【A郎台語小詞典】EP. 16-Sìm

今á日，咱beh來研究chit字sìm。Sìm一般是用來形容頂下tín-tāng ê狀況，親像咱teh行吊橋，咱ē感覺tio̍h咱脚步ka踏--lòe，橋ē先沉--落-去，koh來koh ē倒彈kàu比咱踏--lòe ê時khah koân，án-ne一直重複頂下tín-tāng，chit-lō狀況咱to̍h ē講：「行che吊橋真gâu sìm，nā行bē慣勢ê人，行tio̍h ē驚。」咱koh講1 ê例，凡勢咱mā bat看過人leh giâ神轎，he轎mā是ē有1 ê頂下頂下tín-tāng ê情形，che to̍h是sìm。

Tī A郎故事內底所講--tio̍h ê「koh用手sìm--leh sìm--leh chat輕重」，to̍h是用手面the̍h石頭輕輕á向面頂擲，ná beh離手koh ná無離手án-ne，靠hit ê石頭beh lak ùi土脚ê力，用手去感受看石頭jōa重、有合用--無。Só͘-pái，咱話mā ē-tàng án-ne講：「母--á，chit粒木瓜你sìm看有2斤--無？」「差不多斤半niâ，無kàu 2斤--lah。」你nā m̄ siàn，伊磅á to̍h ē giâ--出-來，nā ho͘磅--lòe，差不多lóng是我輸。

Siāng尾，咱來補充1塊詞，號做軟sìm-sìm，親像：「Chit間ê麻糬，軟sìm-sìm，khiū-teh-teh，連外埠頭--ê lóng ē走來買。」「嬰á ê面á軟sìm-sìm，toaiⁿ toaiⁿ án-ne，hō͘人有夠想beh chhio̍k。」掃梳gím-á mā ē-tàng用軟sìm-sìm來形容，m̄-koh nā ho͘ sut--tio̍h，實在有夠疼。

Kin-á-ji̍t, lán beh lâi gián-kiù chit jī sìm. Sìm it-poaⁿ sī iōng lâi hêng-iông téng-ē tín-tāng ê chōng-hóng, chhin-chhiūⁿ lán teh kiâⁿ tiàu-kiô, lán ē kám-kak tio̍h lán kha-pō͘ ka ta̍h--lòe, kiô ē seng tîm--lo̍h-khì, koh lâi koh ē tò-tōaⁿ kàu pí lán ta̍h--lòe ê sî khah koân, án-ne it-ti̍t tiông-hok téng-ē tín-tāng, chit-lō chōng-hóng lán to̍h ē kóng: “Kiâⁿ che tiàu-kiô chin gâu sìm, nā kiâⁿ bē koàn-sì ê lâng, kiâⁿ tio̍h ē kiaⁿ.” Lán koh kóng 1 ê lē, hoān-sè lán mā bat khòaⁿ kòe lâng leh giâ sîn-kiō, he kiō mā sī ē ū 1 ê téng-ē téng-ē tín-tāng ê chêng-hêng, che to̍h sī sìm.

Tī A-lông kò͘-sū lāi-té só͘-kóng--tio̍h ê, “koh iōng chhiú sìm--leh sìm--leh chat khin-tāng”, to̍h sī iōng chhiú-bīn the̍h chio̍h-thâu khin-khin-á hiòng bīn-téng tàn, ná beh lī chhiú koh ná bô lī chhiú án-ne, khò hit ê chio̍h-thâu beh lak ùi thô͘-kha ê la̍t, iōng chhiú khì kám-siū khòaⁿ chio̍h-thâu jōa-tāng, ū ha̍h-ēng--bô. Só͘-pái, lán ōe mā ē-tàng án-ne kóng: “Bó--á, chit lia̍p bo̍k-koe lí sìm khòaⁿ ū 2 kin--bô?” “Chha-put-to kin-pòaⁿ niâ, bô kàu 2 kin--lah.” Lí nā m̄ siàn, i pōng-á to̍h ē giâ--chhut-lâi, nā ho͘ pōng--lòe, chha-put-to lóng sī góa su.

Siāng bóe, lán lâi pó͘-chhiong 1 tè sû, hō-chò nńg-sìm-sìm, chhin-chhiūⁿ: “Chit keng ê môa-chî, nńg-sìm-sìm, khiū-teh-teh, liân gōa-po͘-thâu--ê lóng ē cháu lâi bé.” “Eⁿ-á ê bīn-á nńg-sìm-sìm, toaiⁿ toaiⁿ án-ne, hō lâng ū-kàu siūⁿ beh chhio̍k.” Sàu-se gím-á mā ē-tàng iōng nńg-sìm-sìm lâi hêng-iông, m̄-koh nā ho͘ sut--tio̍h, si̍t-chāi ū kàu thiàⁿ.