我搬來瑞芳。蹛的邊仔，有一幫177觀光公車，有到九份老街，毋過愛坐一點外鐘，若對火車頭坐去，二、三站就到。我就坐看覓，先共附近的路線行一擺才閣講。
早頓食飽，看公車動態，有一幫車咧欲到站，下一幫是半點鐘了後，9:30，拄拄好。是小型的公車，先經過八斗子火車頭、海科館，行海邊，原來是往福隆的方向，有看著我頂禮拜行的瑞八公路。到水湳洞的時，彎入去山路，開始𬦰山，彎來斡（uat ）去。佇黃金瀑布停10分鐘，會使落車來翕相，看看一下。好加哉有落車來歇睏，我小可仔暈車，已經共紮的幾若片梅仔（muê-á/m̂-á，酸梅）食完。按呢我知，公車極加會使坐半點鐘爾爾。
我看煞，𬦰起去（khí-khì ）車頂，看著加一个查某人坐佇我的頭前排，頭一排，毋知佗位來的？拄拄仔停車的時，我無看著伊，路頂懸干焦有２个人咧看瀑布。伊想欲佮司機講話，司機攏總應伊２擺，伊講：「我對金瓜石行去鼻頭角，坐落來啉咖啡……」我看司機無應伊，我問伊：「你攏總行偌久？」「我行路無咧看時間。」按呢就無話講。
伊閣問司機：「你是新來的？」司機無應，「以早的人我攏有佮in招呼。」司機嘛無講話，人司機應付遐濟人，貧惰講話矣！
伊坐佇遐，東看西看，喙內時時咧講話，是咧佮司機講？目睭看司機，抑是家己講予家己聽？毋知影。我的老母就是按呢，伊佇厝內的時，若是有人佇厝裡，伊就一直講話，無管人有咧聽、無咧聽？有應無應？伊就是一直講，講袂煞。我向望我閣較老的時，莫變做佮彼个oo-bá-sáng仝款，規喙踅踅唸（se̍h-se̍h-liām）。
到九份老街攏總70分鐘，遊客猶無真濟。老街行行一下，買一雙柴做的箸，看著素食肉圓，食一粒肉圓佮綜合湯。老街行煞，倒轉來，佇一間咖啡館啉咖啡，閣食一份沙拉佮鹹派，才有一點仔飽。
寫字寫寫耶！感覺隔壁桌的彼个少年老母講話傷大聲，耳空用窒仔（that-á）窒起來嘛無效，來走矣！查公車系統，177咧欲到站，緊咧出去，去車頭等，牌仔頂懸已經紅字：「即將進站」，一下仔車就來，幾若站就轉來到瑞芳火車頭，才12點捅（thóng）爾爾。
（2025.10.13.）
查教育部台語辭典
