「不如，我哋出去行下啦。」
呢句說話，輕輕的，卻能撬動整個世界。
你仲記唔記得，中學走廊上，你鼓起畢生勇氣，對著隔離班那個長髮飄飄的她，低聲說：「放學……去行下囉？」那時候的「行下」，是心如鹿撞的試探，是青春裡最甜蜜的冒險。當你以為故事會有個開始，最後卻只剩低一隻代表住「無始無終」嘅戒指，喺傷心嘅黑夜裡，陪住你。戒指，圓形的！
出來社會做事，你第一次帶她返屋企見家長。晚飯後，媽媽笑著將你哋推出門口：「阿仔，時間仲好早，你同女朋友出去行下啦，唔使喺度對住啲碗碟。」那時候的「行下」，是長輩給予的空間，是對未來一份心照不宣嘅默許與祝福。鐘同碟，圓形的！
深夜，電話響起，是你的知己死黨，聲音疲憊。「陪我飲兩杯啦……出嚟行下。」去到熟悉的酒吧，你哋碰一碰手中嘅酒杯，望住牆上掛住嘅飛鏢靶，千言萬語，都喺嗰個沉默嘅碰杯聲中。那時候的「行下」，是無聲的陪伴，是兄弟間最厚實的肩膀。酒杯同飛鏢靶，圓形的！
甚至，喺另一個平行時空，呢句說話充滿殺氣。黑幫大佬要同宿敵談判，會講「我哋行下」；佢想收買人心，會送出一隻鑲滿鑽石嘅名貴手錶。而喺同一片夜空下，一個臥底警員又比他上級約了出來行下，他對住佢嘅上司嘶吼：「三年又三年！你再叫我行落去，唔該喺我出糧個銀碼後面，加多十個零啊！我用條命去搏㗎！」手錶同錢，圓形的！
你看，呢個世界，原來充滿著各式各樣嘅「行下」。更加充滿著有始有終還是無始無終的圓。
兩個人嘅同行，總係背負著一個目的，一個任務。當任務完成，對方轉身講再見，係你係咪只能繼續一個人行落去？係一個有始有終嘅「完」？還是又一次無始無終的輪迴？
我哋為咗愛情、親情、友情、工作，行過無數嘅路。但，有幾多步，係真正為自己而行？係為一次斷捨離而跟過去說一句「玩完啦！」還是頓悟後蛻變，蛻變後的啟航？
最近，我進行咗一次咁樣嘅「行下」。
不過，我選擇咗一個人。
目的地？我嘅大學校園：中大
戴上耳機，按下播放鍵，傳嚟嘅係屬於我哋嗰個年代嘅金曲，我選了林子祥的「誰能明白我」。呢個，就係「千禧散步」。我由大學站出發，跳上校巴。司機熟練地扭動軚盤，校巴沿著山路，畫出一個巨大嘅 圓圈，將我由山腳送到山頂。一個圈，彷彿就係又一次輪迴。
我行過熟悉嘅小徑，空氣中彷彿仲有當年嘅味道。喺呢場「一個人」的散步中，我唔再係被事業同壓力綑綁嘅軀殼，我係喺圖書館搵緊書嘅少年，係喺操場上奔跑嘅青年。
行到一半，迎面撞到一個白髮蒼蒼嘅教授，佢仲認得我。
當時我戴住耳機，正正沉浸喺林子祥雄渾嘅歌聲之中，耳機入面唱住：
「途人路上回望我，只因我的怪模樣；途人誰能明白我，今天眼睛多雪亮……」
呢幾句歌詞，彷彿就係我當下嘅註腳。耳機隔絕咗現實嘅聲音，我只係隱約見到教授個口喺度郁，佢驚訝咁望住我，再望下我身邊空無一人嘅位置，笑住問：「咦？麥田同學，你哋返嚟探我呀？」
我個腦仲停留喺歌詞嘅世界，幾乎冇經過思考，就跟住佢嘅話講：「唔係呀，我哋返嚟行下㗎咋。」
講完，我先醒覺，邊度有「我哋」？只有我自己一個。
教授笑而不語，拍拍我膊頭就走咗。我一個人企喺原地，有啲尷尬，但又覺得好好笑。係呀，或者喺呢個千禧散步嘅時空裡面，過去嘅我，同而家嘅我，就係「我哋」啦。
呢種散步，唔需要保鏢，唔需要聽人呻，唔需要接order，更加唔需要銀行戶口好多個「圓」，唔駛搵命搏！
方、三角、圓，構成咗我哋嘅世界。散步成就咗我們心靈！
你可以真實地行出去，亦可以喺虛擬嘅世界，喺方格子嘅字裡行間，搵到你嘅共鳴，完成一場心靈嘅救贖。
救贖從來不需要儀式，但你可選擇用喜歡的事來享受救贖，我的選擇係乜野？
聽著林子祥的「誰能明白我」，坐在大學站遙望的眾志堂露天位嘆著一杯無糖無奶的Black Coffee！耳機入面，依然係林子祥嘅《誰能明白我》。
首歌去到尾段，唱住「用歌聲用歡笑，來博知音的讚賞」，我輕輕笑咗一下。 我唔需要讚賞，亦都唔再刻意尋求知音，因為我已經搵返自己。
此刻，我只需要歌中另一句歌詞嘅力量就夠：
「前路那怕遠，只要自強。」
一杯咖啡，一首歌，一場散步，足夠我重新啟航。
今天無帶那方形的 M O U S E，不用電腦了，看著圖書館借來的書：BLACK HOLE！
咁，究竟係一個人行，定係兩個人行？
我會一個人行。
隔離個位，預比你，
來吧，一起千禧散步！！
