台語文學
阿媽跤踏塗跤的炮仔烌，綴陣頭來行，大士爺神尊穿七重的神明衫，有信眾來護持，扛到上尾化火的所在。升天台下跤全是金紙和炮仔，大士爺共令旗夯懸懸，兩爿有山神、土地共場面排開，準備𤆬領諸位好兄弟，同齊化火升天。
挩窗對光遐去，跤踏的孤魂野鬼是規塗跤，開台劍終其尾佇眼前。他手伸出去，共劍柄搦咧，出力去拔劍。
無張持，冰冷尖爪疊踮伊的手模，吊目睭仁看，鬼王彼對利劍劍的獠牙攕出來，挩窗凄慘生凊，毋若手模冷冰冰，一陣凍寒按跤底衝到頭殼頂，挩窗人就死死昏昏去。鬼王共挩窗的頷仔領絞起來，可比火箭催速噴射，直直衝直直衝，速度夭壽緊，袂輸欲共打貓的天頂揬迵過。
佇民雄，道長唸經完，化火的儀式起鼓，炮仔點予磅，金紙著火kho̍k-kho̍k燒，升天台成做火海，火舌共大士爺神尊包圍起來。
大士爺伯化火升天。
佇打貓，鬼王升到天頂的上頂懸，停落來。紲來，一支手猶原共挩窗捏牢咧，一支手共利爪插入去家己的喙口內，敢若核能電廠插入燃料棒，產生核分裂，珠仔佮珠仔相挵。鬼王氣甲掠袂牢，假設大到無法度控制，出現臨界反應，天頂這粒圍阻體，恐驚嘛袂擋得。
挩窗寬寬仔精神，目睭對雺霧到清楚，看著鬼王的面按青變紺反烏，瞬間，規身軀透光，干焦胸坎內底有邪怪的光射出，彼種色水伊毋知按怎講，超過光譜分拆出來的範圍，是人間所無的一種色水。
那款光，有一款怪奇的能量，予挩窗人變形，頷頸腫閣粗，跤嘛變形，面發足濟怪奇的斑出來。人類的科技實在烏白來，予鬼王變甲遮爾仔的變態、畸形、癩ko。毋閣，這種種的一切攏比死亡袂過，鬼王共挩窗捏閣較絚，欲捎對胸坎的光遐去，欲共這个人類拆食落腹。