之前講過，規佬為咗體驗虛擬銀行 (VB) 嘅產品同服務，身體力行開晒幾間已經開業嘅 VB 戶口，試完佢哋嘅全線上開戶流程體驗，而家就輪到第一件可以攞上手嘅產品： Debit Card 喇。
Debit Card (扣帳卡，或者消費卡) 喺香港唔算普及，或者因為信用卡 (Credit Card) 嘅消費優惠太吸引，同埋香港人本身都用慣 EPS ，冇乜特別誘因專登開張 Debit Card 嚟用。
不過，由於 VB 介面只限手機 App ，除非你好享受次次都打開個 App 搵個 QR Code 出嚟畀收銀嘟 (仲可能因為需時太耐而畀排緊隊嘅其他人嘟) ，否則， Debit Card 作為 VB 嘅輔助產品，其實係鼓勵到消費者用 VB 戶口作交易用途嘅。喺七月底開業嘅 WeLab Bank (匯立銀行) 反應熱烈，「生意好到做唔切」，加上疫情關係郵件派遞時間可能長咗少少，規佬都要去到八月中旬先至收到張卡。
一打開信箱，攞出嚟就見到一個紫色嘅方型紙盒， label 右下方寫明係 2020 年 7 月底寄出，算有條理。
紙盒材料係皮紋硬卡紙，摸落都舒服，而且感覺上係有誠意，唔係求鬼其搵個普通白信封，攝張信紙黐埋張卡冷冰冰咁畀你。都睇得出 WeLab 有心畀大家一個良好嘅 first impression 。
打開信封，入面係一本書仔，書脊上面有句 tagline ，文法嘅嘢我就唔評論喇。至少都唔會覺得 odd 嘅。
攞本書仔出嚟，正中央係 WeLab 嘅標誌，少少凹凸感咁啦。
打開本書，左邊係幾頁五顏六色嘅揭頁，右邊係張 Debit Card ，可以見到無論到字體到行文都相當之親切，指示都相當之清晰。睇埋本書先，陣間介紹下張卡。
一開嚟，首先係關於張卡嘅介紹，如果大家本身唔係好知自己申請咗張乜嘢返嚟，呢度啲 FAQ 應該都幫到手。
跟住嗰兩版都係公司團隊嘅分享，背景應該係公司辦公室 pantry 啦我估。感覺都係盡量想貼地同 trendy 。換轉其他機構，可能會見到主席或者 CEO 的話之類，你一見就就會想飛嘅內容⋯⋯
到主角出場喇：打直倒嘅 Debit Card ，頂頭有 FOUNDING MEMBER 字樣，唔知幾時之後申請嘅朋友先至冇啦。右邊嘅晶片同圖案，分別話畀大家知，呢張卡插又得，嘟又得。
張卡中間係有戶主姓名嘅，當係有個識認咁啦。最底有銀行同 MasterCard 標誌，只要 card reader 支援 Master 就用得。
外貌嚟講，其實幻彩係幾 fancy 嘅，但係我唔肯定張卡嘅質地係咪會好襟磨，擺咗喺卡套幾日已經有啲皺紋咁⋯⋯
睇埋卡背，一樣都係幻彩，有磁帶同銀通標誌，即係喺銀通櫃員機可以㩒錢咯。至於簽名位⋯⋯係囉，如果你食飯畀侍應碌呢張卡，佢可能都要對一對你個簽名，啩？但因為我主要會用嚟做 touchless payment ，買下早餐或者酒精，所以呢件事對我就唔太重要咯。
跟住落嚟，再講下使用呢張 Debit Card 嘅體驗。
其實同平時大家攞張信用卡用 PayWave 畀錢嘅原理差唔多，都係行埋去終端機然後按指示拍卡，扣數，禮成。
不過 WeLab 就會分別 send email 同 SMS 畀你，提示你已經進行咗筆交易。奇怪嘅係， App 反而冇 push notification 喎。入返 App 度睇，即日扣數嘅交易，會喺 pending transaction 一欄，應該都要等 day-end 結算之後先派彩作實。
規佬人生第一篇開箱文就咁畀咗 WeLab 喇，仲要係冇收廣告費嘅。希望大家覺得呢篇文章幫到手啦。想睇更多規佬嘅文章，記得 subscribe Patreon 。
