伊的身軀是查埔，伊認為伊是查某；人看伊是查某，毋過伊講伊是查埔。通常in佇細漢的時陣家己就知影，攏講是幼稚園的時，遮仔人叫做「跨性別」。
逐家看in感覺誠怪，毋過這毋是in願意按呢的，in的一世人行甲足艱苦的。逐工目睭擘金，出門就有問題（厝內面的人無接受的，踏出房間門就有問題），伊放尿嘛去查某的便所，抑是查埔的？排隊愛排查埔彼爿，抑是查某的？人欲叫伊「先生」，抑是「小姐」？
每一个人的做法無仝，以身軀是查埔，心內是查某的跨女來講，可能：
￭藏佇家己的心內，連厝內面的人嘛無講，穿插佮所做的代誌假做佮伊的外表（性別是查埔）仝款；
￭厝內面的人知影，可能佇厝內會穿伊想欲穿的查某衫，出外就穿佮伊的性別仝款的查埔衫；
￭規工攏穿查某衫，做查某的打扮，按呢佇誠濟位會有問題，尤其愛看身分證的所在，譬喻：去病院診所看病的時、報名、坐飛行機等等，會予人懷疑、檢查、問東問西，想講是無仝人。
￭食荷爾蒙，跨女的人食女性荷爾蒙，有朋友講，會使減少心內的「性別不安」。
￭想欲規个變過來，改身分證頂懸的性別，按呢愛做真濟代誌。去看醫生，有醫生的證明，食荷爾蒙，經過規定的時間，手術，這馬台灣的規定是愛共身軀的性器官手術掉，叫「性別重置手術」，有的人會閣做伊想欲做的性器官，跨女做陰道，跨男做𡳞鳥（陰莖）等等。後壁這個手術有人無做。只要原來的性器官提掉，就會使去申請改變性別，換身分證，用新的身分過日子。
換了身分證毋是無代誌矣！愛學真濟查某（查埔）的穿插打扮，想法、做法，有的人去做聲音講話的練習，只是聲音較僫改變，按怎佮仝性別、無仝性別的人鬥陣……，一世人攏愛吃荷爾蒙。
伊變作查某了後，愛查埔抑是查某？是無一定的，愛問伊家己。
手術過的人講足痛，愛開誠濟錢，了誠濟時間，毋是每一个人攏做會到。
我有朋友，伊的後生是跨女，打扮做查某，用查某的身分過日子，嘛有一个做伙生活的伴侶，仝款是跨女，伊不准伊的後生去手術，講按呢過日子就好。
世間有真濟佮「逐家」無仝款的人，以前攏藏起來，干焦較熟的人知影伊佮人無仝款，毋知影為啥物會按呢？（到這馬嘛猶無知影原因）愛按怎對待伊？予人笑、罵、蹧躂是遮仔跨性別者定定拄著的代誌，規个人生就是悲慘濟寡。
台灣這一、二十年風氣較開放，沓沓仔有人替in講話，有社團、組織佇服務in，有所在有人同齊做伴，跨性別者家已嘛會出來講話，予逐家較理解in，逐家好好仔鬥陣。In無偷無搶，好好仔做工課，納稅金，只是性別仝伊原本的身軀無仝款爾爾，攏是一个人，每一个人攏有伊的聰明智慧，會使貢獻社會，過較好的日子。
佇台灣誠有名的跨女是唐鳳，利菁嘛是。
這篇是我10年前訪談一个跨女，後尾的延伸閱讀猶有幾若篇，有幾若篇是我訪談，寫的。
https://bongchhi.frontier.org.tw/archives/29222
