481 「趁(tan4)食」 佮 「賺(zuan)食」
台灣對話（會話）內底，「趁食」佮「賺食」噯分互伊清楚，才袂顛誕去矣！
(一) 趁食，tanzia44，指一般人為著顧三頓，付出勞力拍拼去工作趁錢來飼嫫囝安呢。
(二) 賺食，zuanzia14，指用比較不正常e手段抑是奇怪e撇步去趁錢，如賊仔賺食卯有過，即攤恁父賺食袂茖（lak5），想一下辦法，給賺食起來！
482 冓演 比賽
演講比賽，正確應該是「冓演比賽」gangyen bisai，這是台語「倒裝詞」e關係，無啥乜着毋着，講慣習叨好勢，筆者佇民84～94，即十年中間做過十外場e教育局e台語比賽評審，有幾个感想。
「民國87年台北市鄉土語言演講比賽」這短短e幾字中間有三个問題，我佇庶當時，有給提出抗議。
(1) 「鄉土語言」應正名為「本土語言」，「如果是鄉下人才講的話，那何必城市人也講呢，這根本是矮化與歧視！」
(2) 「演講比賽」應改為「講演比賽」，此涉及台語文法問題，連主辦單位自己都搞糊塗去了。
(3) 當年通用音標佮TLPA正拚得火熱，主辦學校依官方TLPA示範時，曾引起通用派之嚴重抗議。
（以上第1點，民97年元月教育部已更改）
483 漳泉e〔l／j〕對應
台語分為漳州話佮泉州話，尹中間九成五仝款，毋閣有一寡地方性e腔口，宛那無仝款，這當中以l／j音相差卡心適，尹雖然音素有差別，毋閣佇實際發音時，兩者「幾乎相同」並無不同腔e缺點，這是真特別e所在。
如日泉lit／漳jit，尿泉lio6／漳jio6，裕泉lu6／漳ju6，吓使看做泉音卡重，漳音卡輕卡濁安呢，目前二腔混合。泉系稍占優勢，毋閣佇嘉南平原宛那有伊e優勢腔局面，伊佇拼音文字，有好處，如柔liu／jiu，咱吓使用lju做單字，安呢雙爿攏有照顧叨著。
484 椅蓧〔yiliau12〕
椅蓧yiliau12，佇台語文化內底是一款真重要e名詞，伊是長條椅仔，約160cm×20cm×高70cm，四个椅蓧拄好圍一塊四方形e食飯桌。目前各大收藏所，博物館攏看吓著，筆者細漢e時瞬，佮伊逗陣有著，有十外年e經驗，吓使講感情真厚安呢甡，各位若有興趣欲看，上簡單叨是去「蘆洲市李友邦古宅」看看叨知影。
即款椅蓧，即三百年來，影響台灣人e生活真正大，伊至尐有下腳四項功能。(1)做椅仔坐倘來食飯，(2)三个椅蓧橫排e時瞬，吓使當做眠床來睏，(3)將椅蓧直徛時拵，吓使做五月端午節e縛粽e骨架，頂頭e腳吓凍綁鹹草線，(4)正月初九拜天公時，四隻椅蓧，頂頭縛供桌e四腳，即个時瞬供桌高高在上，拜天公伯仔上好勢，筆者細漢時，印深深刻。
485 後增 , 是啥乜 ?
後增，音auzan31，叨是六歲囡仔e「第一齒大臼齒」，（上下左右各一顆，攏總有4齒安呢），囡仔齒（乳牙）一爿有五齒，佇後壁閣“後面增加”一齒，叨是第6齒矣！也叨伊是後壁加發e嘴齒，所以老祖先叨已經號名叫「後增」，這是真有學問e代誌，即齒“後增”發出來e時瞬，無張無弛，有一寡做母親e家長毋知影，一直掠做伊宛那囡仔齒，若甚早蛀e時瞬，會錯誤判斷，失去填補e先機。
486 「赤色」e解釋 , 稍寡無仝款
赤色，ciasek45，佇台語，日本話，北京話e中間意思稍寡無仝款，噯給了解。
(一) 赤色，台語一般當作「赤土色」講，赤土色、黃土色、紅土色，卡尐純紅色，（否則會直講「紅色，大紅色」），台灣人紅包，袂講赤包啦。
(二) 赤色，佇日本話噹中，指純紅色，如赤十字會社。
(三) 赤色，佇北京話中，大部份攏指紅色，「赤化、赤色中國」。
487 台語 指紋學
目前用「(1)指紋(2)瞳孔(3)DNA，吓使來辨別人，佇茲建議「台語腔口」宛那吓使親象指紋來辨識人，方法是安呢，目前漳泉斥無仝款腔口約有150字，先製作好各種腔口e選擇題，續落呤，叫受試者用筆勾出伊上介親切上介時常講e腔口，若安呢150字，可能吓凍排出億萬種以上e排列組合，達到辨識e作用。如「去三重埔溪尾街買雞、鞋、紅龜粿」，干礁以上寥寥數字，叨有128種可能e差異。
488 台灣e「猴」佮「狗」
政論家張友驊佇總統選前，有一擺佇電視講，「民政黨佇立委大敗後，謝長廷居然能把馬英九一路追殺打擊極為強勢，他有彌猴的聰明和狗的勇猛……」，即做評論是真心適，嘛真有理，長廷仙表面溫文儒雅，毋閣出手嚴厲力頭真飽安呢。
台灣彌猴是全世界上巧e猴類，台灣土狗嘛是全世界上凶猛e狗，即二項動物出名全世界，有阿啄仔來台灣調查，尾溜也無成功，也叨台灣話甚歹學爾，伊學猴gau2是第2聲，猴肉e猴gau3是第三聲，卡停也狗gau4是第四聲，狗肉e狗是第1聲，伊一工到暗佇gau中間1聲，2聲，3聲，4聲，無甲真亂真茹，伊連語言叨矯袂好勢，才咧怨歎講台灣話歹學、真正有影。
489 倒閣 ,國語台語 解釋不同
「倒閣」一詞，台灣話佮北京話e意思無仝，毋倘濫濫做一个，魚凡魚，蝦凡蝦，毋倘水龜濫田螺。
(一) 倒閣，台語e意思叨是「公司倒閉，事業倒閉」e意思，即嗎經濟無好，迭迭有公司倒閣，真正可憐。
(二) 倒閣，北京話e意思，叨是「政治上，行政院倒閣矣，各大部長換人，院長嘛換人做！」
490 揙(bii4)面，變(ben4)面
台語「揙面」佮「變面」，是完全無仝e二回事，毋倘單獨濫做講「變面」一詞爾爾。
(一) 揙面，biimin46，是「翻臉了」e意思。「一下聽著安呢呤呤，頭傢遂揙面矣，代誌歹紡矣！」
(二) 變面，benmin46，是一般面容改變，如美容去痣，去魚尾紋，抑是四川戲變面e工夫安呢！
以上二詞、音義攏無仝款，毋倘用仝字，安呢台語文才吓幼秀。
491 阿海
1945～1950中間，發生二二八事變給白色恐佈，台灣人佮外省人中間，感情起了變化，得著政權e外省權貴，優越感重，凌治全台灣e艱苦人，嗯才e瞬呤，台灣人稱外省人號作“阿山兮”〔aswei〕，佇下港方面，宛那有人叫豬標兮，咬柑仔e，省籍e對立問題，互台灣人佮外省人，生活佇互相輕視佮對立中間。
既然台灣人叫外省人「阿山」以上，相對e台灣人有時瞬嘛自稱家已「即海」，這宛那e時代造成兮。
「呾阿山兮ga掌握軍事財政以上，即聲阿海噯卡拍拚e，卡巴結e！」
492 人肉鹹鹹
人肉鹹鹹langvagiamj3532，即句話表示「耍賴皮，拒不還錢」e意思，亦叨是講「叨算汝給我割肉塊仔，我宛那無法度叨著」，所以講借錢互朋友，噯真注意，毋倘錢了去矣，朋友亦無去矣，安呢叨醜材矣！
人肉鹹鹹e解釋，並無確定，一般e講法，是人肉鹹鹹無法度哺，汝給我摋嘛無卡擢啦，這有真贅款e講法。
493 紹介
佇日常生活噹中，有一句迭迭用著e話語，不時吓講毋着，伊叨是「紹介」siaugas63，普通咱攏受北京話e影響，攏講「介紹」雖然是聽有啦，毋閣無理想，這代表台灣文化受署外來北京話同化中。
台語當中，有真贅「倒裝詞」，如鬧熱、風颱、腳手、冒仿、青紅燈……，即即字「紹介」嘛是其中e一个詞，噯稍注意一下。
「阿明，我給汝介紹一个好朋友」（不妥）
「阿明，我給汝紹介一个好朋友」（優）
Amq，qgxli sbgai zl hzbyu。
494 zia有三字，噯注意
寫台語文句e時瞬，噯特別注意，zia音有三字，互相中間無牽連，噯分互伊清楚，才袂舞亂去。
(一) 茲，名詞，此地，茲是啥乜所在？茲有啥乜特產否？
(二) 迮，副詞，這麼，迮尼好，迮醜，迮好心。
(三) 才，連接詞，才是，才有，才是，才欲，拄才
「拄才入來e學者，是阮茲上介出名e專家，伊實在迮尼優秀呢！」
495 「早起」有麻煩
台語「早起」同時表示
(一)zaiki14“早上”e意思。建議用「載起」, 以資區別 .
(二)zaki14“很早起床”e意思。
以上兩者，音義皆無仝款，袂使用仝一个詞“早起”，抑無寫起來e文章吓亂作一團，即个問題真費氣，我嘛無法度。才寄望逐傢提出意見來解決，我e意見是zaiki (早上)，用“載起”。
496 土龍 , 念toling ? toliong？
土龍，是庄腳親象鰻類e大補品，價賬真貴，毋閣伊e唸法真混亂，到底是唸 (1) toling32抑是，(2) toliong32，正確答案是「toling32」，音如「土鈴」，伊是白音，佮「拜拜時弄龍，生肖……虎兔龍蛇……」讀音仝款，佮文音「龍山寺」旡仝款！
497 桶盤，桶盤嶼，桶盤面兮
桶盤，tangbw12，是大型e台灣料理盤子，它是扁圓形（橢圓形），大概40cm×25cm，內底吓使囥足贅食料，佇請人客e時瞬，不時看吓著（如頭一齣冷盤，如牽鹼魷魚荷蘭豆肉片），毋閣目前一般非純台式餐宁已經絕跡矣，所以少年人真尐人看過。……另外桶盤璵佇基隆外海孤島，伊e形狀像桶盤狀（可見台灣文化e心適），桶盤面兮，叨是「人長得方面大耳」，親像桶盤仝款，大大py，人真精光頭殼真好。
498 「煠sa4」佮「煑zu4」差別
台語界內底，「煠sa4」佮「煑zu4」迭迭分袂清楚，噯佮伊講好勢，安呢文句才吓通順好勢。
(一) 煠，sa4，「用清水簡單白煑，一樣東西通常是短時間而已，如去煠一塊三層肉，去煠一把應菜。
(二) 煑，zu4，「可用清水、醬油、味噌……，較複雜煑很多樣東西，時間可長可短，可煮至糜爛……」如去煑一碗雜菜麵互汝食，去煑一碗海鮮糜……。
499 nadak 31 , 啥碗膏？
漢字本屬於溫帶所在e文化，尹若是欲形容熱帶所在種類繁多e水果時，迭迭「捉襟見肘」，無夠字倘用，所以噯借字來用，有時仔佮實際e水果差真贅，如旺梨，伊根本叨毋是「梨」，楊梅伊嘛毋是「梅」仔，另外上介譀（ham3）e叨是「楊桃」伊根本叨毋是「桃」仔，實在講，佇台灣北部地區，叫「楊桃」叫作nadak 31，近似“籃觸”，伊即个名稱真鄉土，各位好朋友，後日仔看著楊桃，汝著大聲佮叫“nadak 31”，這是咱e文化，伊毋是「桃」仔。
500 碗e大小 噯分
碗，w4，即項物件，佇日常生活當中，真正要緊。欲了解台灣人e文化，絕對噯先分互伊清楚：
(一)（上大型）碗公：大型碗，直徑約15～18cm，叨是咱咧食牛肉麵彼款。
(二)（標準）碗頭仔：一般日常生活e飯碗，直徑約10cm高約5cm。
(三)（稍小一點）碗甌仔：比碗頭仔稍小，直徑約6～7cm，高約5cm，一般餐廳「辦桌」用e碗形。
(四) 碗洗 (wse 14) : 直徑6cm左右，高約2.5cm較淺，有各種形狀，囥醬料、佐料。
(五) 茶甌仔，酒甌仔。
501 赫hia，遐hia
台語寫作e時瞬，有二字迭迭吓肖濫，噯真注意，一字是副詞e「赫」hia，意思是「那麼……」，如赫歹，赫細間，赫好，……。另外一字是名詞e「遐」，意思是「彼个所在」，如，遐是阮故鄉e學校，汝佇遐咁猶有親戚置e？遐有蹛外贅人？……
以上「赫、遐」即二字佇台語界早叨「約定成俗」做標準字，最近有人提倡，逶「赫尼好」改做「遐爾好」安呢是無妥當啦！
502 茄色e～台語e精華
台語逶“紫色”叫“茄色”，這是一个真偉大e「發現」，茄色是紅色綠色e混合物，佇實驗室真容易做法，毋閣佇宇宙地球中間，真尐有天然物是茄色（紫色e），日常生活噹中閣卡希罕，不而顧呢，真拄好，茄e色水拄好是紫色e，而且色水真準，比實驗室配色閣卡準，用伊來代表紫色真正好看閣好用，小弟有時也去菜市仔踅踅e時瞬，一時無聊，迭迭吓買二條茄，毋是欲食，是單單一再欣賞伊天然e紫色爾爾。
503 台語「青色e」容易糾紛
台語文寫作e時瞬，有一个嚴重e字詞，著是「青色e」問題，到底“青色”是指1.“綠色”，毋閣有時瞬少數場合, 嘛吓使當作2.「淺藍色」吓講，譬如「天頂青青，青天白日」，即部份是受著北京話e影響，安呢來著色，代表綠色閣藍色，一字雙義，並無合理，小弟e意思，是「青色」即个字詞取消，直直用“綠色”“草綠色”淺藍”“藍色”叨吓使矣！講一个笑話。目前台灣e民進黨佮國民黨爭甲「你死我活」，藍綠之爭極為嚴重，青色既然同時代表藍綠，不如把台灣e政黨叫“青黨”叨吓使，雙方攏有包含在內。
504 拍鐵仔褲
牛仔褲，佇社會上真正流行，伊簡單、方便、耐用，上重要叨是伊e形體真嫷，吓凍表現出優美e人體曲線美，一寡少年人攏真佮意，台灣有一間工廠，專門咧做即款褲，工場嘛楦到美洲去，趁袂尐錢，算起來，伊是一款世界共同e認同物，確實磊斗安呢！
牛仔褲，台灣話欲按怎講，伊號作「拍鐵仔褲」patiako4113，即e名詞大概佇五十冬前形成e，彼時e形象無好，打鐵仔是一項艱苦硬斗e空課，逐工佮烘爐，鋼板「打交道」，台灣人現主時食飽穿燒，噯回想卡早乏搭e日子。
505 菅蓁壁 (念 官真壁)
自細漢e時瞬，叨有聽著阿伯仔咧講「菅蓁壁，土角厝」接怎按怎。知影奚是散赤人咧蹛e所在，也叨無看過e關係，一直無印象，佇我初中高中時代，去淡水要e時瞬，迭迭吓經過一位叫「菅蓁林」e地名所在，感覺真奇卡，一直想欲看其中奧妙。（佇紅樹林捷運站附近）
前幾年去蘆洲市李友邦故居，三級古跡e時瞬，內底有示範菅蓁混合粘土做成「菅蓁壁」gwzinbia663 e實際情形。「百聞不如一見」，示範物非常精緻幼秀，互我真滿意嘛真謳咾，即嗎一般人謙虛講家己厝細間無額，叫伊e「菅蓁厝」，叨親象華語「蝸居、寒舍」一般。
506 再讀 「阿佬仔」
進前有講過，「阿佬仔」〔alr-ah〕是台語「寶貝兒女」e意思，有e人咧講，「佬」字吓佮華語中e「佬」肖濫，而且華語e“佬”字，是一个無外好e字眼，恐驚也推廣有問題噯量早考慮伊e缺點。
即个問題，有二个可能解決 , (1) 組織委員會，共同來決定新e用字，如 阿咾仔……，來閃避華台用字衝突(2) 依原用“佬”，以台語上大e利益為主，無咧管華語e問題，這是無仝語系，所必須付出e代價。
507 起彎
起彎，念ki-wann-i，是真特殊e半鼻音，真有氣魄e字詞，本詞是真重要e字詞，吓使講逐工攏用吓著，毋閣隨台灣話喪失教育權e關係，年來急速凋零，即嗎三四十歲以下e人，真罕咧使用。
起彎，叨是北京話「故意挑釁鬥狠，蠻不講理窮凶惡極之態」，一工到暗「找碴，找人鬥打」，即款凶煞惡神，日當生活若拄著，叨趕緊閃避才好。
「阿明啊！緊唗！山腳彼陣歹囡仔，不時吓來起彎鬧代誌！」
508 再談 磊斗
頭前有講過「磊斗」ledau44一詞，意思是“美好”，伊吓凍表示山川、國家、社會、人事、容貌、收入、感想、思想，是一个範圍真闊e台語詞，照理講噯好好利用才著，毋閣因為失去教育權e關係，一直咧落坑，目前偆台北、淡水佮南部雲林縣猶有尐數人咧使用，噯大力給救援叨是。
磊斗，佇早期有人寫“麗斗”，意思卡“鮮明”，毋閣尾溜也卡佇一个問題，麗le6，變調了後le3，這佮磊斗ledau44，佇讀音上有毛病，嗯才洛尾也，漸漸無用“麗斗”，改用“磊斗”。
509 愛慕 姑娘仔，有分等級
台語文化，對愛情e描述，有分階段，袂使顛誕去，看啥乜用詞，叨知影佇啥乜階段，以下三階段，愛意漸漸加級。
(一) 對……姑娘仔有「佮意」〔gayi43〕，有初步e愛慕，好印象，試看覓，機會機會宛那真好。
(二) 對……姑娘仔有「意愛」矣，有進一步e愛戀，而且欲積極e介入，對競爭者吓「吃醋」。
(三) 「去歃著」〔saadio43〕……姑娘仔，「極端愛慕，生死以許」，台灣話講「去歃著頂腹蓋（橫隔）」安呢。
510 塗角厝（土角厝）
前幾工看電視，有一場拆除外省眷村e鏡頭，矮矮磚房確實老舊，（但如說當時眷區住屋落後，則事實未必），也叨彼時拵台灣人有閣卡落伍e厝，叨是「塗角厝」，比外省人e磚瓦眷村“落後太多”，小弟（筆者）佇小學階段猶蹛過即款「“土角厝”」，彼時看著關渡埔頂e自強新村眷村非常羨慕e呢！塗角厝，一般寫土角厝，叨是用粘土佮稻草所塑成e「泥磚塊」，即物件來砌e厝，配合「芊蓁壁」，定著“險象環生”，奚哪叨閣講！
511 「著」 佮 「着」
台語文章內底，逶「看到 佮 看對」攏仝款寫做「看著」，安呢無妥當啦！安呢無幼秀啦，汝看華語內底兮甲真清楚，「我看到人，我看對人」，台語則一律講「我看著人，我看著人」如何吓凍分辨，利用“看著”無仝，正確應該是「我看着人，我看著人」，毋閣，差不多所有台語文作字攏逶“着”用“著”，即聲積重難返，我佇茲建議，※ { 「我看到人」用「我看著」人，「我看對人」用「我看着人」來分別。}（註：着 字，最近電腦已有法度拍字）
512 自來
有一寡台語戲劇，受華語影響，逶「自來」改用「一向」，安呢是無妥當啦！自來一詞用甲真踥，噯好好挽救。
（不良）阿明一向叨毋捌講白賊，即嗎哪吓變軟？
（優） 阿明自來叨毋捌講白賊，即嗎哪噲變軟？
（不良）我信任伊，也叨莊議員一向叨毋捌買賣。
（優） 我信任伊，也叨莊議員自來叨毋捌買票。
513 烏貓，烏狗
烏貓oniau61，烏狗ogau64，是指「時髦男女，風流俤儻，意氣風發，眾人稱羨的王子、公主」，即句話佇即百年來，一直用到近代，即嗎宛那猶有人講，毋閣漸漸互北京話「俊男美女」一句話來代用，實在真可惜。
古早e日子，生活乏搭，佇庄腳，抑見半城內迭迭吓看著一批少年仔，「油頭粉面」，做人客氣，錢銀便便，厝內田園十外甲，又閣是厝內e大孫……，嘛讀高中讀大學，揙做全庄頭姑娘仔羨慕e對象，叫做「烏狗，烏狗林兮……」。另外姑娘仔，厝內好額，厘號大人風光有地位，做代表做幹事，姑娘仔穿插嫷，氣質好，逐傢肖爭佮意，叫「烏貓，烏貓英仔……」。
514 熗注
熗注，ciangdu45，音近「嗆杜」，叨是「故意去挑戰你」，有一絲仔挑釁e意思，即句話佇幫派中間不時吓用著，一般普通人卡尐搕著（kapdio15）。
「注」是跋激e押注，唸du5，伊是特別e破音字，台灣話內底，拚注bydu45，熗注，攏是卡特別e字句，中間加減有“機會，危機”e意思。
515 奧步, 應是「慪步」
選戰激烈，報紙頂頭，迭迭有寫「……人，使出奧步」，這是無正確e講法，「不好的步數」台語叫「慪步」 aubo46，另外「奧步」唸rbo46，是“困難e部數”e意思！
目前社會有一个無好e現象，叨是「伊一方面欲用台語言詞，另外一方面又閣無尊重台語e用法，稱採用一个北京話e仝音字來代用叨好勢，譬如講強強滾（沖沖滾），霧煞煞（霧霎霎），攏是安呢，這愛改進，抑無，長久了後，「約定成俗」，到時改袂返來，吓影響台語文寫作e系統安定性。
516 吐劍功
吐劍功，叨是「暗中較勁」e意思，現時五十歲e以下e中年人，有看過卡幼秀e歌仔戲，攏知影，佇戲台上演e歌仔戲，卡有咧做即款戲齣，戲搬到一半e時瞬，燈光禁熄，「鑼鼓齊鳴」鬥爭e雙方，各佇舞頭e一端，放出長束電光，斜往上空，向對方向出，這時瞬「鑼鼓齊鳴」，黑暗中有兩條長光在空中交戰“爭戰不已”，即款e過程叫「吐劍功」，目前來形容“雙方暗中較勁”，雙方暗中鬥爭，真好e字詞叨是。
517 肝，肫e俗諺
台語有一句真心適e「自我陶侃」e話，叨是「啊！做大官無啥希罕啦！汝做汝e官（肝），我做我e肫( gen6)嘛是袂醜啦。」逐傢哈哈大笑。
佇普通時仔，若是拄著ut卒艱苦e時瞬，有時仔借語言諺語嘛吓凍消透來化解，有一擺看電視，張帝ut卒，輕打了一下張魁，氣氛尷尬，張魁不愧是化解高手，馬上叨講「唉呀，打什麼打，打要打小孩仔，怎麼打起老人啊？」雙方哈哈大笑，化解一場矛盾。
518 皮下脂肪
台語話對「人體e脂肪」有幾落款e名詞。
(1) 大油，指大塊脂肪，尤其以腹部表層為大宗，（zw4）豬油叨是用即部份e油。
(2) 網紗vangse，指「腹部深層散紗狀油脂」，雖然伊e量無贅，宛那有價值，佇彼个物質欠缺e年代，辦桌做料理時 ,吓凍包肉塊蝦塊, 有伊e價值。
(3) 皮下脂肪，台灣話叫「裏瓤，裏瓤油」lingyu332，即款e形容真正貼切逗搭，伊親象瓜類e內延，即句話跟“老化”有關係，皮若攝攝叨醜材矣，皮若膨皮叨真嫷，所以講佇古早用了真贅，可惜近年來受北京話影響，尐人講。
519 anigi , 大哥啊 !
anigi 615，來自日本話，叨是「某某大哥」級人物，大致是有錢有勢，喚水吓堅凍e重要人物，普通時也，身邊宛那有一寡“囡仔”（部下，爪牙），來保護伊，來晟伊e聲勢。
戒嚴時代，有一擺佇某歌廳唸聽，忽然間有“anigi”出現臭警察仔掠做伊唸日本歌，違反國策，「要罰錢」欲掠人，領導者「急中生智」，馬上給警察講，伊唸「安呢去（aneki），毋是大兄（anigi）啦」伊是咧冓台語啦，化解一場風波。
520 夭壽 , 不一定坏話
一般台語言詞，逶「夭壽」解釋做「短命，不幸啊，缺德」雖然無毋着，毋閣呢，伊有另一个真要緊e用法，逐傢噯注意，夭壽，叨是「非常……」e意思，「唉，即份料理，夭壽好食」「無疑悟阿明遂夭壽敖讀冊，看伊安呢不吉不吉」即个「夭壽」即个詞，發生佇語詞轉折虎，「極為傳神」，請多多使用.
521 嗯著
台語有一e真重要e前助詞「嗯著……」，近年來有急速凋零e危險，我佇電視劇中，已經真尐聽著即句古早不時咧講e助詞，伊e意思，也就是，話說要「如做人艱苦，嗯著卡搰力卡巴結e！」，伊e發音mdio容易給「毋着」肖濫，（佇桃園市閩南語文縣P57有寫「毋著講」……），發出矛盾現象，所以建議用，“嗯著”來分別。
522 好，咧好八擺e呢！
烏燒燒女士，最近出一塊唱片，咧好八擺e呢！利用高知名度來推銷，毋閣無外久遂發生挺馬事件，舞甲滿面全豆花，「好，咧好八擺e呢」，接近，「有什好啊！好个屁啊！」
女士為卡早謝先生為仇家辯護，懷恨在身，放棄本土，投入中國國民黨，由綠轉藍，「以求大勝同沾喜氣，遂引起本土人士e土力反擊，講伊恩將仇報，有失厚道，謝先生當年為綁南非武官事件，親身冒死潦落，非公道自在人心，好咧好八擺e呢！
523 「月桃」e重要性
佇在早農業社會，「綁物件」除了麻索、草索仔以外，上重要叨是「鹹草索仔」佮「月桃索仔」，這真心適。
月桃，出產佇郊區小山崙仔，（北部尤多），高度約2公尺，葉大，橢圓30cm×12cm，伊e莖桿纖維質真贅，鄉人去山頂，剉月桃返厝內後。(1) 伊e葉仔真大板，吓使做粿葉仔（主要是包甜e粿，另外包鹹e甜用另一種粿菜樹一波仔樹）。(2) 將莖桿用槓搥仔，扑互伊必互伊碎，才擔去曝日頭，了後叨是真用e「縛索仔」，伊e重要性佇彼个物質缺欠e年代，真正要緊，茲e代誌，小弟細漢e時代攏有做過，印象真深安呢！
524 e，er
國語佮台語e音韻，有一个所在倒翩，噯給注意，伊吓影響著人e「腔口」，佇國語中「e」音有趨向「er」的性質如「這ㄗㄝˋ」慢慢變成「這ㄗㄜˋ」，佇台語當中拄好倒翩，如「火ㄏㄜˋ」有趨向「火ㄏㄝˋ」（台北腔），古早e泉州腔→台北腔，目前台語漸漸整合成「台北腔」「台南腔」兩枝，毋閣佇百冬進前，全台北講泉州腔e人是「滿坑滿谷」，毋是目前噯去鹿港尋少數人做「樣版」爾爾。
525 代誌 食力 矣
代誌嚴重了，台語叫做「代誌食力矣」，「即嗎食力矣，欲按怎才好？」，食力e意思不明，是毋是「心情艱苦，可比講肩頭負擔力頭」這毋知影。
食力，唸zialat31，佇北部地區，有e人唸音稍帶半鼻音，zylat31，二款唸法攏正確，拍算（可能）是甚過了“誇張”，音調稍寡走音，各位好朋友，後日子，汝若是聽著身邊有人大喚「食力啊！食力啊」，表示糟糕了 ,叨噯提高警覺，可能搪咧發生代誌噢，如火災、車禍……。
526 擔笪
台語「擔笪」，袂使寫「擔擔」，因為這牽涉到語系音義衝突，袂使無注意e。
台語漢字e第二个規則是「凡是音、義、詞形這三者攏仝款e時瞬，袂使用仝一字漢字」，這是無仝語系轉變時，所必須付出e代價（否則可以不用，可考慮用拼音字），(1) 擔：daa，挑起，動詞。(2) 笪，daa3，竹架，名詞，以上三者攏無仝，所以袂使用仝字“擔擔”，佇北京話內底嘛是有分開，伊用“挑擔”，來閃開。
527 伊咧講 有咧講
台語「伊咧講……」，佮英文現在式，現在進行式差不多，毋閣大部份e場合上好是講「伊有咧講……」這是過去完成式，咱咧講代誌，已經發生過e卡與大頭，拚著「將來式」，叨「某人即欲……」。
目前一般台灣e少年人講話時，受國語影響，真贅逶「有」給攽袂記e，噯給改進，伊e文法佮英文仝款，講慣習矣，英文嘛吓卡好勢！
528 台語“頭”系統
台語e文法內底，真愛講「頭」即字，吓使解釋做「主要內容，重點內容」。
「路頭」 「湯頭」 「藥頭仔」 「歲頭」
「話頭」 「組頭」 「花頭」（戲班主）
「qen4頭」 「總君頭」 「烏頭車」 「利頭」
伊e組合，大部份是「名詞＋頭」抑是「形容詞＋頭」，使合成一款真心適趣味e語言系統。
529 「囡仔 歹飼」，有怪名
父母飼囝真艱苦「今古皆然」，囡仔咧大漢e時瞬，迭迭吓破病，返晟袂順序，算起來真硬斗叨著，卡早e嗣大人真古意，為著欲求天公伯仔逗肖晟，吓下願講，只要囡仔好唷飼，甘願家己受苦受難，用怪名，求取上天e垂憐，所以有e台灣名真怪，啥乜雞屎、闊嘴、歪面……無，甚至男用女名，台灣青果大王大富豪，尹老母嘛給號做“陳查某”（實在伊是查甫）。
530 猛虎奧擋猴拳（群? )
有一句閒仔話「猛虎奧擋猴群」，「寡不敵眾，團結叨是力量」，有時仔吓誤解「猛虎奧擋猴拳」，這是仝音無仝義。
不而顧，社會上宛那有太極拳、猴拳、獅拳……，有尹e學問佇e，「也叨猛虎奧擋猴群，有時也宛那摯節袂稠安呢！」
531 ……做了有起呢( ne)！
古早e台灣人，足愛講一句「某某人……，做了有起呢！」即句話，有時瞬是咧謳咾仈人，毋閣有時也是咧鄙相（piisiuu44，挖苦）人，噯真注意，即款話毋倘烏白講 , 若是有聽著即款話，是毋是有人對汝不滿，抑是對汝真佩服。
△「哼！閣敖 , 做了有起呢！」逐項hak甲迮膨沛，真正是市長伯仔做了有起呢(ne)！」
△「阿明即个人，勤儉晟茲弟妹，真古意，實在大兄做了有起！」
532 茲是「淡水車頭」，盡磅矣
淡水線，逶新店到淡水捷運，約30km，行程40分禮拜假日，有真贅人去觀光安呢，搪當列車慢慢也駛入淡水火頭時，有一段台語廣播「各位旅客，終點站淡水站到矣，請您順序……」以上台語廣播，並旡妥當，比較正確是安呢「也呾各位旅客，淡水車頭, ，拜託您……」。解釋 (1) 也呾：語前助詞，提醒之意。(2) 淡水車頭，著是台語「淡水驛，淡水站」e意思。(3) 盡磅矣，叨是終點e意思，台語e形容詞盡量囥佇後塹，簡那「路燈光光照大路，毋是「光光e路燈照大路」。(4)請多用“拜託”一詞。
533 甡甕
古早話，生甕sinn-ang 63，叨是身體長出瘤癌e意思，身體發出一粒「物件」，伊有「好物」hrmng／hrmi，宛那有「歹物」paimng／paimi，這是真正不幸的代誌，一般良性瘤，手術叨吓使，毋閣癌瘤，奚叨噯化療，手術真正費氣，最近醫學進步，有proton質子檢查e技術，互患病e機率降到上低，各大病院，紛紛亥重本咧裝設。
534 食大餅，食細餅
各位好朋友，若是欲嫁查某囝e時瞬，一定噯食古早式e「台式禮餅」佮「大餅」，伊是送定前一工所做e，真鮮真好食真捍味，千萬毋倘用外國鐵盒仔e禮餅，裡面「一小包一小包」細餅乾，安呢是臹無誠意叨著，古早人e禮數，嫁查某囝定著噯用大餅，抑著「細餅」，奚是艱苦人「新媳仔」（童養媳）一輩咧用e，安呢有卡失禮，毋閣，台灣人噯有家已文化e尊嚴，毋倘事事倚外國人。
535 漂碧e烏狗兄
台灣話e「烏狗兄，阿狗兄，漂碧e烏狗兄」，叨是表示風流多金，光彩迷人e少年傢仔，身軀邊錢銀洘洘洘，名聲好，人緣好，一四界受人歡迎。
即款人，佇少年e時瞬，四界交陪七仔一大堆，人生美滿，中年了後，有時踏入政壇，有時仔做頭傢人，佇家鄉庄腳，喚水吓堅凍，真有影響力叨是，人咧講，「有錢有勢，人情肖捸」。
536 江路，港路 互通
淡水河，鄉語叫「淡水江」damzuigang314，嘛有人寫「淡水港」，兩者各有優點，嘛攏有缺點，到尾溜也「江路、港路」互相流通，卡無強力制限，（抑若真正e「港」叨用“港口”代用，如淡水港口，淡水漁港）。
這按怎講？(1) 用「淡水江」時，江讀第一聲，無正確，毋閣意思正確。(2)用「淡水港」時，意思無正確，毋閣讀音正確，所以講，二款寫法，有攏正確，亦攏旡正確，隨在各人去決定叨好。
537 光，洸 分別
逶國語漢字，改做台語漢字，也叨系統無仝e關後，有一寡“盲點”吓出現，需要做改進，這是文化無仝，音韻無仝，必須付出e代價，抑無，家已吓「亂作一團」，若是無受承擔即款代誌，奚叨噯用拼音字卡好勢。
台語上費氣e代誌，叨是一字雙音、三音e困擾，以光字來講建議 : (1) 光，gong，光明，光彩，光輝。(2)洸，gng，（真正光線，借用水光e字），洸線，昊洸矣，安呢兩者分別有卡好勢。
538 「番」字，咁有歧視？ 阿啄仔番 ?
原住民不時怨歎，講福佬人叫尹「番」，番來番去番tin統，安呢是「歧視尹」，看原住民無到重，實際上並毋是安呢，台語「番」字，干礁是「泛指一切非我族類」爾爾，叨是「外人」e意思，無一定「歧視」，家已噯有信心。
台灣人叫山地人“番仔”，毋閣叫阿啄仔（美國人）嘛是「阿啄仔番仔」,民50年關渡茶園, 建拿撒勒人基督書院時，有幾落个阿啄仔行來行去，所有e關渡人嘛是叫尹「番仔」，無咧管彼當時美國是世界第一強國啊！
539 腳手混屯，食無份
「動作太慢了，往往錯失良機」「優柔寡斷，遇事推拖難以成氣候」人活佇社會，即款代誌不時吓發生安呢，也叨腳手甚慢，事後e後悔咁有啥效，佇現主時競爭e社會，尤其是台北人，絕對噯「當機立斷，劍及履及」安呢才袂顛誕。
「腳手混屯，食無份」是一句真實用e諺話，希望咱茲少年朋友噯了解其中e涵意，嘛吓使告誡身邊e朋友兒兄，做代誌噯卡拍拚喟e，卡積極e！
540 踏入……
「踏入」（dalip 31），叨是相當於國語「進入……」e意思，伊e鄉土喟口真厚，吓凍來增強台語對話e氣勢安呢。
「踏入社會」（進入五光十色社會）
「踏入恁林家e大門」（嫁入林家以後……）
「受著××e牽成，踏入……公司呤，」（受××提拔，進入公司……的時）
「做人逶出氏到踏入捾柴為止……」（出生到老死）
541 番花
番花，是啥乜碗膏啊！伊叨是古早時代，「人人著驚」e絕症「子宮頸癌」，伊發生e機率真懸，是婦仁人上介麻煩e大症頭。
古早醫學無發達，中年婦女死佇番花，真正悽修，尹嘛毋知這是癌症，破病甡菜花，全身浮腫艱苦死，伊上大e麻煩，叨是伊占婦仁人癌症e比率上懸，簡那查甫人e肝癌e，真正可怕安呢，佳哉近年醫學發展，噯做定期篩選，來保障民眾e健康。
542 酸甘甜也 (a)
梅仔，抑是臭茄仔（柑仔蜜）e再製品（蜜餞品），普通攏有「酸中帶甜」e好滋味，台語叫做「酸甘甜也酸甘甜」，形容貼切逗搭，真正心適，佇咱台灣地，鹹酸甜贅（蜜餞多），逐傢真有口福，吓凍享受多著各種口味，「酸甘甜也」即句話，拜託逐傢卡搰力去推廣，國語佇即方面卡缺（ke4）欠。
543 「小孩」e稱呼
(一) 對動物，「細隻」e，欲按怎稱呼？ 國語講「小貓、小狗」，台語袂使直接翻譯，上好是叫伊「貓仔囝（gy4），狗仔囝」，也叨「小狗一定是大狗甡兮」，以大狗e眼光來看「狗仔囝，貓仔囝」卡合乎倫理「嗣大嗣細」e自然生態。
(二) 對人來講，有幾落款e稱呼「囡仔」（qinah），囡仔栽（qinah zai），囡仔人，囡仔痞（pi4）」若是稱呼家己e「心肝寶貝」，台語叫「阿佬仔」〔alrah645〕有卡親切安呢。
544 縛鹹草，卡鄉土
目前縛鹹粽，大多數用棉線，取伊方便安呢，佇菜市仔買物件，大多數用「樹奶束仔」（橡皮圈），俗閣好用，即嗎想起來，細漢e時瞬，用「鹹草」來縛肉粽，來縛魚仔，豬肉，加臹鄉土叨著，真正懷念安呢。
阮故鄉關渡地，佇媽祖宮頭前（即嗎關渡水鳥保護區），有種真贅鹹草，到分(成熟)了後，用鋼線分別給剖爿，曝礁了後來縛物件，環保閣好用，即嗎因為工業化，無合成本，漸漸由其他材料來代用矣（註：庄腳二款縛線，除了鹹草，另外一款叨是月桃）
545 踮，佇 , 時態用法
捷運站e廣播，「欲去板橋、土城e人客，拜託汝佇第二月台就車」，有一擺國安仙咧提醒，安呢講無合台語e語法，正確應該是「欲去板橋人客，拜託汝「踮」第二月台就車」,因為「佇」是「已完成式」，另外「踮」是「未來式」，嘛吓使用佇過去式，伊e用途卡闊，如「後月日，我欲踮國寶店宴請人客」「阿明，下晡三點，汝欲踮啥乜所在肖等？」
546 厝 , 真tang洸
厝是毋是真「tang洸」，真正要緊，吓凍影響著人生e生活安呢，tang洸，叨是「採光良好」e意思，採光好，定著生活舒適精神爽快叨著。
「tang洸」e寫法，真正費氣，伊卡佇台語破音字e嚴重地雷中間，有人寫「通光」，音差太大 ,並不合適，小弟e意見，暫用拼音tang，日後才決定，光字大多數唸gong（光明，光輝），真正e光線，叨用“洸”（水光），這是台語華語系統無仝，所必須付出e代價。
547 活到幾歲 , 講 「食到幾歲」
台語裏面「活」字，真愛寫做「食」字，中文「我今年活到六十五歲矣」，台語講做「我今年食到六十五歲」，台語「歲頭食到……歲」，這是定型e例句，噯給人尊循。
台語「食」有「活」e意思，這佇問候話「食飽未？」，實際上e意思是「活得舒服嗎？」，與中文「你生活好嗎」「你好嗎」仝款e意思！
548 「過年炊甜粿」e心適
台語師資班，迭迭有講著泉腔、廈腔、漳腔e差別，下腳即二種發音攏正確，吓使給比較。（聲調略）
過 年 坎 甜 粿
台北腔廈腔 ge ni ce dii ge
台南腔漳腔 gue ni cue dii gue
鹿港腔泉腔 ger ni cer dii ger
※ 以上三種腔口，有伊e心適置e，（目前台灣地，以gue，cue，gue漳腔占優勢）。
549 安呢毋是頭路啦
「這樣行不通啦」一般台灣人受國語e影響，大部份攏講「……安呢毋是「辦法」啦！」，電視安呢講，報紙嘛安呢講，這無合台語e語法，台語e講法是安呢「……安呢毋是「頭路」啦！」〔ane msi taulo la〕，譬如講「一工趁一千箍爾，叨欲開銷二千箍，安呢毋是頭路啦！」台語「頭路」毋是干礁講「職業」爾爾，另外有其他e解釋「要點，要領」。
550 藝妲間仔
佇古早話當中，藝妲間仔，是上介無法理解e一句話，既然藝妲叨藝妲，哪叨啥乜“間仔”，講實e，這拍算（可能）叨是查某間e代名詞爾爾，為著欲提高家已e身價，烏白提別款物件來代用，（註：日本時代藝妲，無論是打日本鼓抑是南管三弦，攏賣藝不賣身）。最近「台灣鯛」e出口魚類嘛是犯著仝款e毛病，伊是海水e高級吳郭魚，佮鯛魚（烏格仔）無關係。
551 海水闊闊
曾經發生這樣的事，好友真久無肖見，重逢時瞬真正歡喜，遂脫口而出「海水闊闊」船頭宛那吓肖拄著 , 安呢講是無妥當啦，即句話是歹話啦，意思是「冤家路窄，天涯海角，總有一天會碰到」，伊通用佇冤仇人，一般好朋友袂使安呢講e，安呢講真失禮啦，（抑毋閣，即嗎e少年人流行「耍賴耍酷」，刁工來講反話，顛倒“心適”嘛有啦，不而顧呢，毋倘烏白亂用，除非是真matche忘年之交。）。
552 形容詞 ,分三級
台語e形容詞，宛那有三級，做為參考，以台語文法來講，動詞上介複雜、豐富，其他助詞、形容詞e系統嘛噯了解。
(一) 好，介好，上介好 (二) 好，上好，上介好
(三) 好，真好，上介好 (四) 好，臹好，上介好
(五) 紅，紅紅，紅紅紅 (六) 青兮，青青，青青青
※ 另外李鴻禧教授e出名句
（形容詞） 開，開開（61），開開開（261）
（動詞） 開，開開（15），開開開（615）
553 勇 , 簡那 新竹司（sai）
語言e代誌是離袂開文化e背景，所以有一寡文章，真歹翻譯，也叨無法度同時翻出伊e背景，噯另外閣再註釋才噲了解叨是，譬如講，台語文章內底，有「萬善同歸」即个字詞，外族e人根本看無，免講欲翻譯做英文，叨算講翻做華語，嘛是看旡一个芋仔蕃薯li！
勇, 簡那 新竹司（sai）咧，是民國40～60年間，有一位大力士叫新竹司，吓凍夯二三百重物，亦毋驚車輛輾過（隔木板），伊e腹肌真有力，伊一四界佇全省賣藥仔閣表演，是全台灣第一勇e人，小弟佇民國47年佇關渡有看過伊e表演，真精彩！
554 米糕泅 (siv2)
對婦女非禮, 上下其手，毛手毛腳，台灣話有一句典雅e話，叫「米糕泅」vigrsiuu162，即个米糕是北部拜拜用e米糕，伊是糯米佮白糖肖濫e半圓碗形貢品，頂端吓囥一粒龍眼乾，暗示胸部，拜拜煞了後，食貢品米糕，捏捏摸摸，油膩滑溜e，形影泅泅（黏糊狀），安呢e動作來影射「毛手毛腳」，也叨米糕e形狀半圓形，真容易想像，一聽叨知影。（※ 註：此地指北部米糕，另外南部米糕佮這無仝款，伊是相近“油飯”e非供品）
555 夆(hon 3)欺騙 , 有三階段
台灣人生活艱苦，歹命人一大堆，連去夆人騙去e程度，嘛是有分階級，真正譀叨著，台灣e偷賊，有剪鈕仔（扒手），kiang仔（扒兼側），正港e賊仔，搶匪……，攏噯張弛。
(一) [ 輕微 ] 「去互人bia5去」，卡輕e欺騙，簡單e財物損失，抑是去拄著假乞丐，假殘障，假和尚，了錢消災，換取經驗！
(二) [ 中度 ] 「去互人裝痟e」，中等程度e欺騙，「被騙得團團轉」，百貨公司大優待，挑了半天，大摸獎，但早已互家己人內訂……。
(三) [ 嚴重 ] 「去互人設計去矣」，大部份去舞著「詐騙集團」，有時仔損失十萬二十萬，甚至就百萬，伊大都利用人性e貪心佮同情人來詐騙。
556 僮乩
無論啥乜背景，啥乜族群，咱攏噯知影，「僮乩」文化是咱台灣人，真正要緊，真正有代表性e特殊點，伊吓使佮媽祖婆，歌仔戲，烏魚籽，茄苳……，仝款是台灣文化e代表安呢！逐擺我若看著僮乩遊行時，「服裝艷麗，動作誇張」我叨真受著感動，伊毋但是宗教爾，閣卡要緊叨是伊是文化e代表。（毋閣有e人批評伊是迷信，“不良少年e玩藝兒”）(1) 僮乩，不宜寫乩童，這是台語國語無仝e所在。(2) 僮乩，不宜寫童乩，因童唸dong2，而僮乩音dang-gi，毋倘卡佇音義矛盾。(3) 民間有話「伊講了有對僮」，袂使寫做「伊講了有對銅（抑是對筒）」！
557 講奚無兮(ei)
講奚無兮〔gong-he-vr-ei1131〕，即句話佇台語文句e應用真正普通，伊相當於「廢話嗎！」「這可沒道理！」※ 另外比較卡嚴重e字詞是「勿講奚有空無榫e」「勿講奚五四三安呢一大拖」「勿閣婁〔lau4〕下頦矣，留寡嘴舌倘勾湆」。
奚〔he〕是“彼”e意思，毋閣音無仝款，袂使用“彼”e，兮字是“e”懸音，台語“e”有低音、懸音，一定噯分清楚，安呢汝寫e文章，仈卡好讀好認。
558 「狗尾草」 毋是 九尾草
民間用e「狗尾仔草」，有人誤會是「九尾仔草」，有顛誕，伊e形狀親象狗e尾溜，短短粗粗毛毛也，聽兮講伊返大人，對肺脘有真好e功效。（待查）
佇艋舺龍山寺e「側巷」中間，有一條青草巷，大約六七十公尺，有專號車咧賣藥中藥藥材，若有時間，佇早起時仔，加減去給參觀一下，吓凍來了解先民文化的特殊點。
559 三芝 金面兮
三芝金面兮，一般人聽無，毋閣佇注重本土文化e先覺內底，這是真正要緊e文化，咱台灣吓使講是媽祖婆文化真興e所在，若有移民e在，叨有媽祖廟，無論福佬人、客家人攏仝款，毋閣咱佇都市內底，遂真罕咧看著媽祖廟（台南抑是鹿港例外），這叨是外來政權對台灣人統治，必須消除台灣e代表性文化，互台灣人失去甡張，失去共同e團結力，再利用“迷信”來肖逗，1895，日本來占台灣了後，逶「台北市天后宮」（現主時新公園博物館遐），給拆除，給消滅台灣人e民族文化，伊e媽祖安神像！信徒不忍心四散( 聽說是李登輝夫人後頭厝親人 )，給徙去三芝鄉「舊街e媽祖宮」伏祀，人稱為「金面媽祖」這真要緊！
560 再談「拜託咧」
目前e社會，無論是誠心誠意來招呼人客，抑是「皮笑肉不笑」干礁嘴唇皮肖款待爾，假仙假dak，尹攏有使用“請”e必要性，毋閣卡佇國語台語e差別，袂使用“請”字，請字是欲請人客，欲互對方好處佮舒適，咱即嗎「有求於人」，祈求對方互咱好處，噯用「拜託le」才有禮數！
（劣）即位阿伯，請汝逶車徙卡外口e，我有欲送貨。
（優）即位阿伯，拜託汝逶車徙卡外口e，我有欲送貨。
（劣）時機醜醜矣，請頭傢給阮牽成一下啦！」
（優）時機醜醜矣，拜託頭傢給阮牽成一下啦！」
561 「此路不通」白話
“此路不通”即款柴牌仔，真正普遍，也叨有e死巷，汝無先給講一聲，到時車du入去叨麻煩矣，所以講「此路不通」，即个字詞已經變成一般e白話矣，若準即个時瞬 , 咱台語e袂使猶咧用「不通，毋通」，加減會造成混亂，無論按怎，※ (1) 有通〔tong〕，是表示有道理e意思。(2) 有倘〔tang〕是表示“能”e意思，二者音義皆無仝款，拜託汝毋倘用仝一字“通”，這是台語欲使用漢字，所必須付出e代價。
562 加強 語尾助詞
台語有四个「語尾助詞」，佇目前電視劇，抑是囡仔台語中，漸漸來落坑（衰退），對台語文化e傳承真正危險，噯趕緊透過教育佮挽救返來！
(一) ……叨著（就是）「即項代誌，我真正感心叨著。」
(二) ……安呢（如此）「即項代誌，食力e所在叨是安呢啦！」
(三) ……安呢甡〔anesii〕「這是我上愛聽e歌曲安呢甡。」
(四) ……叨是（就是）「仈人e思情，噯記互伊稠叨是。」
563 自由聲調 佮 限制聲調
台語、華語、客語，茲e東方語言，佮聲調有真密切e關係，親象台語又閣有複雜e變調系統，伊真正緊要，嘛真正困難、嚴厲，如狗肉、猴肉一定噯倚靠聲調來辨別，這叨是「限制聲調」，限制聲調大部分一字一音e本形。
另外佇英文、法文、德文，尹是多音節e文字系統，本身e多音節，叨有法度辨別字詞e特別性，即个時瞬若是聲調稍懸稍低，攏無啥要緊叨著，毋但是聲調唸便“含混”，連p、b抑是t、d嘛吓凍“稍寡”給「渡過去」，這叨是「自由聲調」。
564 台語界「逗，鬥」大戰
台語e寫法 (1) 逗陣，逗做 ; (2)鬥陣、鬥做，有即二派e寫法，卡早吓記咧楊青矗e字典，有大力抨擊「鬥陣」e寫法，依小弟e看法「鬥做」可能有問題，伊雖然有古冊e支持，毋閣無合時代要求，「尹二人咧逗(快樂)」變「尹二人咧鬥(痛苦)」好事揙做歹事，安呢無安當啦，老仙覺國安仙有咧講，佇日本話當中「逗」佮咱台語宛那有肖抾合e所在安呢！
565 「輸人毋輸陣」e正解
輸人毋輸陣，一般人e解釋是「輸一人無關係，毋倘眾人攏輸，安呢叨歹看面」，事實上毋是安呢，伊正確e解釋是安呢「咱e族群人數雖然尐，毋閣个个精兵主義，團體一定勝利光榮」。(即人數雖輸人但陣是派頭不輸人)
古早迓神賽會e時瞬，有大陣頭，小陣頭，大陣頭聲勢浩大強勢鏘鏘滾，即个時瞬小陣頭e頭傢叨吓講話「咱e人數雖然輸人，毋閣技術卡幼秀，陣頭表演，比人卡敖，袂使輸人e！」
566 真利便
國語「真便利」叨是咱台語「真利便」e意思，這是語系無仝款e結果，佇目前生活中，7-11叫「便利商店」實在是無好，正確應該是「利便商店」，抑旡，實在是侮辱台灣文化，亦是族群對立e根源，當奚外來政權強行壓迫時，台灣人定著吓徛起來反抗，抑無寧可用“甘仔店”卡有古早傳統味？
567 牽鹼
目前電視有真贅煮菜e節目，嘛有真贅人咧觀看，有時仔看久嘛吓煮食安呢，伊咧煮食e中間，拄著「牽鹼」（叨是用太白粉水，直接入高熱e鼎，造成糊糊e菜色），有e袂曉講，直接用「勾芡」來說明，雖然無毋着，不過奚是台語節目，台語原本叨有e詞類，噯儘量給人尊重安呢！
568 問候語 , 上好依照 「人、時、地、事」
台語e「how do you do」，噯按怎講？上好毋倘講「你好」，安呢無好勢，台語e問候語，一般用「汝食飽未？」“未”字唸ve（北）／vue（南），伊e意思叨是備「汝即嗎平安否？汝即嗎舒服否？」
毋閣大部份e問候語，噯看彼時e時間地點，事物來決定，如 透早，用「敖早」，真久無看e好朋友，講「罕行。」「即嗎卡少年噢」「即嗎佇佗位咧好空」，著是想無安當e字詞，嘛吓使用教會用語「平安」「暗安」所以講台語e問候語有卡活潑。
569 「桀魚」e復名 佮 復育
台灣北部有五項特點 (1)綠竹筍(2)箭筍(3)草山柑仔(4)木柵鐵觀音(5)新店溪桀魚。
「桀魚」是日本時代台北所在，上介高級e淡水魚，伊出產佇新店到坪林一帶e溪水，伊e味真好食真貴，有體香，目前e教育制度改稱“香魚”，欲以政治力量硬來壓制原來e鄉土名詞，另外一个名號做「年魚」，也叨伊干礁一年e壽命爾爾，現時台灣人 飼e桀魚是逶日本引入來，（台灣早已絕種）。結果飼了比日本好，目前已俗賣，人人吓凍食，日本人來台灣觀光，看著台灣人「用桀魚當飯吃」非常欣羨講，才知影咱台灣人太福氣矣！
570 「坑 佮 谷」，噯分清楚
台語e“坑”〔kinn〕，叨是國語“山谷”e意思，並毋是「坑洞」e洞穴，毋閣國語內底嘛有「滿坑滿谷，皆……」e語句，可見宛那有淡薄也倚意。
台灣人佇清朝e時瞬，雖然互清朝人併吞，毋閣台灣人e語方佮北京話無仝款，北京無法度統治台灣，嗯才台灣人治安真醜，互相搶劫凶殺變做無政府常態，真正可憐，佇即款情形以上，台灣人真噯蹛佇半山e“坑兮”，(山谷邊), 安呢一方面卡安全，依山依谷好守衛，一方面水源嘛卡好，是真好生活e所在。
571 台語 “囡仔”另解
台語“囡仔”〔qin-ah〕，表面e意思是「小孩子」，毋閣有另外一个意思噯注意，叨是指“不良少年”，“鱸鰻囡仔”，這因為牽涉到危險e字眼，逐傢噯稍張弛e。
如：「伊若無交保護費，夤暗「婁囡仔」去給摃店！」
（他若不交保護費，今晚派不良少年去碴店），依語氣來講，“囡仔”只是弱者，毋閣伊背後所代表叨是「歹人」e強者，拜託汝毋倘判斷錯誤安呢！
572 下消下消
下消，hasiau31，叨是「一副倒霉像，一副敗不堪形象」，罵一个人下消下消，比給扑一拳卡食力，即句話是鄉土文化內底真寫實，真盡磅逗搭e鄉土語句。
下消，有人講是「消渴症」，有「食贅，尿贅，飲贅」e三項毛病，即嗎人叫糖尿病，是毋是安呢，另外噯閣研究，「阿明啊！毋倘一个安呢下消下消，疲勞厭倦，吓互人看輕啦！」
573 「轎gio3車」 , 毋是 嬌車
台灣所在，國民所得袂醜，有三、四百萬台e「轎車」，何e唸法是「giocia31」，接近「橋車」，伊e意思真逗搭，叨是親象「古早轎」e形態e私家自動車，文字佮聲音攏真正確叨是。
毋閣目前佇電台、電視台，攏唸顛誕兮，尹唸「嬌車」，giaucia，想講車嫷嫷也，看起來「嬌滴滴」，安呢來講，「音義俱失，無妥當啦！」
574 看無夠重
「毋倘「看袂起」庄腳人，隨人頭頂一片天」安呢講雖然無毋着，毋閣無妥當，正確應該是「毋倘看咱茲庄腳人「無夠重」，隨人頭頂一片天」，台語e「看不起」叫「看……無夠重」，自古叨是安呢講，嘛吓使講「袂凍給人看輕e」，上好勿講「看袂起……」，即嗎受國語教育e侵入，真贅語句漸漸互人同化，這是真「無好」e代誌，噯給撟〔ciau2〕返來。
575 煎“鴨母卵”(鴨蛋)
目前社會e主流，食卵是食「雞卵」，伊e價賬俗，清氣，方面，吓使大量生產，毋閣佇咱台灣人傳統e食卵，是以「食鴨母卵 (鴨蛋)」為主，食鴨卵有幾个特點。
(1) 伊e口味卡古早卡好食，有歷史e傳統。
(2) 鹹蛋、皮蛋、滷蛋，一定噯用鴨母卵才吓好食，也叨卵白卡Q。
(3) 鴨母卵 ,毋但口感卡Q，而且有特殊e香味，品質真好。
(4) 目前“蚵仔煎”用e是雞卵，希望吓使改用鴨母卵，有卡好食。
576 「難道」應是“咁講”?
目前佇電視抑是講古e場合，有一句話迭迭講毋着，「難道台灣人無氣魄定毋？」「難道尹兜無錢是毋？」安呢講法雖然聽有，毋閣無合台語文化。到時, 下延e人若講慣習，「約定成俗」，「假e」揙 「正e」，欲閣挽回，奚叨真困難，本詞正確e講法是「咁講……?」。
「咁講台灣人無氣魄是毋？」「咁講尹兜無錢是毋 ?」。
577 通人
台語「通人」，叨是「每一个人，everybody」，伊是一个真好用e字詞，毋閣一般台語會話，真贅人袂訣兮給使用，實在真拍損安呢！
（不良）即款代誌，每一个人攏知影。
（優） 即款代誌，通人攏知影。
佇茲拜託各位利用“通人”即个字詞，照理講：伊使用e機會應該真卡贅叨著。
578 溜籠〔liulong 32〕
「貓空纜車」使用半年多外，已經有二百萬人坐過，小弟嘛佇元旦了後有去給交關，風景袂醜，真舒適，若欲坐e時瞬，上好是拜2到拜五e半費11：00～11：30，人客卡尐，而且上好烏陰天，雨霎仔天，卡嫷安呢。
「貓空纜車」卡理想e台語講法是「貓空溜籠」，目前電視聞大部份攏報毋着，伊e影響力真大，安呢做真危機，台語本土文化，搪咧一點一du流失，希望某些電視台噯改進。
579 黃痠面兮(ei)
黃痠面〔ngsngmin366〕，叨是「臉色蒼白，面有菜色，精神萎糜」狀，目前社會時機醜，有一寡卡可憐e人趁無食，身家散赤，定著不時吓「黃痠面兮」，一般咱咧講一个人營養無夠，吓講伊「即个人黃痠黃痠，袂堪de啦！」黃痠黃痠，佮「下消下消」迭迭吓逗連安呢！古早人有咧講「食人肉，吓黃痠」，有一寡奇奇怪怪e講法。
580 軟手
軟手〔nngciu14〕，叨是國語e“手軟”，伊是倒頭句，台灣話有真贅即款e字詞，親家鬧熱、風颱……攏是。
軟手，叨是「做袂落去」，昔日戒嚴年代，陶百川落下港暗中調查余登發，發現登發伯仔大粒汗細粒汗咧洗豬稠，感心以上，自那軟手，馬上回台北平冤，叨無第貳句哩！
「軟手」即句話，有一个危機，目前佇五十歲以下e台灣人已緀卡尐人講矣，甚至猶無人聽過，語言e失落，這真正危險，台語若無法度進入教育系統，台灣人叨等亡族滅種矣！
581 透氏人 (一輩子)
台語當中，“透”〔tau3〕，是一个真正好用e字素，伊e解釋有具贅款，小弟上欣賞伊“透氏人嘛……”（一輩仔）“透庄頭嘛……”，真有台語e鄉土喟口。
（不良）阿明，呾一氏人叨毋捌咧肖借問，即嗎閣吓來……。
（優） 阿明，呾「透氏人」叨毋捌咧肖借問，即嗎閣噲來……。
（不良）迮尼戇，咱e庄頭叨看無汝一人！
（優） 迮尼戇，「透庄頭」叨看無汝一人！
582 獅鼓 無仝款
各族群文化e內涵有真贅款，有(一)飲食(二)服裝(三)語言(四)建築(五)宗教(六)藝術(七)文學(八)階級制度。
有一擺國安仙講起台灣文化e危機，台語文化受著1895 e東京話統治者e摧殘，佮1945北京話e侵入，損失真正食力，台灣人喪失語言教育權，強強欲亡族滅種e款，現主時e電視卡通片，有國語、客語、英語、日語，叨是獨欠台語卡通，有心人e操作，來斷絕台灣囡仔學台語大機會，「民進黨」執政八年，按怎來「恩將仇報」，實在想無？
目前衝突e獅鼓佮獅頭e形貌，有漸漸互廣東人文化入侵e危機，台灣獅子林e拍法是「咚，咚，咚咚咚咚，咚咚咚」外頭廣東獅e獅鼓聲完全無仝，一般人聽無，台灣本地e獅鼓聲可能吓慢慢絕去。
583 咱人 三月初
佇台語對話佮文章內底，不時吓聽著「咱人」一詞，伊有時也是指「農曆」，噯特別注意，如「阿明按算咱人十月初欲要新娘」，意思是「阿明打算農曆十月初要娶妻」，農曆e用法雖然有卡尐，毋閣佇掠魚行船方面，有關流水潮汐e問題，宛那真好用，佇淡水河流域，舊時干礁靠船運e時瞬，吓使利用潮汐e進出，行真省力叨著。
毋閣佇農產品方面，農曆「咱人」叨無一定好用，用陽曆卡有法度掌握正確節氣，關於即點，有e人無愛信，認定佮農諺無合，值得再研究。
584 合字奧(r4)寫
台語「合字奧寫」，叨是「合夥的生意，糾紛多，不宜鼓勵」，本是本土語言內底，真正寫實e一句名言，其中「奧」唸r4，是專門用字，上好勿用仈字，目前報紙寫「政治e奧步」有差錯，正確應是「政治e慪步」，用“奧”e華語發音來代用台語發音“慪”，真是「張冠李戴，亂點鴛鴦譜」，台灣話說「竹篙逗菜刀」安呢無妥當啦！台語教育噯有尊嚴，噯有規套e做法，才袂夆看無到重，日後教育時，才袂艱苦奧行。
585 老伙仔？ 老歲仔？
老人，台語叫〔lauhue-ah315〕，到底伊e台語按怎寫，是「老伙仔」，抑是「老歲仔」?二款戲有伊e支持者，嘛有伊e理由叨著。
小弟e想法，應該是「老歲仔」卡妥當, 也叨人一下老，稱硾拖尾，歲頭食到迮尼贅，宛那姑不而衷，咱以「老歲仔」給尊敬叨著，古早e老歲仔人，不止也客氣有禮，我e回想袂醜，真給謳咾叨著。
586 陰曆 佮 淡水河
淡水是一个出名e遊覽地，毋閣有時瞬去e時，江水飽滇真好看，有時也，退潮，海沙埔浮出來，真歹看叨著。欲去淡水進前，欲按怎預測江水是滇是礁(乾)，教汝一个撇步，潮汐是遵照月亮e吸引力，所以噯用陰曆來測才準，淡水有一民歌專門預測海水礁水，「初一十五，早滇暗滇中晝礁，初八、二三，早礁暗礁中晝滇，一流水逶礁到滇約6小時。
587 台語 「菇」佮「菰」 , 建議噯有分別
佇北京話內底，真菌微生物叫「發霉」，真菌洋菇香菇叫「生菇」，毋閣佇台語內底，發霉叫「甡菇」，發洋菇嘛叫「甡菇」，二項吓肖濫袂幼秀精確，佇茲建議 : (1)若是真菌發霉，台語叫「甡菰」，(2)若是發洋姑草菇，台語叫「甡菇」，安呢對仝音字來講，卡好認叨著，「中晝煮香菇雞，湯真好飲，才發現甜粿囥甚久，已經甡菰矣！」
588 多多利用→「卡踥利用e」
台語「卡踥利用e」，有人寫「卡捷利用e」是一句真好e常用字詞，噯大力給推廣，也叨受著北京話教育e影響，咱已經互人同化，家己攏無警覺性，自然的會講「……代誌，噯多多利用」，雖然是無毋著，安呢長久了後，語言吓退化，即句亦互人同化，彼句亦互人消滅，台灣話e前道叨真危險！
589 賭博 宜寫成 「跋窖」
一般台語文句，逶「賭博」，寫成「跋繳」，安呢無妥當，吓造誤會，佇茲建議寫做「跋窖」。
跋窖，buagiau34，是「賭博」e意思，「他深如地窖天牢，一旦陷入絕對傾字蕩產，永無翻身之日」，它不宜寫成「跋繳」，理由是，到時瞬吓袂清，「繳錢」到底是一般善意e「繳費」抑是惡意e「賭債」。
590 中華文化 大戰 日本文化
台語所在，佇1895年互日本人東京話統治者來界管，五十冬後又閣互北京話中國人來界管，咱茲講台灣話e人，衰簡那lai2仔e，受著壓迫，有影苦苦叨無地講安呢！
“中山北路e“中山橋”，原本是阿本仔e“明治橋”，阿山仔看袂爽，汝有明治天皇，我嘛有孫中山，二爿攏有拚頭叨是，另外佇南投縣e所在，有一位號作富士溫泉e所在，國民黨到了後，馬上改做“蘆山溫泉”，唉，阿山兮 對 阿本仔！
591 恢復正名 大嵙崁溪
淡水河e發源地，並毋是坪林，正確是武陵農場附近e品田山，另外 , 板橋、三角湧e大嵙崁溪，應該算是淡水河e主流叨著。
三十外冬前，國民黨政府，看本土文化無夠重，硬逶「大嵙崁溪」改為「大漢溪」，以達到外來政權優越感e壓迫，注意伊是「大漢」，像華夏大漢人e溪流，這對原住民來講，宛那無公道哩，佇茲咱噯拍拚給恢復正名「大嵙崁溪」。
592 公館
台灣有幾羅个所在號作公館，gong-guan64，台灣大學，苗栗公館，攏真出名，公館，是一个古早名稱，伊叨是由公家出錢，來砌一間“住宿”e所在，叨簡那販子間（旅社）仝款，這佇古早彼个經濟無發這e時代，宛那是功德一層，真感謝e代誌。
毋閣目前講“公館”，是指“府上”e尊稱，「歹勢，毋知頭傢e公館佇佗位？」叨是問頭傢即嗎蹛置佗位，看是一品大樓，抑是大直明水路？
593 地基主
台灣人，尤其北部e福佬人，對地基主e尊敬，是真正虔誠，絕對袂使攽外外，欲佮伊交朋友，抑是嫁入台灣人家庭，噯真注意。地基主叨是汝e住宅，卡早e“主人”，有鬼神有其他……，過年過節，噯誠心給燒香供物祭拜，尤其入厝e時瞬閣卡噯慎重，茲e風俗，其他族群抑是基督教友卡無了解。
594 民間用字 破媌〔puava42〕
台語內底欲批評歹查某，有一句真好e話詞，叫「破媌」，音puava42，譬如某某女人真僥擺真無人緣，看落汝叨倒彈，如最近利用尪死留落大批財產，真僥擺，四界招搖，而且設緣投（養小白臉），卸示卸眾，互夫家真無面子，即嗎佇電視大量出現e「×××」叨有人罵伊「破媌」安呢！
595 台語真「滑溜」
台灣話「真流利」欲按怎講？「台語真滑溜」「台語真遴返〔lindng44〕「台語講到真順溜」「台語講到卸卸叫」「台灣話是lilu44叫」。實際上，以目前e教育制鞁 ，北京話e優越感重，台語欲講下滑溜，並無簡單，伊有「變調本調」e陷井，除非自細漢講慣習，抑無攏有一个“腔”安呢！
596 互，予
官版台灣漢字，逶“互”改做“予”，安呢是無妥當啦！
「伊安呢做，「互」我真失驚」→「伊安呢做予我真失望」。
(一) 「予」字，與「預」字近，先入為主，以唸yi為主，欲閣唸ho，修改無容易。
(二) 「予」字，據台語專家許極燉書述，屬訓讀字，極不妥。
(三) 目前台語界，仍以“互”寫e人卡贅，尊重市場價值。
(四)“互”字讀法固定，卡袂引起系統e錯亂，予字二音。
(五) 台語互字，後壁一定接名詞，佮華語互字 ,後跟動詞形容詞無仝款。
(六) 「賦予，給予，寄予……」，用“互予”這著比“予予”好勢。
(七) 互有雙面功能，1.主動式，互汝金錢，互汝時間，2.被動式，大部份惡意，我互歹人騙，我互賊人騙，我互賊仔偷提，另一方面“予”無即个功能。
597 五義埤 趕緊正名
基隆e「五義埤」風景區，即嗎去互人改做「情人湖」不倫不類，拜託儀會緊給改進來，台灣本土文化毋倘互人蹧躂獨放外外，改地名即款代誌，伊無考慮背後e文化背景，迭迭下失誤去，騎馬夯拐仔（畫蛇添足），互人怨歎。
台灣e“湖”是盆地e意思，是礁湖，這佮北京話無仝款，五義埤，好好e地名改做「情人湖」愈改愈離經，有影譀〔ham4〕甲有偆去，拜託咱茲基隆所在e鄉親嗣大，勇敢經改過來，汝看原住民e吳鳳鄉，三民鄉攏改做阿里山鄉……。
598 電視台「雞，粿」e差異
幾羅年進前，好親象是陽帆e節目，一值佇「雞、粿」中間創袂清楚，舞甲笑聲不斷，才知影南北腔口，有時瞬噯稍了解一下。（以下聲調暫不標出）
台北，「雞gue，粿ge」，南部腔「雞ge，粿gue」拄好倒翩（相反），真拄好，即二款物件迭迭下同時出，吓引起誤解，叫汝提雞，汝提粿，叫汝提粿汝提雞，實在講起雙方攏正確無顛誕，目前南部腔略上優勢，毋閣經濟中心，大城市，電視台攏佇台北，宛那有伊e勢力置e。
599 台東e唸法
台東，唸daidang31，逐傢攏袂唸毋着，即个字詞，不時吓聽著，所以無問題，毋閣伊有淡薄也無含台語文法。（一笑）
(一) 台東〔dang〕唸白音，毋閣屏東〔dong〕唸文音，有一絲仔怪。
(二) 雲林台西〔daise〕，西嘛唸文音，並無唸白音sai，所以嘛有淡薄也怪。
真可能台東是最近e地名（日本時代以來），新e地名用白音，宛那有理，毋閣互逐傢知影，有寡代誌無一定照古例。
600 散鼓，煞鼓
各位好朋友，即本冊到茲即欲「煞鼓」矣，嘛有人講「散鼓」矣，二款攏吓使啦！代誌到茲煞〔sua5〕矣，逐傢嘛噯汕〔sw4〕矣，（散去矣），文化e代誌，千山萬水，範圍直闊，一氏人嘛做無外贅，本冊若有錯誤抑是無妥當e所在，才拜託汝通知一下。(02)28911432，安呢後回出版時才吓凍改進，即本冊「噯建議仈人，家已嘛噯改進」好矣！再會！道謝！
