2025.2.3.
＜客運車頂的位＞
「逐家攏有位，你坐後壁。」
彼个少年人無講話，想欲行去後壁。
我講：「我２號，恁去坐家己的位。我若凊彩坐，連鞭閣予人趕。」彼个少年人跤擋咧，徛佇遐。
查埔人無振動，講：「我的位佇佗位？」我講：「你的票頂懸有號碼。」
𪜶（in）２个翁仔某才沓沓仔徛起來，彼个查埔人喙內那唸：「15號佮16號。」等𪜶（in）出來，彼个少年人先入去，伊１號，我２號是外口這位。
可能有人會講：「看𪜶（in）較濟歲，讓𪜶坐。」車頂若空空，人誠少，是無要緊，我凊彩坐一位，彼幫車，人滇滇，我家己有位，是按怎欲去凊彩坐，閣予人趕？
伊是貧惰去揣位，凊彩坐，想講人會讓予𪜶（in）坐？抑是毋知影有拆票、走高速公路的車愛照號碼坐？若是毋知影，換位一擺就知影矣！
註：沓沓仔（ta̍uh-ta̍uh-á ）—慢慢地
— — —
＜長尾山娘＞
今仔日早起，我行忠孝路一巷，欲到跑馬古道，較崎的上崎樹林仔內，看到一隻長尾山娘佇頭殼頂飛過去，２隻、３隻，幾偌隻，尾溜長長，佇樹枝仔頂懸跳來跳去。
這種台灣特有的鳥仔，這幾若年來（嘛有三、四十年矣！）保育成功，真濟所在攏有𪜶（in）的形影，誠好。
註：
￭崎（kiā ）—斜坡。 陡峭。
￭上崎（tsiūnn-kiā ）—上坡
￭長尾山娘（tn̂g-bué-suann-niû）—台灣藍鵲。咧春天的時，𪜶（in）為了保謢拄拄仔出世的細隻鳥仔，會攻擊經過的人（頭殼），只要戴帽仔，緊咧行過去就好。
— — —
＜管仔粿＞
原來紅豆餅、車輪餅台語叫
管仔粿（kóng-á-kué/kóng-á-ké）
佇礁溪轉運站內底賣管仔粿的攤仔，有賣的時，足芳的，牛奶油的味，誠想欲燒燒食一塊，毋過甜的佮澱粉的物仔我愛控制，尤其毋是食飯時間，無先食肉佮菜，直接食澱粉的點心是無好的代誌。一半擺仔，腹肚枵，去買一塊，食半塊。
以早，我毋捌聽過「紅豆餅」的講法，有囡仔了後才知影，阮老母講日語的，略約仔的音是 Thái ko bán jiú，有人聽過無？
￭〈台灣好料理〉實景版 MV
查辭典，https://sutian.moe.edu.tw/zh-hant/
