香港本地比賽取消完一個又一個，劍會停完再停，大家都好熟悉嘅日本，即使疫情依然嚴重，無阻佢哋舉辦比賽，早前更喺東京駒沢公園順利完成全國分齡賽。恨打比賽的大家，很想要吧？
除咗普通正常比賽之外，日本劍總由12月初舉行「Sunday Cup」，即係日本國家隊隊內賽，不過係一場過嘅形式，增強隊中增強緊張感，疫情下盡能力保住一眾隊員狀態。即使係隊內賽，都貫徹日本一貫盡善盡美嘅精神，配合埋YouTube直播、現場燈光及評述等，規模拍得住大賽嘅水準。
因為「Sunday Cup」搞得有聲有色，所以日本劍總決定添食，搞完一次又一次，剛過去嘅星期日舉行第三彈，更首次有輪椅劍擊登場，錯過咗都唔緊要，可以隨時上YouTube重溫返。
當大家睇比賽嘅時候，有無留意到分牌劍手名上面，零零舍舍有個機構名喺上面，如果睇晒幾日「Sunday Cup」，會發現唔少劍會（Nexus Fencing Club）、各地大學（例如法政大學／中央大學）、高校（例如龍谷大令屬平安高校）。
咪住先，除咗呢啲之外，仲有企業名，打個比喻，就好似重劍世界排名第二嘅山田優係「自衛隊體育學校」，佢隊友加納虹輝就係大家都好熟嘅「日本航空」，花劍選手松山恭助就係買JR飛會用到嘅「JTB」，佩劍手島村智博就係「警視廳」，唔通佢哋係警察同飛機師？
自衛隊、日本航空等大家熟悉嘅名字，經常出現喺日本比賽。（影片截圖）
如果大家去過外國比賽，唔少賽事都會標返劍手所屬嘅劍會，咁唔通日本警察又有個劍會，連日本航空都有個劍會？非也，原來係日本獨有嘅「企業體育文化」。
首先要了解一下日本點樣培育運動員，當然係分開「青訓」同「精英訓練」兩個層次，根據日本體育廳嘅資料，青訓必定透過各地學校，慢慢培養部分有潛質運動員，當佢哋長大成人之後，培訓責任就落在大學及企業，從而訓練代表縣，一步一步拾級而上，向代表日本國家隊進發。
早前上演嘅第73回全日本大賽男子重劍，幾多唔同機構。（日本劍總官網截圖）
大家都留意到，「企業」都培養精英運動員嘅其中一個地方，究竟係咩一回事呢？自明治維新年代（1868年），西方體育逐漸傳入日本，當年企業深明「日日運動身體好」嘅道理，推動大家做多啲運動，既可以為員工健康著想，又可以建立團隊精神，一舉幾得。
踏入大正時代（1912-1926年），「職場運動」呢個文化慢慢進化，由強身健體變成有競技味道，唔少企業創立自己球隊，主要以棒球隊為主，二戰之後更有全日本企業棒球賽。由1950年代起，企業運動發展愈來愈蓬勃，汽車及電子等工業亦加入行列，加上1964東京奧運熱潮推動下，企業體育文化接近推上高峰，呢鼓企業運動風氣維持接近30年。
日本泡沫經濟90年代初爆破，唔少企業為開源節流，必要「Cut畢直」，旗下體育隊伍當然成為被斬對象，經過經濟危機後，日本企業改個方法支持體育，以贊助取代擁有。
例如「Nexus Fencing Club」顧名思議就係一支職業隊，劍手就係受僱員工，確保有潛質嘅日本劍手可以專心訓練。上文提及嘅「日本航空」有一個「支持未來體育世界」嘅計劃，仲可以捐贈與里數相等嘅金錢，江村美咲及永野雄大都係日航旗下劍手。松山恭助就唔係旅行社JTB嘅一員，而係JTB贊助嘅運動員之一。
