我陪查某孫看我的查某囝揀的，佇電視機放出來，網路內底的節目，有一个叫做＜瑪莎與熊＞。內底的角色，除了瑪莎這个差不多幼稚園大的查某囡仔，佮一半擺仔出現，伊的雙生仔阿姊，其他攏是動物，袂曉講話，熊嘛無講話，毋過聽捌瑪莎講的，嘛知影其他的人（動物）的意思。
看出現的字，應該是俄羅斯的節目，有翻譯做華語。
瑪莎誠手銃，逐擺攏創治熊，熊對伊真好，攏替伊拭尻川、收尾。一開始，我佇臆熊是公的抑是母的？伊會曉用針車車衫，會曉做雞卵糕、煮食，嘛會曉修理厝頂、跤踏車佮奶母車的輪仔，逐項代誌攏會曉。
看幾若擺了後，我才知影熊是公的，生活中的逐項代誌攏會曉做，予我誠佩服，毋是一個查埔人身軀邊攏愛綴一个查某人做厝內面的工課。
這个節目猶閣有一項代誌是查冊，看冊。拄著啥物代誌，第一个動作是佇冊架仔頂面提冊來查，包括朋友來，欲同齊煮物仔來食嘛是先揣冊，彼本冊的冊名，字幕寫：「中華料理」，in決定做扁食，綴冊頂寫的一步一步做。
我進前看寫古早華文的冊，內底寫的，真少有拄著生活中的代誌，揣冊來查的動作，有講著冊，攏是彼款誠大的代誌，比如講：治國、平天下，抑無就是讀冊人講大道理的學問，熊的這个動作予我誠感動。我咧臆，古早人拄著袂曉、毋捌的代誌，第一个方法是去問人，問較有經驗，較有歲的人，抑無家己鳥白舞，愛毋著真濟擺，才會當解決問題。
（2023.11.8.）
