［性別講看覓］—「查某人閣較𠢕，放尿嘛袂漩上牆。」

這是我結婚了後，聽我的翁講的，我應伊：「放尿漩上牆是有啥物𠢕？」

某埔人會曉，查某人袂曉的代誌，in就感覺足𠢕，這點贏查某人，共提出來講。反過來講，查某人會曉，查埔人袂曉，抑是無佇做的代誌，變做：「每一个查某人攏會曉做，無稀罕。」

我講做厝內面的工課足煩，𤆬囡仔誠忝，伊講：「每一个查某人攏佇做厝內面的工課，攏佇𤆬囡仔。」意思是每一个查某人攏佇做的代誌就毋免提出來講。

我想欲問伊：「你（某埔人）𤆬囡仔是特權，會使佮囡仔跋感情，增加囡仔欲揣你鬥陣的機會？抑是苦工咧？你認為原本毋是你的工課。」毋知有講過無？那是有講伊嘛袂記得。