各位朋友，ta̍k-ê好，我是主持人Niau-tāu，歡迎收聽做工á人phá-kheh-su̍h-to͘h。日本A-ní-meh足流行轉世到異世界ê故事，chit-kái，beh kā ta̍k-ê紹介1齣輕鬆koh好看，主角tī異世界旅行兼食好料ê A-ní-meh，chit-má咱趕緊來聽故事--lo͘h ！
Mu-khó͘-tah to̍h用國王hō͘伊ê金幣chhiàⁿ 1隊護衛，保護伊離開chit-ê國家。聽chit寡護衛講，chit-ê國家ê國王siáu貪koh真愛四界戰爭，beh離開to̍h ài khah緊--leh，若無，到時國界nā去hông封鎖，to̍h走無路--ah。Beh封鎖是因為國王驚人ē一直soan--去，時到to̍h掠無人thang去做兵--a。
Mu-khó͘-tah想講，好佳哉，家己走了有緊。伊ê特殊能力「網路商店」，雖罔無法度戰鬥，m̄-koh to̍h kah咱平素時tī網路頂買物件kāng款，啥to買有。Koh tú好伊真gâu煮食，ta̍k頓飯攏煮kah m̄-nā芳貢貢koh真好食款。想bē到食物ê芳味soah kā傳說--ni̍h ê魔獸「Fén-lī-luh」siâⁿ--來，硬beh chham Mu-khó͘-tah phah契約，講beh做伊ê契約魔獸，窮實to̍h是it tio̍h伊煮飯ê手路，拍算ta̍k頓攏beh食chheⁿ-chhau--ê。Mu-khó͘-tah看眼前chit隻生做ná像大隻野狼ê魔獸面á惡khia̍k-khia̍k，伊m̄敢拒絕，mā kan-na ē-tàng接受chit-ê契約，後--來to̍h ka號名叫做Fé-luh。
Fé-luh m̄-nā愛食，koh足gâu食，Mu-khó͘-tah chŏaⁿ開始煩惱錢無夠用，m̄知是beh怎樣chiah好。尾--á，去ho͘想tio̍h講ē-sái去做換手ê買賣，to̍h是kā tī網路商店買ê物件thǹg hō͘公會。頭起先，伊先用鹽hâm胡椒來試1-ē-á市草，結果hâm公會喝價了後趁kah十幾倍ê利純，錢是暫時免煩惱--ah，m̄-koh Mu-khó͘-tah猶是心內tám-tám，因為Fé-luh去到tó位攏ē受tio̍h人ê注目，che hâm伊想beh恬恬á過日ê心願to̍h有têng-tâⁿ。
當然--lah，Fé-luh感覺Mu-khó͘-tah真正是ke煩惱--ê，無論是貴族a̍h是國王，軍隊a̍h是啥mih有--ê無--ê，伊攏看bē上目，伊ê本領m̄是teh講笑--ê，凊彩to̍h聽好hō͘ 1 ê國家無--去，何況伊koh有女神teh ka保庇，啥攏無teh驚，顛倒是chit箍主人ê級數有夠kē，實在是hō͘伊看bē落--去，無ka訓練--chè beh thài ē用--chit！想--tio̍h to̍h做，伊chŏaⁿ開始教主人beh按怎使用魔法，m̄-koh用教--ê效果實在無kài好，Fé-luh規氣kā Mu-khó͘-tah tàn去hâm魔獸戰鬥，按算beh hō͘主人tī無拚ē死ê狀況kā魔法學--起-來。Fé-luh驚主人受傷，時到to̍h無人thang煮好料--ê ho͘食，專工koh tī伊ê身軀頂設1 ê魔法ê保護罩，普通ê魔獸根本to̍h傷伊bē-tio̍h。M̄-koh Mu-khó͘-tah 1-ē看tio̍h魔獸niâ，腳to̍h一直chhoah，伊kan-na是1 ê tī公司上班ê普通人，看tio̍h hiah-nī chē魔獸chông--來，腳尾免講mā冷吱吱。不過伊無想beh死，姑不將hē性命戰鬥，結果chit步koh真正有效--lih，魔法to̍h án-ne學--起-來，Fé-luh感覺chit箍主人--hoⁿh，無ka逼是bē-sái--lah。
戰鬥soah Mu-khó͘-tah規ê人軟sîo-sîo，thiám kah beh死，chit-ê時陣伊感覺家己ài食寡甜路--ê人chiah ē khah好，to̍h tī網路商店買規堆無kâng口味ê pháng hâm Fé-luh做夥食。掌管風ê女神tī天頂看kah chih-chài bē-tiâu，伊to上愛食甜ê物件--ā，to̍h藉口講beh hō͘ Mu-khó͘-tah保庇，叫Mu-khó͘-tah ta̍k禮拜攏ài chhoân祭品去ka祈禱，而且koh tī Mu-khó͘-tah ê耳空邊指示講一定ài有紅豆á pháng。Mu-khó͘-tah心內nauh講che nah ē是啥物神明leh指示，根本to̍h是女神teh ka點菜--mah！
Mu-khó͘-tah ê第2 ê契約魔物是1隻「Su-lái-muh」，去ho͘號做Sú-ih，Sú-ih古錐koh tah心，hâm強勢ê Fé-luh無kāng，hō͘ Mu-khó͘-tah疼命命。久--來，Fé-luh to̍h tiāⁿ leh khām-phu-lián講主人大細心，仝款ê要求，對伊to̍h無耐性，對Sú-ih to̍h輕聲細說，Sú-ih聽--tio̍h，to̍h隨kā Fé-luh sai-nai講，「Fé-luh阿叔你無kah意Sú-ih nih！」Fé-luh看伊古錐ê模樣，總算是了解主人是按怎ē hiah théng-sēng Sú-ih。
Sú-ih tăⁿ開始ê戰鬥能力hâm主人差不多，m̄-koh練功練2禮拜了後to̍h比主人koh khah厲害--ah，而且Fé-luh koh ē教Sú-ih戰鬥ê mê角。Só͘-pái Sú-ih hâm Fé-luh攏真興戰鬥，ài食啥in 2隻家己ē去phah，主人bih tī後壁，心驚驚，等in掠--轉-來chiah請公會kā魔獸處理好勢，家己chiah the̍h肉紲lŏe料理。
Mu-khó͘-tah用網路商店ê材料煮--出-來ê料理，ē hō͘食chit寡物件ê異世界生物，能力暫時增加真chē。有1 táu去hō͘ Fé-luh食--tio̍h，sûi to̍h感覺精神有夠好，接載bē tiâu chŏaⁿ走去拍獵。隔轉工Mu-khó͘-tah早起精神，看tio̍h 1堆tha̍h kah ná像山ê魔獸，chhoah 1 tiô；後--來伊to̍h盡量用Fé-luh in phah--來ê肉做料理，m̄敢hō͘ in食siuⁿ chē網路商店ê食物。原本Fé-luh to̍h真顯目--ah，若koh hông知影伊ê主人有chit款pà-koh ê能力，實在m̄是啥物好代，Mu-khó͘-tah to kan-taⁿ想beh恬恬á過日子to̍h好。
M̄-koh tī錢chit方面to̍h免koh煩惱--ah，彼寡lia̍h--tio̍h ê魔獸，肉先ka取--起-來，其他--ê角--lah，羽毛--lah，皮--lah等等ê材料攏賣hō͘公會，Fé-luh phah ê魔獸當然m̄是啥物四界看四界有--ê，有1寡魔獸，級數siuⁿ koân，價數驚--人，連公會to̍h m̄敢收，公會mā無夠錢thang ka買，chit聲Mu-khó͘-tah免講mā好額--ah！
Mu-khó͘-tah ta̍k禮拜攏ài kā風ê女神祈禱，其實to̍h是hō͘女神點伊愛食ê點心。風ê女神ng-ng-iap-iap bih leh偷食，終其尾mā是去hō͘其他ê女神發現--ah，in 3位女神真受氣，有好食--ê竟然無鬥相報，根本to̍h是歹朋友。土ê女神kah火ê女神mā決定beh kā Mu-khó͘-tah保庇，一下看chiah發見講，ĕ，Mu-khó͘-tah kan-taⁿ ē-tàng用土kap火ê魔法，só͘-pái，風ê女神ê保庇無啥應效，根本to是leh偷食步--mah！風ê女神辯解講，伊保庇Fé-luh，Mu-khó͘-tah koh是Fé-luh ê主人，hō͘伊點菜mā是應該--ê-a！掌管水ê女神聽到chia to̍h哭--ah，講án-ne to̍h kan-na伊無thang食，因為伊ê保庇對Mu-khó͘-tah mā無啥路用，其他ê女神看kah真m̄甘，頭殼mo͘h teh燒，佳哉Mu-khó͘-tah緊ka想步講，你ē-sái保庇Sú-ih，án-ne to̍h hâm風ê女神ê做法是仝款--ê。
Mu-khó͘-tah本底是kan-na接受1 ê女神 ê指示niâ，chit-má，soah變做有4 ê女神teh ka點菜，聽hiah chē指示實在是有淡薄á吵，m̄-koh in是女神neh，Mu-khó͘-tah是koh ē-sái講啥？
To̍h án-ne，Mu-khó͘-tah ùi 1 ê城市旅行到另外1 ê，路--ni̍h有Sú-ih hâm Fé-luh做伴，有時á看人tú-tio̍h困難to̍h kâng tàu-saⁿ-kāng，tú-tio̍h--ah賣寡網路商店ê物件做議量，不sám時女神ē來點in kah意ê食物，kā公會tàu處理1寡in無法度解決ê魔獸mā有時有陣--lah。
Mu-khó͘-tah tī chit ê異世界上thiám ê工課，應該to̍h是煮飯，因為Fé-luh hâm Sú-ih攏食kài chē，不過看in食kah hiah歡喜，伊有影mā真滿足。食飯ê時，伊上愛買1罐bì-luh，ná食ná看風景。伊tiāⁿ leh想，有朋友sio-thīn，有神明保庇，有好物thang食，有bì-luh thang lim，雖罔是tī異世界，伊ûn-ná是真幸福--lah。
Chit phō A-ní-meh，開真chē時間tī leh講án-nóa做料理，beh加啥物料，摻啥物醬，畫面koh做了chiâⁿ súi，chiâⁿ好食款。Só͘-pái，真chē人評論講，m̄通tī半暝看，上好是beh食飯ê時chiah看，伊是食飯時間siāng好配飯ê戲齣。
Án-ne lín to̍h知影Mu-khó͘-tah煮ê料理看--起-來有jōa好食。
Koh來to̍h是批評講，Mu-khó͘-tah nah ē hiah無膽，che我個人是感覺bē--lah，Fé-luh hâm Sú-ih to已經hiah厲害--ā，伊hit ê su̍t-á形kám m̄是koh有另外1款趣味--leh！Koh再講，Mu-khó͘-tah nā hâm伊彼2隻契約魔獸仝款厲害，án-ne chit齣A-ní-meh主題to̍h略á ē無kâng--去-ah，料理ê部份無的確to̍h變少，戰鬥--ê戲齣hiah chē，ē-tàng配飯--ê是khah少khoàiⁿ neh！
窮實chit齣戲m̄-nā劇情譀古，輕鬆趣味，我感覺伊ê世界觀設定真súi，伊有引chhōa我ùi「異世界」ê角度，用新ê眼光，翻頭來欣賞咱現此時所tòa ê chit ê現實世界。像「網路商店」，對咱來講是chiah-nī四常ê服務，咱早to̍h bē記chit伊其實有jŏa神奇，jŏa-ni̍h-á無簡單，講伊是「超能力」mā無過份。Nā斟酌看，用心體會，咱ê世界精彩ê程度，1點á to無輸藝術創作者想像--出-來ê「異世界」！
Chit齣A-ní-meh第二季ùi 2025年10--月開始，ta̍k拜二出1集，m̄知Mu-khó͘-tah koh ē煮啥款好料--ê來siâⁿ--咱-leh，ta̍k-ê做夥來期待neh！
今á日hâm各位觀眾朋友紹介--ê，m̄知ta̍k-ê kám有其他ê想法？腹肚kám ē iau？Kám是配飯teh看--ê？歡迎留話kā阮講ŏ͘！感謝各位聽眾朋友今á日ê收聽，咱後回再會ŏ͘！
Kok-ūi pêng-iú, ta̍k-ê hó, góa sī chú-chhî-jîn Niau-tāu, hoan-gêng siu-thiaⁿ Chò kang-á lâng phá-kheh-su̍h-to͘h. Ji̍t-pún A-ní-meh chiok liû-hêng choán-sè kàu ī-sè-kài ê kò͘-sū, chit-kái, beh kā ta̍k-ê siāu-kài 1 chhut khin-sang koh hó khòaⁿ, chú-kak tī ī-sè-kài lú-hêng kiam chia̍h hó-liāu ê A-ní-meh, chit-má lán kóaⁿ-kín lâi thiaⁿ kò͘-sū--lo͘h!
Bàng-gah ê khí-thâu sī án-ne, ī-sè-kài ū 1 ê kok-ka, chìn-hêng ióng-chiá tiàu-hoàn, beh ài kho͘ ióng-chiá kòe-lâi pang-chān in tàu phah mô͘-ông, lán ê chú-kak Mu-khó͘-tah, to̍h án-ne khì hông kiò--lâi. Chit chióng ī-sè-kài choán-sè lóng ū kò͘-tēng ê pán-lō͘, to̍h sī nā ióng-chiá hông tiàu-hoàn liáu-āu, sîn-bêng ē siúⁿ in te̍k-sû lêng-le̍k, tit tio̍h lêng-le̍k liáu-āu, ióng-chiá lóng m̄-bián liān bú-kong, sûi to̍h ē-tàng sú-iōng. Án-ne lán ōe koh kóng hoan-thâu, hâm Mu-khó͘-tah kāng-the--ê koh ū 3 ê ko-tiong-seng, tī leh kàm-tēng ióng-chiá lêng-le̍k ê sî, chú-kak í-gōa ê lâng, m̄ sī kiàm-su̍t chiok lī-hāi, to̍h sī mô͘-hoat chin ko-kiông, 3 ê ko-tiong-seng kàm-tēng ê kiat-kó lóng chiâⁿ sek-ha̍p chiàn-tàu, m̄-koh Mu-khó͘-tah ê te̍k-sû lêng-le̍k soah sī hō͘ lâng sa-bô-chàng ê “Bāng-lō͘ siong-tiàm”, chit 3 ê ko-tiong-seng khòaⁿ tio̍h Mu-khó͘-tah ê lêng-le̍k liáu-āu, chhiò-hai-hai kóng, án-ne sī beh án-chóaⁿ hâm lâng khì phah mô͘-ông--lah. Jiân-āu in 4 ê to̍h khì pài-kiàn kok-ông, tiûⁿ-bīn ōe kóng soah, kok-ông to̍h iau-chhiáⁿ in lâi thè ka-tī ê kok hāu-lô, koh kóng hoān-sè mô͘-ông ē chai-iáⁿ chóaⁿ-iūⁿ hō͘ in koh tńg-khì ka-tī ê sè-kài. Mu-khó͘-tah khòaⁿ tio̍h kok-ông kui khian pak-tó͘ chia̍h kah pûi-chih-chih, ông-hiō koh kui seng-khu lóng sī kim-tang-tang ê chu-pó, kám-kak pān-sè m̄-tio̍h--leh, sui-bóng i tī Ji̍t-pún kan-na sī 1 ê siōng kài phó͘-thong ê chia̍h thâu-lō͘ lâng, m̄-koh jîn-chêng-sè-sū ûn-ná sī bat--kóa, i siūⁿ-siūⁿ--leh to̍h kā kok-ông kóng, pháiⁿ-sè--lah, i m̄-sī ióng-chiá, lâu tī chia mā sī bô siáⁿ lō͘-iōng, i ē lî-khui tiām-tiām-á kòe ji̍t-chí, bē jiá mâ-hoân. Kok-ông khòaⁿ i ê te̍k-sû lêng-le̍k, a̍h chai he “Bāng-lō͘ siong-tiàm” sī siáⁿ óaⁿ-ko, kin-pún mā bô thiaⁿ--kòe, lâng khòaⁿ--khài koh bô-táⁿ, kin-pún bô sêng 1 ê ióng-chiá, to̍h hō͘ i 20 ê kim-pè, pàng i cháu--ah.
Mu-khó͘-tah to̍h iōng kok-ông hō͘ i ê kim-pè chhiàⁿ 1 tūi hō͘-ōe, pó-hō͘ i lî-khui chit-ê kok-ka. Thiaⁿ chit kóa hō͘-ōe kóng, chit-ê kok-ka ê kok-ông siáu-tham koh chin ài sì-kè chiàn-cheng, beh lî-khui to̍h ài khah kín--leh, nā-bô, kàu-sî kok kài nā khì hông hong-só, to̍h cháu-bô-lō͘--ah. Beh hong-só sī in-ūi kok-ông kiaⁿ lâng ē it-ti̍t soan--khì, sî-kàu to̍h lia̍h bô-lâng thang khì chò-peng--a.
Mu-khó͘-tah siūⁿ kóng, hó ka-chài, ka-tī cháu liáu ū kín. I ê te̍k-sû lêng-le̍k “ Bāng-lō͘ siong-tiàm”, sui-bóng bô hoat-tō͘ chiàn-tàu, m̄-koh to̍h kah lán pêng-sò͘-sî tī bāng-lō͘ téng bé mi̍h-kiāⁿ kāng-khoán, siáⁿ to̍h bé ū. Koh tú hó i chin gâu chú-chia̍h, ta̍k-tǹg pn̄g lóng chú kah m̄-nā phang-kòng-kòng koh chin hó-chia̍h khoán. Siūⁿ bē kàu si̍t-bu̍t ê phang-bī soah kā thoân-soat--ni̍h ê mô͘-siù “Fén-lī-luh” siâⁿ--lâi, ngē beh chham Mu-khó͘-tah phah khè-iok, kóng beh chò i ê khè-iok mô͘-siù, khêng-si̍t to̍h sī it tio̍h i chú-pn̄g ê chhiú-lō͘, phah-sǹg ta̍k-tǹg lóng beh chia̍h chheⁿ-chhau--ê, Mu-khó͘-tah khòaⁿ gán-chêng chit chiah seⁿ chò ná chhiūⁿ tōa-chiah iá-lông ê mô͘-siù bīn-á ok-khia̍k-khia̍k, i m̄ káⁿ kī-choa̍t, mā kan-na ē-tàng chiap-siū chit-ê khè-iok, āu--lâi to̍h ka hō-miâ kiò-chò Fé-luh.
Fé-luh m̄-nā ài chia̍h, koh chiok gâu chia̍h. Mu-khó͘-tah chŏaⁿ khai-sí hoân-ló chîⁿ bô kàu ēng, m̄ chai sī beh chóaⁿ-iūⁿ chiah hó. Bóe--á, khì ho͘ siūⁿ tio̍h kóng ē-sái khì chò ōaⁿ-chhiú ê bé-bē, to̍h sī kā tī bāng-lō͘-siong-tiàm bé ê mi̍h-kiāⁿ thǹg hō͘ kong-hōe. Thâu-khí-seng, i seng iōng iâm hâm hô͘-chio lâi chhì 1-ē-á chhī-chháu, kiat-kó hâm kong-hōe hoah-kè liáu-āu thàn kah 10 kúi pōe ê lī-sûn, chîⁿ sī chiām-sî bián hoân-ló--ah, m̄-koh Mu-khó͘-tah iáu-sī sim-lāi tám-tám, in-ūi Fé-luh khì kàu tó-ūi lóng ē siū tio̍h lâng ê chù-ba̍k, che hâm i siūⁿ beh tiām-tiām-á kòe-ji̍t ê sim-goān to̍h ū têng-tâⁿ.
Tong-jiân--lah, Fé-luh kám-kak Mu-khó͘-tah chin-chiàⁿ sī ke hoân-ló--ê, bô-lūn sī kùi-cho̍k a̍h-sī kok-ông, kun-tūi a̍h-sī siáⁿ-mih ū--ê bô--ê, i lóng khòaⁿ bē chiūⁿ-ba̍k, i ê pún-léng m̄ sī teh kóng-chhiò--ê, chhìn-chhái to̍h thìng-hó hō͘ 1 ê kok-ka bô--khì, hô-hòng i koh ū lú-sîn teh ka pó-pì, siáⁿ lóng bô teh kiaⁿ, tian-tò sī chit kho͘ chú-lâng ê kip-sò͘ ū kàu kē, si̍t-chāi sī hō͘ i khòaⁿ bē loh--khì, bô ka hùn-liān--chè beh thài ē ēng--chit! Siūⁿ--tio̍h to̍h chò, i chŏaⁿ khai-sí kà chú-lâng beh án-chóaⁿ sú-iōng mô͘-hoat, m̄-koh iōng kà--ê hāu-kó si̍t-chāi bô kài hó, Fé-luh kui-khì kā Mu-khó͘-tah tàn khì hâm mô͘-siù chiàn-tàu, àn-sǹg beh hō͘ chú-lâng tī bô piàⁿ ē sí ê chōng-hóng kā mô͘-hoat o̍h--khí-lâi. Fé-luh kiaⁿ chú-lâng siū-siong, sî-kàu to̍h bô lâng thang chú hó-liāu--ê ho͘ chia̍h, choan-kang koh tī i ê seng-khu téng siat 1 ê mô͘-hoat ê pó-hō͘ tà, phó͘-thong ê mô͘-siù kin-pún to̍h siong i bē-tio̍h. M̄-koh Mu-khó͘-tah 1-ē khòaⁿ tio̍h mô͘-siù niâ, kha to̍h it-ti̍t chhoah, i kan-na sī 1 ê tī kong-si siōng-pan ê phó͘-thong lâng, khòaⁿ tio̍h hiah-nī chē mô͘-siù chông--lâi, kha-bóe bián-kóng mā léng-ki-ki. Put-kò i bô siūⁿ beh sí, ko͘-put-chiong hē sìⁿ-miā chiàn-tàu, kiat-kó chit pō͘ koh chin-chiàⁿ ū-hāu--lih, mô͘-hoat to̍h án-ne o̍h--khí-lâi, Fé-luh kám-kak chit kho͘ chú-lâng--hoⁿh, bô ka pek sī bē-sái--lah.
Chiàn-tàu soah Mu-khó͘-tah kui ê lâng nńg-sîo-sîo, thiám kah beh sí, chit-ê sî-chūn i kám-kak ka-tī ài chia̍h kóa tiⁿ-lō͘--ê lâng chiah ē khah hó, to̍h tī bāng-lō͘ siong-tiàm bé kui tui bô kâng kháu-bī ê pháng hâm Fé-luh chò-hóe chia̍h. Chiáng-koán hong ê lú-sîn tī thiⁿ-téng khòaⁿ kah chih-chài bē-tiâu, i to siōng ài chia̍h tiⁿ ê mi̍h-kiāⁿ--ā, to̍h chià-kháu kóng beh hō͘ Mu-khó͘-tah pó-pì, kiò Mu-khó͘-tah ta̍k lé-pài lóng ài chhoân chè-phín khì ka kî-tó, jî-chhiáⁿ koh tī Mu-khó͘-tah ê hīⁿ-khang piⁿ chí-sī kóng it-tēng ài ū âng-tāu-á pháng. Mu-khó͘-tah sim-lāi nauh kóng che nah ē sī siáⁿ-mih sîn-bêng leh chí-sī, kin-pún to̍h sī lú-sîn teh ka tiám-chhài--mah!
Mu-khó͘-tah ê tē 2 ê khè-iok mô͘-bu̍t sī 1 chiah “Su-lái-muh”, khì ho͘ hō-chò Sú-ih, Sú-ih kó͘-chui koh tah-sim, hâm kiông-sè ê Fé-luh bô kāng, hō͘ Mu-khó͘-tah thiàⁿ-miā-miā. Kú--lâi, Fé-luh to̍h tiāⁿ leh khām-phu-lián kóng chú-lâng tōa-sè-sim, kāng-khoán ê iau-kiû, tùi i to̍h bô nāi-sèng, tùi Sú-ih to̍h khin-siaⁿ-sè-soeh, Sú-ih thiaⁿ--tio̍h, to̍h sûi kā Fé-luh sai-nai kóng, “Fé-luh a-chek lí bô kah-ì Sú-ih nih!” Fé-luh khòaⁿ i kó͘-chui ê bô͘-iūⁿ, chóng-sǹg-sī liáu-kái chú-lâng sī án-chóaⁿ ē hiah théng-sēng Sú-ih.
Sú-ih tăⁿ khai-sí ê chiàn-tàu lêng-le̍k hâm chú-lâng chha-put-to, m̄-koh liān-kong liān 2 lé-pài liáu-āu to̍h pí chú-lâng koh khah lī-hāi--ah, jî-chhiáⁿ Fé-luh koh ē kà Sú-ih chiàn-tàu ê mê-kak. Só͘-pái Sú-ih hâm Fé-luh lóng chin hèng chiàn-tàu, ài chia̍h siáⁿ in 2 chiah ka-tī ē khì phah, chú-lâng bih tī āu-piah, sim kiaⁿ-kiaⁿ, tán in lia̍h--tńg-lâi chiah chhiáⁿ kong-hōe kā mô͘-siù chhú-lí hó-sè, ka-tī chiah the̍h bah sòa lŏe liāu-lí.
Mu-khó͘-tah iōng bāng-lō͘ siong-tiàm ê châi-liāu chú--chhut-lâi ê liāu-lí, ē hō͘ chia̍h chit-kóa mi̍h-kiāⁿ ê ī-sè-kài seng-bu̍t, lêng-le̍k chiām-sî cheng-ka chin chē. Ū 1 táu khì hō͘ Fé-luh chia̍h--tio̍h, sûi to̍h kám-kak cheng-sîn ū kàu hó, chih-chài bē tiâu chŏaⁿ cháu khì phah-la̍h. Keh-tńg-kang Mu-khó͘-tah chái-khí cheng-sîn, khòaⁿ tio̍h 1 tui tha̍h kah ná chhiūⁿ soaⁿ ê mô͘-siù, chhoah 1 tiô, āu--lâi i to̍h chīn-liōng iōng Fé-luh in phah--lâi ê bah chò liāu-lí, m̄-káⁿ hō͘ i chia̍h siuⁿ chē bāng-lō͘ siong-tiàm ê chia̍h-mi̍h. Goân-pún Fé-luh to̍h chin hiáⁿ-ba̍k--ah, nā koh hông chai-iáⁿ i ê chú-lâng ū chit khoán pà-koh ê lêng-le̍k, si̍t-chāi m̄ sī siáⁿ-mih hó-tāi, Mu-khó͘-tah to kan-taⁿ siūⁿ beh tiām-tiām-á kòe ji̍t-chí to̍h hó.
M̄-koh tī chîⁿ chit hong-bīn to̍h bián koh hoân-ló--ah, hit kóa lia̍h--tio̍h ê mô͘-siù, bah seng ka chhú--khí-lâi, kî-tha--ê kak--lah, ú-mn̂g--lah, phôe--lah téng-téng ê châi-liāu lóng bē hō͘ kong-hōe, Fé-luh phah ê mô͘-siù tong-jiân m̄ sī siáⁿ-mih sì-kè khòaⁿ sì-kè ū--ê, ū 1 kóa mô͘-siù, kip-sò͘ siuⁿ koân, kè-siàu kiaⁿ--lâng, liân kong-hōe to̍h m̄-káⁿ siu, kong-hōe mā bô kàu chîⁿ thang ka bé, chit siaⁿ Mu-khó͘-tah bián-kóng mā hó-gia̍h--ah!
Mu-khó͘-tah ta̍k lé-pài lóng ài kā hong ê lú-sîn kî-tó, kî-si̍t to̍h sī hō͘ lú-sîn tiám i ài chia̍h ê tiám-sim. Hong ê lú-sîn ng-ng-iap-iap bih leh thau-chia̍h, chiong-kî-bóe mā sī khì hō͘ kî-tha ê lú-sîn hoat-hiān--ah, in 3 ūi lú-sîn chin siū-khì, ū hó-chia̍h--ê kèng-jiân bô tàu-sio-pò, kin-pún to̍h sī pháiⁿ pêng-iú. Thó͘ ê lú-sîn kah hóe ê lú-sîn mā koat-tēng beh kā Mu-khó͘-tah pó-pì, chi̍t-ē khòaⁿ chiah hoat-kiàn kóng, ĕ, Mu-khó͘-tah kan-taⁿ ē-tàng iōng thó͘ kap hóe ê mô͘-hoat, só͘-pái, hong ê lú-sîn ê pó-pì bô siáⁿ èng-hāu, kin-pún to sī leh thau-chia̍h-pō͘--mah! Hong ê lú-sîn piān-kái kóng, i pó-pì Fé-luh, Mu-khó͘-tah koh sī Fé-luh ê chú-lâng, hō͘ i tiám-chhài mā sī èng-kai--ê-a! Chiáng-koán chúi ê lú-sîn thiaⁿ kàu chia to̍h khàu--ah, kóng án-ne to̍h kan-na i bô thang chia̍h, in-ūi i ê pó-pì tùi Mu-khó͘-tah mā bô siáⁿ lō͘-iōng, kî-tha ê lú-sîn khòaⁿ kah chin m̄-kam, thâu-khak mo͘h teh sio, ka-chài Mu-khó͘-tah kín ka siūⁿ pō͘ kóng, lí ē-sái pó-pì Sú-ih, án-ne to̍h hâm hong ê lú-sîn ê chò-hoat sī kāng-khoán--ê.
Mu-khó͘-tah pún-té sī kan-na chiap-siū 1 ê lú-sîn ê chí-sī niâ, chit-má, soah piàn chò ū 4 ê lú-sîn teh ka tiám-chhài, thiaⁿ hiah chē chí-sī si̍t-chāi sī ū tām-po̍h-á chhá, m̄-koh in sī lú-sîn neh, Mu-khó͘-tah sī koh ē-sái kóng siáⁿ?
To̍h án-ne, Mu-khó͘-tah ùi 1 ê siâⁿ-chhī lú-hêng kàu lēng-gōa 1 ê, lō͘--ni̍h ū Sú-ih hâm Fé-luh chò phōaⁿ, ū-sî-á khòaⁿ lâng tú-tio̍h khùn-lân to̍h kâng tàu-saⁿ-kāng, tú-tio̍h--ah bē kóa bāng-lō͘ siong-tiàm ê mi̍h-kiāⁿ chò gī-niū, put-sám-sî lú-sîn ē lâi tiám in kah-ì ê chia̍h-mi̍h, kā kong-hōe tàu chhú-lí 1 kóa in bô hoat-tō͘ kái-koat ê mô͘-siù mā ū-sî-ū-chūn--lah.
Mu-khó͘-tah tī chit ê ī-sè-kài siōng thiám ê khang-khòe, èng-kai to̍h sī chú-pn̄g, in-ūi Fé-luh hâm Sú-ih lóng chia̍h kài chē, put-kò khòaⁿ in chia̍h kah hiah hoaⁿ-hí, i ū-iáⁿ mā chin boán-chiok. Chia̍h-pn̄g ê sî, i siōng ài bé 1 koàn bì-luh, ná chia̍h ná khòaⁿ hong-kéng. I tiāⁿ leh siūⁿ, ū pêng-iú sio-thīn, ū sîn-bêng pó-pì, ū hó-mi̍h thang chia̍h, ū bì-luh thang lim, sui-bóng sī tī ī-sè-kài, i ûn-ná sī chin hēng-hok--lah.
Chit phō A-ní-meh, khai chin chē sî-kan tī leh kóng án-nóa chò liāu-lí, beh ka siáⁿ-mih liāu, chham siáⁿ-mih chiùⁿ, ōe-bīn koh chò liáu chiâⁿ súi, chiâⁿ hó-chia̍h khoán. Só͘-pái, chin chē lâng phêng-lūn kóng, m̄-thang tī pòaⁿ-mî khòaⁿ, siōng-hó sī beh chia̍h-pn̄g ê sî chiah khòaⁿ, i sī chia̍h-pn̄g sî-kan siāng hó phè-pn̄g ê hì-chhut.
Án-ne lín to̍h chai-iáⁿ Mu-khó͘-tah chú ê liāu-lí khòaⁿ--khí-lâi ū jōa hó-chia̍h.
Koh lâi to̍h sī phoe-phêng kóng, Mu-khó͘-tah nah ē hiah bô-táⁿ, che góa kò-jîn sī kám-kak bē--lah, Fé-luh hâm Sú-ih to í-keng hiah lī-hāi--ā, i hit ê su̍t-á hêng kám m̄-sī koh ū lēng-gōa 1 khoán chhù-bī--leh! Koh chài kóng, Mu-khó͘-tah nā hâm i hit 2 chiah khè-iok mô͘-siù kāng-khoán lī-hāi, án-ne chit chhut A-ní-meh chú-tê to̍h lio̍h-á ē bô-kâng--khì-ah, liāu-lí ê pō͘-hūn bô tek-khak to̍h piàn chió, chiàn-tàu--ê hì-chhut hiah chē, ē-tàng phè-pn̄g--ê sī khah chió khoàiⁿ neh!
Khêng-si̍t, chit chhut hì m̄-nā kio̍k-chêng hàm-kó͘, khin-sang chhù-bī, góa kám-kak i ê sè-kài-koan siat-tēng chin súi, i ū ín-chhōa góa ùi “ī-sè-kài” ê kak-tō͘, iōng sin ê gán-kong, hoan-thâu lâi him-sióng lán hiān-chhú-sî só͘ tòa ê chit ê hiān-si̍t sè-kài. Chhiūⁿ “Bāng-lō͘ siong-tiàm”, tùi lán lâi kóng sī chiah-nī sù-siông ê ho̍k-bū, lán chá to̍h bē-kì-chit i kî-si̍t ū jŏa sîn-kî, jŏa-ni̍h-á bô kán-tan, kóng i sī “Chhiau-lêng-le̍k” mā bô kòe-hūn. Nā chim-chiok khòaⁿ, iōng-sim thé-hōe, lán ê sè-kài cheng-chhái ê thêng-tō͘, 1 tiám-á to bô su gē-su̍t chhòng-chok chiá sióng-siōng--chhut-lâi ê “Ī-sè-kài”!
Chit chhut A-ní-meh tē 2 kùi ùi 2025 nî 10--goe̍h khai-sí, ta̍k pài 2 chhut 1 chi̍p, m̄-chai Mu-khó͘-tah koh ē chú siáⁿ-khoán hó-liāu--ê lâi siâⁿ--lán-leh, ta̍k-ê chò-hóe lâi kî-thāi neh!
Kin-á-ji̍t hâm kok-ūi koan-chiòng pêng-iú siāu-kài--ê, m̄-chai ta̍k-ê kám ū kî-tha ê siūⁿ-hoat? Pak-tó͘ kám ē iau? Kám sī phè-pn̄g teh khòaⁿ--ê? Hoan-gêng lâu-ōe kā goán kóng ŏ͘! Kám-siā kok-ūi thiaⁿ-chiòng pêng-iú kin-á-ji̍t ê siu-thiaⁿ, lán āu-hôe chài-hōe ŏ͘!
