【台北百萬遍】奢侈貧窮／奢華散赤

【華文】

魔利幾乎每天都出門散步，從淡島到下北澤車頭前的北澤二丁目附近的繁華街道沿線，增加了不少人知道魔利的來歷⋯⋯

【台文】

奢華散赤（tshia-hua sàn-tshiah）

1.

淺拖仔差不多逐工攏出門去散步。

欲去佗位咧？無的確。

橫直，伊就是愛去外口行行咧，踮台北四界趖。

伊極愛看冊，毋過，罕得共規本冊看完，定定就是，掀無幾頁就共冊抨去邊仔，淺拖仔穿咧，就旋出去矣。

等轉來伊三坪大、袂輸粉鳥仔櫥的房間，才紲咧讀落去。

2.

就佇這十一月的下晡，略略仔起了變化。

伊倒踮眠床，讀一本叫《奢華散赤》的冊，按日文翻譯過來的，作者叫森茉莉。

淺拖仔罔讀罔啖，敢若真有趣味，煞讀到39頁尾、欲掀過去的彼个坎站。

伊淺拖仔穿咧，就旋出去矣。

毋是無的確，這遍伊欲去大稻埕，食「意麵王」。

3.

抨佇房間的彼本《奢華散赤》，冊開開，紙面素素，有紅記記的一條巡，是淺拖仔用紅筆畫的重點，字句是：「魔利和罐頭是剝袂開的，講著重物閣較捾袂行。」

毋知是啥因端，淺拖仔讀到遮，頭殼內底就浮出意麵王的那盤「豬心」，隨來起行。

欲去大稻埕的路毋是蓋利便，坐公車就愛盤車；坐捷運無論到南京東路或雙連站，閣愛行一段；跤踏車伊無愛，規氣怙行的。

4.

台北的十一月，落規若工雨，這个下埔，竟然出日頭。日頭光斜落大都市，和留賰的水氣濫摻做伙，敢若共被挔出來曝、攑箠仔來摃、共臭殕摃一下坱蓬蓬的彼種雺雺的黃。

淺拖仔就是行，行踮台北的街仔路，名牌高貴的穿插、上千萬跑車、奢華的高級店面，伊全然無看在眼內。

5.

伊干焦想著森茉莉，《奢華散赤》的作者，老爸是大文豪森鷗外，佇好額人兜出世，自細漢除了倒手捀碗、正手攑箸食飯，閣有洗身軀、穿衫以外⋯⋯其他攏予下跤手人發落，莫講粗重的，連行路都貧惰，去學校上課全坐車。    

哎！森茉莉大漢了後，離婚離過兩改，生活凄慘落魄，無下跤手人來奉待，伊只好家己來，寫稿予刊物換所費渡日。〈奢華散赤〉的彼个主角魔利、就是森茉莉本人，蹛踮三坪大的粉鳥仔櫥，房間內伊所有的財產是真料小，毋過，伊的精神活佇往過彼款歐式的貴族氣派當中，紲來用文學、幼秀的文筆，來寫伊凄慘的日子。

6.

森茉莉講：「現實」。彼是「悲傷」的偏名，干焦佇譀想內底，幸福才會當佮咱人鬥陣做伙。

現實就佇淺拖仔的面頭前，意麵和扁食湯就捀起來矣。意麵王店內的空間真狹，四四角角的桌仔有椅條仔相敆，意麵幼麵麵，扁食嬌滴滴。

伊來，伊食，為著彼盤豬心。

豬心是高貴的小菜，毋通烏白切，就愛細膩來𠞭，一塊一塊排踮盤仔面，淋醬料共臊味崁掉，上下跤鋪薑絲。

淺拖仔倒手捀碗，正手攑箸夾豬心，共這塊奢華哺落去。

7.

隨轉來彼間三坪大、欲輸粉鳥仔櫥的房間，淺拖仔紲咧讀奢華散赤，第55頁就欲掀過去的上煞尾是按呢寫的：

魔利差不多逐工攏出門去散步，對淡島到下北澤車頭前的北澤二丁目附近的鬧熱街仔路沿線，增加袂少人知影魔利的來歷⋯⋯

（待續）

◎意麵王

台北市大同區歸綏街202號

◎引用書目

森茉莉，《奢侈貧窮》，野人文化出版。

【台語好日子・台北百萬遍】佮淺拖仔來拋拋走

編輯：宅編