝修或做工程嘅人，本身唔識水電，例如比幾多條fuse個fuse箱佢哋係唔知㗎！只係講結構有幾靚有幾豪華，但其實靚嘅設計，係要有好根基支撐住！」
內部結構是工程根基
華美設計的背後有無數的學問，只有扎實的根基才能支撐整個家居，但又有多少人會留意呢？「裝修好得意，你做內部結構嘅工藝水平冇人會知同留意。做到條喉有幾直，穿條電線有幾靚，啲水喉駁得幾好，佢哋都唔會知。明明內部結構係最重要嘅根基。」
「亦因為咁，有啲師傅Hea做個客都唔會知，每每都係到出現問題嘅時候先知做工有問題。」
有牌有指標 貼心建議客人
那如何告訴客人你有認知？「我哋公司好多認證，唔係代表有幾勁，係代表我哋有基本認知，認知有乜係可以做，又或者做咗乜係犯法，我哋會避免去做犯法嘢，幫你諗第二個方案去做到你想要嘅結果，唔會做完啲嘢出黎唔負責任。」
「例如而家好興open kitchen，好多人想做，但其實香港好多住宅廚房都係大門口隔離，果條通道一定跟住大門一樣用防火門，唔可以變開放式。唔係好多人有呢啲認知，或者佢知都唔講俾你聽，但我哋一定會話俾客聽有乜風險，你要做open kitchen又要明火的話，你要預保險通常唔包。」
寧做多 不做錯
Ken一直認為溝通亦是重要一環。每位客人心中都有要求，若溝通不善會引致「兜好大個圈」。Ken所負責的工程一定會在協商後，在現場mark下所有位置，等戶主能有未來家居的整體藍圖。
「出floor plan係最基本，個客aprove咗之後，我就係現場mark返晒啲傢俬高度闊度。嗱，例如呢度放電視櫃嘅，tv、data、av槽都會mark埋落去，咁個客就可以好清晰咁知道晒所有嘅電位係邊度，冇多冇少。又例如，燈位都mark埋就可以知道啲燈光會唔會被阻，客人可以想像同感受得到現場環境。」
「雖然做多咗嘢，但出現問題機會就會大大減低。我哋唔想錯，一個裝修3至4個月時間，我哋係追緊時間，與其浪費時間改，不如一開始就做好佢。」
以客人笑容為標準 不自滿於工程大小
Ken曾在元朗開舖，多做獨立屋工程，後來公司搬到荃灣，可說擁有各類大小的家居工程經驗。「個工程大定細其實我唔著緊，做大屋冇話特別有成功感，反而做細屋仲有技巧。」問到踏實謹慎的Ken最滿意的作品，「滿意作品？咪就係客人笑容囉，佢滿意就係我滿意！」

本文章內容及圖片均由本專欄作者提供及上載，並不代表本公司立場，如有任何版權問題，請與本公司聯絡。關键字： 裝修佬; 裝修; 故事;裝修;