裝修名人堂 Jeffrey 與父新舊合一 優質工程著重誠摯與工藝

Jeffrey隨著父親的腳步投身裝修界已經4年。回想當初父親拒絕指導他，因怕兒子辛苦和壓力太大，在Jeffrey的堅持下，最終1年前藉著Jeffrey的努力，接手了父親的公司，為公司進行改革，目標把年輕一代與傳統裝修接軌。

「其實我都幾受爸爸媽媽影響。我本身跟媽媽做IT寫program，但睇返長遠啲，其實呢行drop緊，因為普及咗，內地市場又追上。加上我鍾意周圍走，坐係office做一模一樣嘅嘢唔係好適合我。依家就多勞多得，朝早落地盤做工，夜晚做返paper work報價畫圖等等，所有時間自己控制返。」

木工世家 以工藝和心態取勝 常言道「以前啲傢俬好長命」，木工世家的Jeffrey可說是體驗最深。「以前住嫲嫲度，全屋傢俬都係爺爺做，依家返去睇啲傢俬都冇變過，拉返出黎研究，發現以前嘅嘢真係可以keep好耐。實木最多只有少少變形問題，不影響品質，但而家始終合成木夾板係主流，敵唔過日久失修同水氣。」

「而家少見請師傅現場幫客整一件件嘅實木傢俬，師傅都係同時間競賽緊。近年實木家俬多做餐桌餐椅，衣櫃嗰啲就少見啦。」當然父子兩人都傳得爺爺的一門好手藝，木工仍是他們公司的被賞識的專長。 對待工程的心態也是重要一環。問到Jeffrey覺得工程最重要是什麼，他回答「守門」。「我哋收工每日都會執到乾乾淨淨，點解要堅守呢個原則？因為每日開工，見到所有工具返晒合適位置，工作效率會提高。我哋朝九夜六姐，但客人會放工上嚟睇，見到企理，有管理自然令人有信心又開心啲。」正面積極的心態同樣是客人喜歡他們的原因。

滿足多種客人需求 誠摯關係至上 以他名義的公司開業1年，Jeffrey認為與客人關係最為重要。「同爸爸合作發現，有啲客鍾意爸爸一句起兩句止嗰種老師傅嘅踏實，有啲客就鍾意我呢種可以緊密接觸嘅。我會帶客人去揀料，如果揀唔到，我直情會同客人去我做緊嘅工地睇，令佢地可以了解到裝修唔同環節。其實個客了解多咗，會識得點樣表達自己嘅idea，我哋就更容易幫啲idea放返落佢間屋。」

承接父親十年前工程 滿足感難以言喻 Jeffrey與父親跟客人的關係如同好友，到現在還會相約聚會。令Jeffrey最深刻的一單工程正是透過深厚的工藝與良好的關係而帶來。「10年前爸爸裝修過荃灣一個單位，10後業主再搵返爸爸想重新裝一次。我自薦幫忙負責，我上去發現所有嘢都好似新嘅一樣，牆紙冇爆，依家未必搵到嗰啲料，或者會好貴。」

「當全屋拆嘅時候，我發現啲床同板後面全部都有爸爸嘅字跡。果刻我諗，爸爸10年前嘅工程10年，而家到我接手承繼，果種感覺真係難以言喻，客人仲咁信任我可以pick up到個工程。」Jeffrey語句裡盡是滿足。 300多呎的單位，客人期望可以帶出甜美可愛的感覺，而馬卡龍配色絕對在香港少見的風格。 「我都好驚訝個客會願意試一啲香港少見既風格，佢想要啲young啲特別啲，跟住客人要求嘅配色，我全部都可以present到俾佢。」

好事總能傳千里。業主對成品十分滿意，把對面的鄰居介紹給Jeffrey。鄰居見到Jeffrey的手工，把自己過千呎的家居託付於他手上。「由300呎單位可以到千幾呎，你總係唔知機會幾時黎，所以我每個工程都會認真對待，時刻做足準備。」

與家人合作無間 管理是為打進年輕市場 與父親大伯一起營運公司，Jeffrey除了懂得裝修，也會畫圖，管理更是他的重任，盡力把公司處理得井井有條。「後生一代覺得以前裝修唔透明，唔知條數點計，例如報價多『冧心』，即係清拆、泥水、油漆等都一舊數出街，但依家興就呎數報價，好鮮明每一個細item一個數。為咗開展新客路，一定要有啲改變。既然我相對年輕啲，呢啲就我嚟做啦。」

「爸爸而家都冇接觸文書嘢，佢好buy我處理呢方面嘅手法。佢以前要顧住落手做，文書就冇咁著重，報價就冇報得咁精準。我而家幫手做，佢就冇壓力，可以專注落手做。老人家愛落手做，覺得夠踏實啊嘛，哈哈。」

「我哋師傅都係有經驗同時相對有啲年紀，所以我想搵啲同我相約年齡嘅一班年輕人繼續keep moving去做，可以接觸更多以前同依家嘅市場。想做到有design同時有function，價錢又可以平民化啲。」

Jeffrey隨著父親的腳步走進了裝修界4年，藉著毅力與年輕人的眼光，把新舊融合，讓自豪的家族工藝得以傳承及推廣出去。 （圖片提供：三行設計工程）