國際合規新聞報道@規佬筆記 (4)

大家係咪等緊我寫 Wirecard 最新嘅消息？

大佬呀， 7 月 1 日紅日嚟㗎嘛，畀我抖下都好吖。

嚟，已經申請破產嘅 Wirecard 呢，就已經交託畀破產管理人出售公司嘅業務。準確啲講，就係將集團拆骨囉。

不過有別於其他破產個案，由於 Wirecard 係 FinTech 公司，實質上冇乜嘢可變賣嘅 physical asset ，剩低嘅業務，如果唔拿拿臨搵戶好人家接手，啲客戶就好容易流失去其他競爭對手。

所以，唔使急，但最緊要快。幾個禮拜內好搞掂佢。

之前講過， Wirecard 喺英國分公司 Wirecard Card Solutions (WCS) 嘅資金被英國監管機構 FCA (Financial Conduct Authority) 凍結，搞到用佢收數同找數嘅公司同旗下客戶都乸手唔成世。不過而家 FCA 已經解封 WCS 嘅家當

Wirecard 喺美國嘅業務 Wirecard North America ，前身就係花旗嘅預付卡業務。呢壇嘢據報就已經安排出售，運作未受集團影響。

成功由 Chief Compliance Officer 搖身一變成為 CEO 嘅 James Freis (FT 直情用 “was catapulted into the chief executive role” ，投石機，有畫面冇？) ，目前嘅工作就係要穩住軍心，確保剩餘生意同客戶都可以一切如常。不過班員工家陣都未出到六月份糧，軍心可以有幾穩陣呢？

最後， Wirecard 欠債高達 35 億歐羅，臨門嘅債主都做好蝕入肉嘅心理準備。 Wirecard 嘅債務喺市場上，只能以不足 20% 嘅價值轉讓畀專執垃圾嘅不良債權 (distressed debt) 投資者。

FT link:

一則金融創新嘅分享。

支付寶 (唔係香港嗰個) 本身係電子錢包大家都明，而家佢哋夾埋財仔 offer 免息免手續費嘅短期貸款。

玩法有啲似嗰啲增值服務咁，優惠期內你 cut 得切就冇手尾跟 (當然呢啲 data 都會喺 server 留底，下次人哋最多咪唔侵你玩，免得畀你二度 free-ride) ，但係如果㩒咗掣攞應急錢，而兩星期後唔記得還，自然就要畀利息。

借定唔借？還得到先好借。對於 financial literacy 低嘅朋友嚟講，都係恪守紀律，有錢先好使。

之前講過美國炒股App Robinhood 懷疑因為顯示咗一個負 73 萬美金嘅臨時結餘數字，導致一名 20 歲用戶自殺。

FT 今日有篇深入專題 (the Big Read) ，長但唔難睇。最緊要嘅，係免費。
報道除咗質疑炒股App gamification (遊戲化，例如版面設計同埋炒多啲可以升 level) 對於年輕周戶嘅影響，亦有啲幾得意嘅數字：

- 喺巴西，炒股/輪多於 300 日嘅散戶， 97% 輸到清袋。
- 美國期權市場過去十年急速增長咗兩倍。
- 受散戶歡迎嘅 single contract 佔期權市場比例，由 2018 年底嘅 9% 升至 13% 。
- 美國標普 500 指數嘅期權有 20% 喺 24 小時內到期。

一旦 FinTech 撈咗遊戲元素，落入 financial literacy 不足嘅小後生仔度，輸咗或者玩大咗而要搵人埋單嘅話，到底係邊個嘅錯呢？

FT 免費 link:

噚日俟晚 SFC 出咗份報告，係關於港交所職能分隔 (ring-fencing) 嘅。但 sorry 真係 too long, not yet read 。今朝起身比較下兩份報章嘅寫法，個人認為，《蘋》交代得比較簡潔易明。當然啲業界人士睇法就純粹加色 (老抽乎？) 嘅啫。

Just in case 大家唔知發生咩事，港交所向來一人分飾兩角。首先係香港股票市場嘅營運者，越多公司上司、交投越暢旺，港交所業績越好，股東利益越多。
另一方面，港交所嘅上市部負責監察上市公司符合《上市規則》 (Listing Rules ，唔知點解《蘋果》寫成《上市條例》) ，即係扮演監管者嘅角色。

情況就類似一間金融機構，有 sales 有 compliance ，一個跑數一個把關。

雖然話喺中資企業文化入面， controlling units 同時要 support / facilitate business growth ，但係有啲 Chinese wall 係應該嚴守嘅。你啲 Sales 拉埋個 Compliance 出去見客，無非夾鳩人啫？ (sorry unintended double pun)
不過其他有啲細節，我就唔肯定係咪咁黑白分明。例如話將 email cc 畀 CEO 李小加，算唔算施壓呢？好主觀喎。至於話前線可以參與把關部門嘅 appraisal ，喺今時今日講求 360 review 嘅情況下，一樣好難避免。

講到尾，你做 Compliance 做到公司冇飯開，一樣都係畀 CEO / COO 兜走嘅。現實啊，現實。

《蘋果》 link:

證監批港交所職能分隔弱 李小加曾邀上市科參與招商 業界：下台導火線

《明報》 link:

[爛牌有爛牌嘅打法]

星期一財經版通常冇嘢睇，於是就有啲專題報道或者人物專訪去充撐版面。又，總好睇過就咁豬牛羊報價嘅。

484 雲遊都算係香港第一代「網遊股」，曾經 hit 過下。不過當年有個缺點係做網遊，未打入手遊市場，所以市場上其實有其他更好嘅選擇。當年嘅事啦。

家陣雲遊再次見報，但就唔係啲咩好消息。喂，更換核數師喎。同 F.I. 宣布更換 Head of Compliance 差唔多道理，都係伏味濃囉。

當然，合規人才貨如輪轉，換人唔一定係 true positive (冇人誤會呢個係「真正利好」呀可？) ，而上市公司好人好姐，免得過就真係唔會換核數師。文中受訪者話「其公司無論在服務質素、收費上均較為優勝」，都係自圓其說啦。

當 EY 喺德國因為 Wirecard 而搞到焦頭爛額嘅時候，香港嘅投資者大概都明白， EDPK 光環並唔係一切。但冇光環而要因為客戶要求而呢樣扭嗰樣改，台戲豈不是更難睇？

《蘋果》 link:

中匯安達半年添18公司客 一半涉可疑賬目 問題股核數師 四折廉價搶客