紅魔鬼賽後評 足總盃 曼聯 4-3 利物浦 (17-3-2024)
紅魔鬼賽後評
足總盃 曼聯 4-3 利物浦 (17-3-2024)
1. 首先第一個感想係…What a game！
2. 先講下開賽前我對呢場波既期望。利物浦唔駛問係今季英超三大頭馬之一，實力當然係毫無疑問係強喇，近況仲非常唔錯。不過同上次英超對曼城唔同，上次我其實開波之前已經覺得係絕望，一來上次對手接近full team而我哋就傷兵滿營，二來上次我哋係作客，所以真係抱住一個輸少當贏既心態，但今次一來我哋主場，二來大家兩面都係好多人受咗傷，所以我賽前我雖然係預期都係輸波既機會係大啲，但都會幻想下有冇機會偷雞成功，上次作客都曼城真係諗都唔敢諗。
3. 話雖如此，但英國時間開波前一晚先爆出卡斯米路因傷退出巴西國家隊，呢一個影響我覺得都幾大。雖然卡斯米路唔及上季表現出色，甚至有好幾次落腳唔準同傳波斷纜既情況發生，但佢缺陣既時候，曼聯經常性會輸一啲比對手既球員後上插入禁區空晒或者禁區頂冇人看管之下任射既失波，響佢復出之下，呢類型既失波係大為減少，所以我依然會認為佢仲係曼聯陣中最重要既一員，而事實上今場其中兩個失波都係輸呢啲類似既套路。最慘係佢前一日先傷，即係好有可能突然打亂晒成個禮拜既戰術演，而對上一次發生咁既事，係賀龍受傷而第二日對富咸就輸波。
4. 不過呢啲情況，真係隊隊都會有機會發生，真係發生咗既，咪頂硬上囉，冇計架喎。而且今次都叫有返隻閘同正中鋒用，雖然都係右閘打左面，但至少唔係中堅打左，而中鋒有賀龍復出，點都好過用福仔或者麥湯般奴做假9。反而最後卡斯米路真係連後備名單都冇，亦都唔知佢會傷幾耐，情況都幾令人擔心，呢樣先令人擔心。
5. 睇返出場陣容應該係麥湯文尼代替咗卡斯米路正選登場，馬後炮咁講︰因禍得福又好、佢既後上能力勝過卡斯米路，雖然佢既防守能力同意識真係冇卡斯米路咁好，但今場佢一個入球一個助攻，絕對係最後能夠反敗為勝既關鍵人物之一。
6. 一開波曼聯既氣勢係幾好，華舒福禁區邊拉個遠柱波比基拿靴救出，而利物浦果面都有沙拿既近射遠柱出界。不過入波先既係曼聯，加拿祖壓入禁區左面勁射，基拿靴救到再比麥湯執隻靚雞，曼聯領先一比零。
7. 承如坦克所言，曼聯響頭30分鐘甚至我覺得係去到40分鐘都係表現較好既一隊，但佢哋都係老問題，就係把握力真係幾差，如果三十幾分鐘既時候麥湯果球禁區入面無人看管下既勁射唔係直接射落人哋龍門身上既，加埋補時在內最尾果十分鐘會唔會比人撳住黎砌都唔知。
8. 足球就係咁，你唔入就到對面入，遠藤航既越位入球已經敲響咗警號，結果44分鐘，麥阿里士打響禁區入面無人看管射中文奴改變方向彈入，比利物浦追成一比一。我第3段所講既就係呢啲波，唔係話曼聯冇防中，但佢哋既眼光有時唔係好夠廣闊，就好似呢球，文奴電光火石下企得太入，完全漏咗中間既麥阿里士打。
9. 之後又係般奴出事，唔係想屌柒佢，但今季佢都唔第一次響呢啲位左閘位比人搶到波再射入，而睇返慢鏡，VAR同球證都係正確既判斷，呢下真係冇犯規，而奧拿拿其實已經好好反應救到紐尼斯第一下射門，但係沙拿空晒，呢隻靚雞唔入都唔得喇。
10. 下半場出返黎仲大鑊，利物浦領先一球都唔同你急，響度慢慢拖慢慢猜，間中先突前做幾下攻勢，不過幾下射門其實都做得唔算太好，奧拿拿都全部救到晒。
11. 高普響七十幾分鐘開始換人，其中換走沙拿換入加普都幾耐人尋味，沙拿堪稱係曼聯既剋星，而換入黎既加普我睇就遠遠唔及沙拿有威脅。而另一方面，坦克亦都相繼作出換人調動，啱啱傷癒既兩位球員賀龍同埋雲比沙卡退下火線，由安東尼同埋麥佳亞入替，而再之後再由艾歷臣入替今場有不俗表現既文奴、戴亞路入替華拉尼。
12. 其實當坦克換走文奴既時候，我係有少少質疑，一來佢今場其實踢得唔錯，二來艾歷臣上次對富咸就算唔係災難級但都談唔上好，結果艾歷臣就一拳打落我塊面度，唔知係咪利物浦今日條中場線純粹講硬碰硬黎講冇富咸果次咁純粹單靠埋身肉搏，艾歷臣落場之後控制節奏都做得非常唔錯，包括臨完場果球直線令到福仔爭啲做英雄，當然都有踢得唔太好既地方，但總括而言已經算幾好。
13. 下半場一直冇乜攻勢，甚至連波都搶唔到既曼聯大軍壓前，造就兩次利物浦五打二既攻勢，好彩佢哋都把握唔到，果頭你哋唔入，就輪到安東尼做英雄，響下半場僅有幾個攻勢既情況下，一次反擊，安東尼接應加拿祖左面傳送，一個對三個都比佢自轉搵到空位，用右腳射個靚波入網，為曼聯追成平手。
14. 扳平既曼聯突然間食撚咗春藥咁氣勢如洪，如果唔係福仔臨完場敗家，單刀殺入禁區射咗出界，已經可以響九十分鐘內解決對手。
15. 加時既曼聯繼續承接住下半場既氣勢，福仔唔止一次單刀但都射失晒。劣勢中既利物浦憑一次界外球攻勢﹐輾轉下落咗艾利洛腳下，艾歷臣同文奴第一球一樣，又係收得太入，比艾利洛禁區頂空晒睇定起腳，而艾歷臣都同文奴一樣飛剷埋去，又係一樣省中自己改變方向彈入，利物浦劣勢下又一次領先。
16. 仆街嘞…我心諗…今季呢隊曼聯踢逆境波係好差，我甚至已經打定輸數。不過好彩曼聯班球員唔係好似我咁諗，坦克落後之下變既陣都好進取，般奴同安東尼響加時分別打中堅同左閘，麥佳亞身為唯一一個正中堅都頻頻上前助攻，不過淘汰賽就係要呢啲決心，而呢種決心都帶黎回報。
17. 首先係Amad截到紐尼斯傳波，再送至麥湯文尼，佢再比個直線，射咗無數次單刀既福仔，今次終於不負所託，追返三比三。及後佢響反擊之中仲有多一次傳送，爭啲投桃報李助攻麥湯文尼，可惜後者剷射僅僅柱邊出界。
18. 其實換咗唔少人入黎既利物浦都想贏，所以最後角球攻勢佢哋大軍壓境，但就造就Amad截到波傳比加拿祖再狂奔全場，佢兩個二打一最後由Amad接應加拿祖既傳送射入一球角度超級靚既地波入網，射入致勝一球。Amad仲得意忘形除衫慶祝添。
19. 公海足球page有人揶揄曼聯呢場勝仗係足總盃爆冷溫床其中一個賽果，我唔否認喎。老實講，事實係我哋本身呢一刻就算full team都好，都係完全仲未接近到曼城、利物浦同阿仙奴既水平，唔係妄自菲薄，而係有自知之明，今場如果唔係將士用命，主場打出氣勢，加上對手最近都有唔少傷兵，其實都幾難偷雞。
20. 但，a win is a win！我哋夠傷得多人咯！打和，super！冇嘢爽得過補時絕殺利物浦架嘞！
21. 你話曼聯打得好唔好，我會話其實上半場頭40分鐘同下半場扳平之後真係打得唔錯，但下半場有一大段時間係波都唔係點搶到，果段時間其實都幾絕望。不過比較利物浦既攻門，其實我覺得場上所創造出黎既機會既銳利度，曼聯其實係高啲，所以你話贏波合唔合理，其實都合理既；而高普太快收走沙拿換入加普，我覺得都係另一個關鍵，我冇識波牌，唔敢話加普有冇作用，但我覺得沙拿就算企響度，果種氣場都有威脅過加普。
22. 曼聯晉級四強之後會響4月20號響溫布萊球場對住高雲地利，而4月7號都會有另一場雙紅會舉行，如果到時利物浦既傷兵可以復出既話，咁到時絕對會比呢場更加惡踢…
23. 最後真係真係難得有傷兵復出，希望曼聯唔好再有人傷喇…佢哋神奇在今季好少係比人踢傷，更多既練波時唔知做乜整親，而且總係一有人復出又即刻有人傷…所以我先懷疑佢哋係拎住個士巴拿響卡靈頓練習羣毆…
#不專業足球筆記 #足球專欄 #專欄 #我愛紅魔鬼 #足總盃
#紅魔鬼賽後評 #MUNLIV #曼聯 #利物浦 #足球 #賽後評
#英超賽後評 #英超 #足總盃賽後評
更多專欄內容︰ https://www.leafopenleafopen.com/unprofessional9up
廣告時間 -
ig: leafopen3
instagram.com/leafopen3
fb: leafopenleafopen
facebook.com/leafopenleafopen
方格子︰ https://vocus.cc/salon/leafopenleafopen
如果有興趣睇下我既其他寫作作品，可以上 leafopenleafopen.com 或者 https://www.penana.com/user/52938/%E8%91%89%E9%96%8B%E8%91%89%E9%96%8B
如果覺得我寫嘢OK想請我飲杯咖啡支持下我既，可以上 https://www.penana.com/membership_plan?id=52938 或者 https://m.penana.com/stream?id=52938
