也說初衷

近年有啲詞語，唔知點解越來越眨值。例如話，譴責、初心、謙卑。或者係用嘅人越來越多，或者用嘅人衣不稱身，未及抬高自己，但首先眨低咗詞語嘅價值。

趁 Happy Friday 飲大幾杯 (留意返，無三不成幾) ，不如都學趕下潮流，講下初衷。

望返 Facebook Page ，《規佬筆記》經營咗三個月，終於超越咗 4,000 like 嘅門檻。以今時今日社會風氣嚟計，大家鍾意 Follow 而唔係 Like (慌死人知道咁？規佬好失禮大家咩吓？) ，而 Followers 嘅數目都迫近5,000 ，喺冇乜點「大灑金錢」，只係用過往嘅老本 (包括《職場心經》同埋幫手看舖嘅《不負責任金融研究中心》) 幫手推下 post 咁，以一個悶出個鳥來嘅 Page ，我覺得算係咁。

星期五係繁忙嘅一日。撇除正職嘅工作，市場上出現嘅裙拉褲甩，都足夠我大書特書洋洋灑灑幾千字。不過呢個時勢，大家都冇太多耐性睇你用二千字或以上去講經，要 punchy and crunchy 咁講到重點，最好 500 至 1,000 字以內 。但屌你啦，有啲概念真係要花多少少篇幅交代㗎嘛，咁所以，都總係長咗少少。對唔撚住。

矚目嘅係新上市嘅科技指數 ETF ，蝦碌嘅係開市前競價時段有買家用超出正常價格一倍幾近兩倍入貨，然後眨下眼市價回復常態，名副其實轉個手就唔見咗六成有多。
旁人輸錢事少 (每日都有贏有輸㗎啦) ，有所謂財金 KOL 以科幻式小說方式，講到莊家出神入化玩弄散戶於股掌之中，而忽略市場規則本身其實唔係咁樣運作，誤導無知婦孺 (或莽夫) ，先至令人氣頂。

如果凡事訴諸愚昧、無知、不可知或者運氣、緣份、莊家等不抗力，其實市場本身毋須有監管機構睇場，更加唔需要學習供求理論。反正一個招牌責落嚟求其都扑中兩三打，大家讀書求學問把撚咩。一命二運三風水，四積陰德五讀書，咁信命運，大可以連 DSE 都唔撚使考嘅。反正閣下骨格精奇、潛龍勿用，唔讀書唔識字都會創一番事業， right ？

唔係咁樣。

至少，香港股市目前都仲有監管機構𥄫實，交易所亦定下規則去規範參與者嘅舉動。一隻 ETF 有獨家承銷商係創新，但莊家提供流通量嘅要求，從來都係喺交易時段之內，並不涵蓋競價時段。莊家維持市場秩序，亦有限於買賣盤差價唔可以太闊。若然有賣家存心吊高嚟賣，又有傻仔買家掛高啲博追貨，莊家真係冇義務㩒低個價去同 NAV 貼近返。呢啲資訊完全公開，只要肯查下交易規則就可以。

但凡人太忙，財金 KOL 更忙，所以，訴諸莊家舞高弄低，順便嘩眾取寵，以輿情吸 click 吸 like ，咁又過好一日，聽日一定更好天嘅啫，係咪呀哈姆太郎？姆你老母啦。愚民就係由此產生嘅。

要投資，先求知。呢句口號或者真係好娘，但無知入市場，就真係聽畀大鱷、莊家以及其他有識之士宰割或魚肉。規佬不求名成利就 (因為知道冇咁嘅能力) ，但係累積咗多少撞板嘅經驗，加上喺行內浸淫咗一段時間，關於市場生態、關於遊戲規則，都略知一二。

如果可以將所知所學所想透過文字分享，而一百個讀者入面又有三、五、七個有所得著，我覺得，都算係功德。至少，平白交咗出去嘅學費 (你理得我係喺股市輸錢定係讀 Master 吖) ，總算喺第二啲地方賺返，我覺得 okay 。呢個係規佬分享見聞同觀點嘅初衷。會唔會因此而得罪人或者錯失一啲代言機會？唔係重點啦，做人嘅嘢，得一唔好想二，專心致志做好一件事，已經係一個成就。

3033 恒生科技指數 ETF 嘅慘劇，日後仍然會發生，因為歷史總係不斷重複。我希望睇過我嘅文字嘅朋友，唔好置身其中，就好。能夠將我講嘅再轉述畀其他人聽，提示其他人唔好重複犯錯，已經係 bonus 。

祝大家有個愉快嘅週末，有咩留返下星期一返工再講。