不專業足球筆記（二十）︰爭議不斷港足CEO突離職 香港U23散班下季唔玩
不專業足球筆記（二十）︰爭議不斷港足CEO突離職 香港U23散班下季唔玩
1. 今個星期最爆既消息，莫過於5月22號星期三晚突然爆出香港足總行政總裁譚秋朗即日離職！
2. 根據體路既報導，呢個決定響足總董事局開會之後決定既，而足總響夜晚大約十點左右，亦都正式宣佈「接納譚秋朗呈辭，其聘用條款將於本年8月下旬終結，CEO一職即日起由副總幹事兼裁判總監張炎有署任」。
3. 究竟譚秋朗係咪比人炒魷呢？呢個真係唔知，體路既報導都幾生動，我哋不妨睇睇佢哋點寫︰「希望能夠採訪譚秋朗，讓他澄清一下「被炒」傳聞，以免外間太過於一面之詞，也有多一個角度看待今次事件。豈料譚秋朗收到保安通風報訊後，下令驅趕記者，要求走到後門大閘之外，然後自己則在前門截的士。當記者飛奔到前門後，他便立即跳上坐駕，在後門絕塵而去。素來知道譚秋朗為劍擊運動出身，估不到其假身功力仍在。」
4. 真係形容得非常風趣幽默。
5. 講起呢個譚秋朗，其實佢由2021年5月上任開始，已經爆過唔少有爭議既新聞，有傳好多球圈人士都頂佢唔順，響佢任職期間，好多資深員工好似總幹事袁文川(呢個我好似真係好耐之前已經聽過呢個名)、近冒升好快既競賽部主管葉冠求等等。唔止資深員工，連基層既員工都走咗一半，今季季前仲傳聞因為唔夠人，要到港超開波前一星期先訂到賽程。對於呢個傳聞，譚秋朗當時回應係話康文署比唔到場喎，到底邊個版本先真，我諗真係得足總內部既員工知嘞。
6. 唔止咁樣，有留意香港波既都應該會聽過有段新聞，就係本來支持佢上任CEO一職既前董事曾王琬琪同佢反咗面，仲寄咗啲溪錢、紙紮物品、動物殘肢既包裹恐嚇佢；另外佢都試過比人力資源部前女主管指控性別及殘疾歧視，認真是非同官非都唔少。
7. 當然喇，呢啲內部既事務，真係聽咗就算，但有啲嘢係外人都有眼去睇，今年年初，香港隊相隔54年再次歷史性打入亞洲盃決賽，無論係對球迷定係球員黎講，都可謂意義重大，條友去都冇去，可想而知佢究竟有幾重視呢項賽事。本身並非球壇中人既佢，究竟知唔知入到亞洲盃決賽周對香港球壇既意義？
8. 不過譚秋朗都幾識寫CV，佢響Linkedln吹到自己帶領香港隊入到亞洲盃決賽周，講到係自己既功勞咁，屌你寫CV果陣又講到好偉大成就咁喎，咁你唔隨隊去打氣？一場都冇啊！我響英國識個香港人讀緊書有堂走唔到，真係趁中間得一日gap即日來回都飛去卡塔爾撐場，你唔好話你少少時間都抽唔到出黎啊？
9. 講完譚秋朗，我哋講下港超聯。之前幾集曾經提到，香港U23繼續征戰下季成疑，結果呢個禮拜就直接宣佈下季唔玩了。
10. 本身香港U23都算係疫情之下冇人投資足球、有球隊退出之下而成立既產物，係個三年計劃，以23歲既年青球員為主，有「註5出3」超齡球員限制，以培養年青球員為主要目的。
11. 其實呢隊波既意念都幾唔錯，可以增加年青球員既機會，好似新加坡既幼獅咁都係有類似既使命。不過可惜全部都係本土後生仔又冇外援帶住，加上啲有潛質同實力既後生仔啲大會都唔會放人，所以呢隊香港U23實力唔高，響其他球隊都有外援，技術同身材都佔有優勢既情況下，場場比人四、五、六，一季失過百球係等閒事。
12. 早前講過既U23門將雲天樂，就話過其實呢啲打擊對球隊既影響，遠比外界睇到既仲要深遠。
13. 不過今季佢哋都真係有代表作，對住晉峰同埋均業北區既勝仗，為球會取得創立以黎既唯二兩場聯賽既勝仗，某程度而言，都叫做為呢間球會畫上一個完美既句號。
14. 我本身真係幾buy培養年青球員呢個idea，我覺得要做既唔係摺埋呢隊波，而係搵幾個有實力既外援、本土老大哥帶下班後生仔，而家就咁摺咗都真係幾可惜吓。
15. 據報香港U23既主教練司徒文俊而家就幫緊班球員手，睇下有冇球會可以接收班球員。其實睇雲天樂上次篇文，感覺得到好多球員都係帶住一個夢想加盟香港U23，唔好咁快要佢哋夢醒，好嗎？
16. 最後嘞，港超經過最後一週既比賽終於完滿結束，褪色天王山之戰，理文以三比二擊敗傑志，令同日贏波既大埔同東方都爬過傑志頭分列第二同第三，傑志只得梗頸四，都可謂係最意想不到既排名，季初諗住傑志同理文一定係冠、亞軍既膽，點知傑志失準得咁勁…
更多專欄內容︰ https://www.leafopenleafopen.com/unprofessional9up
更多小說內容︰ https://www.penana.com/user/52938/%E8%91%89%E9%96%8B%E8%91%89%E9%96%8B/portfolio
#不專業足球筆記 #專欄 #足球專欄 #足球 #港超聯 #冠軍 #港超冠軍
#傑志 #理文 #晉峰 #標準流浪 #譚秋朗 #足總 #香港足總CEO #CEO
#香港U23 #均業北區 #散班 #雲天樂 #東方 #大埔
廣告時間 -
ig: leafopen3
instagram.com/leafopen3
fb: leafopenleafopen
facebook.com/leafopenleafopen
方格子︰ https://vocus.cc/salon/leafopenleafopen
如果有興趣睇下我既其他寫作作品，可以上 leafopenleafopen.com 或者 https://www.penana.com/user/52938/%E8%91%89%E9%96%8B%E8%91%89%E9%96%8B
如果覺得我寫嘢OK想請我飲杯咖啡支持下我既，可以上 https://www.penana.com/membership_plan?id=52938 或者 https://m.penana.com/stream?id=52938
