廚房嘅鋅盤裏，靜靜躺住三色椒。紅椒似火，鮮活得有啲霸道；青椒帶住一種倔強嘅青澀。而夾喺佢哋中間嘅，係黃椒。佢冇紅椒嘅鋒芒，亦冇青椒嘅生澀；佢嘅黃，係溫潤嘅，是恰到好處嘅暖意。我總覺得，佢存在嘅意義，就係為咗中和嗰份火爆與青澀，令成碟餸變得圓滿、溫柔。
唔知點解，望住呢抹黃，我腦海裏總會突然響起一把聲線，唱住城市裏嘅孤單同等候：「聽見，冬天的離開，我在某年某月醒過來……向左向右向前看，愛要拐幾個彎才來？」歌詞裏嘅畫面太具質感——喺地鐵人海裏浮沉，喺無盡車龍中等候，手裏好似真係揸住一張寫住號碼嘅紙，茫然而期待。嗰種滋味，城市人，邊個未嘗過？嗰種等候，係灰色嘅，也係令人心慌嘅。
但思緒，總唔會停留喺灰太耐。「我往前飛，飛過一片時間海……」一句歌詞，就似一程航班。我嘅記憶就咁離開咗眼前嘅廚房，飛越一片無形嘅時間海，降落喺一片被夕陽染成金黃嘅沙灘上——屯門黃金海岸。嗰年，我扛住攝影機，替一對新人拍愛情微電影。夏篇主題，就係「遇見」。故事藍本，係佢哋真實經歷：女孩因心事飛到沖繩散心，男孩知道後，冇多講一句，第二日就買咗機票飛去沖繩——喺一個海灘上，扮一次「偶遇」。我哋就喺黃金海岸重演呢幕。夕陽鍍上一層溫柔金色——金色嘅海、金色嘅沙、金色嘅笑容。我記得我笑住對男仔講：「你呢個唔係『遇見』，係『預謀』喎！」
佢望住不遠處嘅女仔，眼神裏有種超越年齡嘅篤定，笑住講：「係呀，幸福唔會自己行過嚟。有時要買張機票，用勇氣去爭取返嚟。就好似……要親眼睇下，嗰條黃色嘅手巾仔，有冇為自己掛起一樣。」
佢講到「黃色嘅手巾仔」，我當場怔咗一下。腦海即刻浮現出一套老電影——《幸福的黃手絹》。故事講一個啱啱出獄嘅男人，佢唔敢返屋企，因為唔肯定太太仲等唔等佢。出獄前，佢寄信俾太太：「如果你仲等緊我，就喺屋企門前嘅旗杆上，掛一條黃色手巾。如果冇，我唔會打擾你，會靜靜咁離開。」當佢懷住最壞嘅打算，戰戰兢兢坐車返到熟悉嘅小鎮時，遠遠望見屋企方向，旗杆上唔止一條黃手巾——係一排又一排，隨風飄揚嘅黃色布。太太用最笨拙但最堅定嘅方式話俾佢知：「我，一直都喺度，從來冇離開過。」男人泣不成聲。嗰種幸福，係用漫長等待同忐忑勇氣交換返嚟嘅，所以咁震撼，咁有份量。
由香港飛到沖繩，同由監獄坐車返屋企，呢兩段路，其實都係確認幸福嘅旅途。
回望——黃色，真係一個充滿幸福感嘅顏色。佢係黃金海岸黃昏中嘅餘暉；係沖繩沙灘上為愛奔赴嘅勇氣；係北海道旗杆上，那份無言的守候。甚至，佢亦係夏天最甜的一口味道：芒果嘅香甜、菠蘿嘅微酸、香蕉嘅柔糯。原來，生命中咁多美好嘅甜，全都染上黃色。
我回過神，望住鋅盤入面嘅黃椒。佢嘅黃色，喺光線下顯得特別溫柔。原來最幸福嘅「遇見」，唔係茫茫人海中撞到邊個，而係當你鼓起勇氣奔赴，發現對方早已掛滿黃手巾，靜靜咁喺終點，等緊你。可能仲煮好咗一味——三色椒炒魚鬆——等你添！
哈，不過……唔知《幸福的黃手絹》入面嗰位日本太太，又識唔識炒呢味餸呢？
______________________________________________________________
【編輯室絮語：一趟旅程的兩個入口】
這篇文章，是《千禧散步麥田日誌》的「黃色篇」，也是另一篇文章的「孖生兄弟」。
它的上一篇，是來自「188頻道」的 《隨意幸福：一場關於「遇見幸福」的回家之旅》。一篇關於「奔赴」，一篇關於「回歸」，兩篇文章互相呼應，構成了一場完整的幸福思索。
如果你是由《隨意幸福》來到這裡，恭喜你走完了全程。如果這是你的第一站，不妨點擊回到旅程的另一個起點，看看幸福的另一種模樣。
