舊年（係… 舊年既遊記拖到而家><）抓住暑假既尾巴去左獅城4日，最主要係想去虎豹別墅萬金油花園&地獄博物館，然後plan plan下就加左好_多景點，行到腳痛。去旅行，會想睇多點當地的文化、歷史、藝術、社區發展，當然唔少得食好野啦，所以每次都搞到好chur… 然後鬧自己下次唔好咁chur啦…
N年前第一次去時已經去過主要景點Merlion, Clarke Quay, Gardens By The Bay, Cloud Forest, Haji Lane, China Town, Arab Street, 城市規劃展覽館，仲住過組屋（多得朋友安排）。相隔十年再去，但去完之後都覺得未完全發掘曬呢個「花園城市」，4日3夜只係岩岩好做曬想做既野，仲想去多次，不過下次真係唔會再咁自chur，要慢遊！（聽住先🤣）
小標題：1) 虎豹別墅萬金油花園（免費）& 地獄博物館（需付費）
2) Frida Kahlo: The Life of An Icon墨西哥知名藝術家兼女權先鋒沉浸式傳記展覽 @ 藝術科學博物館
3) Asia Best 50 Bars: Nutmeg & Clove, 28 Hongkong Street
4) 小印度兩小時社區導賞 by Uncle Chris Walking Tours（大推）
5) 新派娘惹菜 National Kitchen by Violet Oon @ National Gallery
6) 新加坡讚美廣場（CHIJMES）19世紀新歌德式建築群兼Crazy Rich Asians超豪華婚禮現場
7) Bacha Coffee @ 濱海灣金沙酒店商場
8) Jewel航天城
9) 亞歷山大熟食中心的德普路真善美砂鍋laksa
10) National History Museum
11) 非旅遊景點：令人驚嘆既不規則設計住宅建築頂目The Interlace
________________________________________
1) 虎豹別墅萬金油花園（免費）& 地獄博物館（付費）
虎彪別墅既香港版✅️同新加坡版✅️終於去齊了🥹
※不能共存既雙生花※
已故萬金油大王胡文虎、胡文豹兄弟於星港兩地既虎豹別墅＆萬金油花園捱過第二次世界大戰既戰火，但最後仍難逃城市發展被拆卸，就好似雙生花咁唔能夠同時共存。
- 港版現時只剩下4層別墅，政府發展局暫託中；最為人熟知既萬金油花園，包括地獄十王殿場景 & 七層高虎塔已經係2004年拆卸，因為胡文虎既女兒胡仙賣地俾長實起豪宅。（事實上，當年財困既胡仙係1999年已將佢父親創辦既《星島日報》股權賣俾私募基金）。
- 新加坡既別墅係二戰後荒廢，其後被拆卸，故現時只能係萬金油花園入口既小食部裡睇返建築模型；剩返既萬金油花園，根據Wiki資料，1990–98年間一間私人公司以新幣8,000萬買入，將花園改建成收費主題樂園，曾經係四大觀光熱點之一。現在既萬金油花園已風光不再，遊人疏落一片冷清… 樂園98年關閉後交還俾新加坡旅遊局，免費入場，但花園裡的「鬼門關」與新建既地獄博物館則需要付入場費（SGD20 = 約HKD120）。按參觀路線，訪客先逛地獄博物館瀏覽世界各地同宗教對於死亡既唔同觀念同人們哀悼既方式，走出地獄博物館後便到「鬼門關」，就是傳說中既地獄審判場景。由於訪客不多，故走進裡面令人感到異常陰森恐怖涼颯颯咁，照片都咩點影快快睇完就走🥶🥶。
左上係地獄博物館入口；博物館旁的紀念品店既商品都無咩特別，無購買意欲:P 右一(上)係唐三藏係盤絲洞俾蜘蛛精誘惑，都真係整得幾趣緻
真心覺得新加坡&香港既虎豹別墅／萬金油花園呢兩個歷史文化古蹟，係好能夠反映星港戰前早期華人既足跡 — — 當時既華裔生意人懂得兩文三語，看準星港兩地經商潛力，白手興家；另外亦反映兩地社會、旅遊事業發展，仲有兩地政府對古蹟保育工作既唔同取態。香港今日唔少建築物如住宅、學校、醫院、街道其實都同當年既華人活動同埋投資息息相關，政治、經濟、文化影響力深遠，充滿故事，係令人深深著迷想繼續發掘既地方。
->香港虎豹別墅內部經修復既彩繪玻璃非常華麗，以及部份精緻擺設
講多少少~ 去完SG之後我先至去香港虎豹別墅，驚嘆屋內狀態非常良好，相信政府和活化機構花費不少資源同金錢去維護，尤其是大廳內經修復既彩繪玻璃貝母設計，大廳展櫃亦放置唔少胡氏家族既精緻收藏同擺設。
另外，別墅既建築、室內設計、甚至擺設都大有來頭，例如飯廳壁爐上懸掛的玻璃牌匾係由吳海霖送贈，而吳氏係香港九巴和九龍殯儀館的創辦人之一，亦係曾演出《五福星》系列、《殭屍》的著名影星吳耀漢的父親。深深覺得呢個一級歷史建築實在太underrated，亦不禁令人擔心再過多十年八載會否更少人知道虎豹別墅既前世今生。
2022年新聞報導香港虎豹別墅既活化計劃營運機構提早終止運作，由古蹟辦收回「暫託」（導賞團需提早網上預約），一時之間又牽起香港人對呢個傳說中嚇親唔少小朋友既十八層地獄場景既興趣。咁岩年初睇左原子檔案同港識多史介紹胡氏兄弟發跡史（影片連結如下），所以對呢個地方重燃興趣，決定要實地考察下。有關星、港虎豹別墅／萬金油花園既異同、更多相片，同埋點解咁想了解佢地既過去，會再另文分享。(too much info & photos :P)
港識多史：新加坡虎豹別墅｜地獄博物館｜胡文虎、胡文豹家族有幾大？ (28 Jan 2023)
原子檔案：由雄霸亞洲 到賣光香港家產 4個你不知道萬金油家族衰落的真相 (21 Oct 2023)
（左）新加坡萬金油花園連地獄博物館、（右）香港 虎豹別墅
________________________________________
2) Frida Kahlo: The Life of An Icon沉浸式傳記展覽 & teamLab Future World @ 藝術科學博物館
→ 展覽介紹網頁
→ 展期：1/5 — 4/9/2024
→ linear storytelling / 知識型策展: 祭壇 (The Altar) > 事故 (The Accident) > 康復期 (The Convalescence) > 無盡象征 (Endless Symbology) > La Rosita > 360°沉浸式傳記 (Immersive Biography) > 時尚達人 (Fashion Icon) > 愛之花園 (The Garden of Love)
Frida Kahlo (1907–1954) 係墨西哥知名藝術家兼女權先鋒、20 世紀最具影響力的女性藝術家之一。
Frida Kahlo最著名既自畫像，係佢躺在病床上，對住安裝左鏡既天花板，一筆一畫地畫出黎。
展覽地點係位於濱海灣金沙既藝術科學博物館，展館空間廣闊，一進入場地便是紀念女主人翁既祭壇，上面放置佢喜愛既事物（觀眾亦可以利用現場提供的墨西哥剪紙（papel picado）為祭壇作額外裝飾），以倒序的方式去引領我地去回顧Frida Kahlo一生，饒有深意，展示策展方對她的尊崇，也反映墨西哥人對於悼念亡者既觀念同儀式；
透過藝術家創意設計出多媒體互動裝置、多重投影技術、大型電子屏幕去展現Frida Kahlo命途多舛，但絕不低頭既一生。佢化痛苦為力量，透過藝術創作將肉體同心靈既痛苦轉化、輸出。同場亦有一些傳統既展覽方式如展示畫作、Frida Kahlo日常喜愛既衣飾、短片播放、填顏色活動和邀請訪客寫下心意卡許願獻上祝福等活動。
下圖既中上部分展示既係藝術家創意設計出既多媒體互動裝置，呼應Frida畫作一貫既多彩特色。中間穿著鮮艷裙裝既就係Frida Kahlo本人仰臥訓係中間既病床上，延伸出去既綠色枝葉藤蔓代表佢人生中唔同追求，同埋所受過既不幸經歷所帶俾佢既折磨、身體先天缺陷，後來又遭逢交通意外而帶俾佢既終身創傷、婚姻的掙紮、無法懷孕的遺憾等。
→ Icon Singapore: 墨西哥画家与女权先锋 芙烈达·卡萝沉浸式展览
________________________________________
3) Asia Best 50 Bars🍸: Nutmeg & Clove, 28 Hongkong Street
https://atlasbar.sg/gallery/1
落地第一日，行完虎豹別墅搭Grab去Atlas Bar（Parkview Square酒店內）。虎豹別墅位置偏遠，所以唔想浪費時間搭9個字地鐵。點知，6點鬆D去到去Atlas Bar，walk-in 隊排第一，但因為我著左短褲，而唔比入… T_T 唯有去Haji Lane搵野食，於是就搵到果頭既Nutmeg & Clove（另一間Asia Best 50）。不過，始終Asia Best 50真係popular，好不容易搵到又食檸檬，要預約1日後再去，最後都去到兩間Asia Best 50，兩間都值得去！但一定要二揀一既，我會揀28 Hongkong Street ↓↓。
- 28 Hongkong Street：隱藏係Clarke Quay附近的僻靜小街，門面真的有夠神秘，仲要條街有幾個巨型垃圾桶阻礙視線… 超有探險feel XD！Cocktail感覺更加多層次，超好飲! 推介River City Paloma，Femme Fatality。
________________________________________
- Nutmeg & Clove：酒吧名稱「肉豆蔻和丁香」取名直接，like it! 因為無預約，職員提議我地坐在店外行人路邊的高腳吧台，但真係太熱焗，我地唯有敗走…
- 我叫果杯cocktail（淺黃色，有朱古力威化餅係面），雖然都隔左成大半年，但都仲記得入口既清新酸甜，好好飲！
________________________________________
4) 小印度兩小時社區導賞 by Uncle Chris Walking Tours（大推）
Again 我會為左參加Uncle Chris Walking Tours而再去SG! Uncle Chris雖然年屆七旬，但活力非常，生動活潑地去講解社區發展，仲請我地飲無糖印度奶茶! XD
Plan行程時偶然發現有台灣網民推介，所以都只係出發前一星期才在網頁預約，到達SG當日再whatsapp Uncle Chris，很快便有回覆確認報名。Uncle Chris主力講英文介紹，識少少廣東話詞彙咁，佢講故仔真係有一手，原來佢疫情前係做旅遊生意，亦會接private tour 做埋司機。
Meet the Singaporean — Chris Ng
行到尾聲，我地提到住既酒店係Orchard Road果頭，感覺有少少似尖東好時既懷舊氛圍，Uncle Chris又打開左話匣子咁介紹原來果邊有棟建築物Orchard Towers（當地人又稱之為 ‘4 Floors of Whores’），係90年代非常出名但人們都秘而不宣既無牌紅燈區（SG既合法紅燈區係芽籠Geylang，不過性工作者要遵守當局既嚴格規定，例如一定要介乎21–35歲、不能是男性，必須來自經批准的國家名單。性工作者也不允許與新加坡人發生戀愛關係，詳情可見以下SCMP連結。）（唔怪得之同舊時夜總會林立既尖東有似曾相識既感覺），不過咁岩係我地到之前一個月被政府強制冚檔，更加多juicy野就唔係度公開講，有興趣知就報團！XD
睇返地圖，Orchard Towers的確係地理位置上較優勝。btw 虎豹別墅其實都係偏離主要景點，少少遠，不過同砂鍋laksa既亞歷山大熟食中心位置相近，所以可以先去食laksa，再去虎豹別墅，會係較為順路。
參考：
SCMP: As Singapore’s Orchard Towers closes its nightclub doors, sex workers worry for their futures
Uncle Chris有個團既主題係QUEENSTOWN: CRIME, VICE & MURDER，我下次會報呢個團🙊
參加導賞團費用沒有固定費用，Facebook評論建議係SG$10 — $30。真心感覺Uncle Chris對於介紹本國既熱誠，所以我覺得值得比更高價錢的。當日參加既團友唔多，只有我同朋友、一位剛到SG工作定居既台灣男。本來集合時有一位斯文中年女士，我地剛到達時都有打招呼。但當Uncle Chris提到完左tour團友可酌量付出小費後，果位女士隔左陣就藉詞離去…
Facebook: https://www.facebook.com/unclechriswalkingtours/
Website: https://www.unclechrisdrivingholidays.com/walking-tours/ (Uncle Chris說網頁和面書都是他的粉絲幫他經營和上載資訊的)
________________________________________
5) 新派娘惹菜 National Kitchen by Violet Oon @ National Gallery
呢間米其林指南餐廳既老板娘係SG七八十年代烹飪界的泰斗兼著名美食評論家兼名主播，佢既娘惹菜式精緻不太油膩，加上20 年代復古室內設計風格，如果再去SG的話，都會想再去呢度食多次飯，同埋補返參觀National Gallery（記錯以為自己上次去過T.T）。
除左National Gallery店，仲有兩間分店係ION Orchard & Dempsey Hill。記得提早訂座~
________________________________________
6) 新加坡讚美廣場（CHIJMES）19世紀新歌德式建築群兼Crazy Rich Asians超豪華婚禮現場
新加坡讚美廣場（CHIJMES）19世紀新歌德式建築群兼Crazy Rich Asians超豪華婚禮現場
________________________________________
7) Bacha Coffee @ 濱海灣金沙酒店商場
rasberry croissant, coffee mille-feuille勁好食
________________________________________
8) Jewel航天城
掃零食再係T3入閘後買bacha和TWG茶!
行完Jewel City (連接3個航廈既航天城)都幾surprise我，然後諗起上次飛之前有去到T1新開既interval bar，隔離有觀景台同展覽介紹，原來香港機管局2016年開始計劃建造Skycity，但人地新加坡已經係2014年動工(exactly 係我十年前第一次去sg既果年)，而人地係2019年起完Jewel City🙂。 我地果個就仲係計劃中，旅客要走之前掃貨都仲係得最近既東薈城同埋果個葵涌山旮旯既佛羅倫斯outlet (唔明點解佢仲生存到) 🥸 . .
________________________________________
9) 亞歷山大熟食中心的德普路真善美砂鍋laksa
抵達第一天第一站去了，好食到連湯都飲埋，略嫌螄蚶有點腥。亞歷山大熟食中心主要分左3行，但我同朋友分頭行事都搵左好耐先搵到小小既店面，2點左右到達，當我地的麵食上桌，店家便宣告砂鍋laksa賣曬!所以覓食真係要趁早。有個小插曲，食食下感覺到有幾大滴水滴到我既衫上面，以為天花板滴水咁污糟，再望多眼先發現係自己既汗水 XD 因為都真係幾熱下…
________________________________________
10) National History Museum
大維修緊，常設館只係局部開放，沒什麼好看😢
1851年既Padang in SG，今日SG既政府大廈大草坪，係許多國慶遊行的傳統場地。呢幅畫作俾人既印像係SG係一個快樂無憂既多元文化社會。然而，細心留意，畫中歐洲人坐係高架飛機上，也有騎在馬背上或乘坐馬車 — — 而亞洲人則或站或坐在場地上，巧妙地表明歐洲人係SG土地上所擁有既hierachy。 14世紀、穿著紗籠的爪哇人小雕像 (不過頭部失了蹤@@)
________________________________________
11) 非旅遊景點：令人驚嘆既不規則設計住宅建築頂目The Interlace
最後最後張相係今次見到覺得好有趣既住宅頂目，成堆積木咁🤯，The Interlace.
The Interlace in Singapore wins 10 Year Award for sustainability
________________________________________
最後… 好想為SG平反…
身邊好多人聽到去SG都紛紛呼喊好悶… 其實我覺得一D都唔悶，因為好視乎你由邊個角度去發掘，要發掘其實仲有好多好有趣既歷史文化民間風俗野可以睇，就係早期土生華人/印度人/馬來西亞人/歐亞人係馬來亞既足跡都已經有好多故事。另外，Uncle chris 都有介紹返原來佢最出名既tour係cemetery tour，呢個會係我下次再黎sg既理由之一🫢。真心覺得SG既多元族裔社群文化、華人係SG以至整個馬來西亞地區既足跡、社區發展、早期建築特色、組屋政策、社區規劃、婚喪喜慶文化，甚至史前人類發展(XD)等等好多方面其實係等緊我地去發掘。如果真係唔知有咩睇，唔緊要，Uncle Chris幫到你! XD
（完）
如果你鐘意我寫既野，歡迎留言交流下啦～ 🤓
另外都請幫忙按心鼓勵鼓勵我啊 ^_^ 多多益善，少少無拘
贊助我飲杯啡 努力寫多D → https://www.buymeacoffee.com/wong.ellaa
挨豬IG 🐷 Threads@wong.ellaa
謝謝 ❤❤
https://vocus.cc/article/66f66843fd897800011e1c1b
