【A郎台語小詞典】10-So
今á日咱beh研究ê詞是so，chit ê so，是用手tê-á輕輕á摸--leh摸--leh ê意思，像講「Goán kiáⁿ ùi學校轉來厝ê時，講伊今á日hō͘先生o-ló，我mā tòe leh真歡喜，頭殼ka so-so--leh，o-ló伊gâu。」So頭殼是2 ê人真tah-lia̍p chiah ē有ê動作，m̄是凊彩人ê頭殼lóng beh hō͘你so，m̄-thang烏白來。
Koh 1種so，是ài雙手配合做夥so，像講「so索á」、「so圓á」、「so藥丸á」chit款--ê。So圓á hō͘我想tio̍h 1句：「在人so圓tēⁿ扁。」Chit句ê意思to̍h是隨在別人去chhiâu-chhe̍k、安排、處置án-ne。「So圓á」koh有做公親ê意思，2 pêng ê利益leh chhiâu bē pêⁿ ê時，叫第3者去調解，1 pêng退1步，hō͘ tāi-chì ē圓滿，to̍h ē-tàng講是叫第3者去「so圓á」，beh講khah簡省--ê，講叫人去「so」 mā ē-sái。
另外1款是，手面有mi̍h-kiāⁿ，beh抹去另外1 ê mi̍h-kiāⁿ頂頭，像講魚á so鹽，to̍h是手hē寡鹽，平均抹tī魚身，thang看koh來beh煎a̍h beh炒，nā有關節痠痛a̍h是肢體痛疼，mā thèng好the̍h藥洗so-so thui-thui--leh，ûn-ná加減á有應效。
Kin-á-ji̍t lán beh gián-kiù ê sû sī so, chit ê so, sī iōng chhiú-tê-á khin-khin-á bong--leh bong--leh ê ì-sù, chhiūⁿ kóng “Goán kiáⁿ ùi ha̍k-hāu tńg-lâi chhù ê sî, kóng i kin-á-ji̍t hō͘ sian-seⁿ o-ló, góa mā tòe leh chin hoaⁿ-hí, thâu-khak ka so-so--leh, o-ló i gâu.” So thâu-khak sī 2 ê lâng chin tah-lia̍p chiah ē ū ê tōng-chok, m̄ sī chhìn-chhái lâng ê thâu-khak lóng beh hō͘ lí so, m̄-thang o͘-pe̍h-lâi.
Koh 1 chióng so, sī ài siang-chhiú phòe-ha̍p chò-hóe so, chhiūⁿ kóng “so soh-á”, “so îⁿ-á”, “so io̍h-oân-á” chit khoán--ê. So îⁿ-á hō͘ góa siūⁿ tio̍h 1 kù: “Chāi-lâng so-îⁿ-tēⁿ-píⁿ.” Chit kú ê ì-sù to̍h sī sûi-chāi pa̍t-lâng khì chhiâu-chhe̍k, an-pâi, chhú-tì án-ne. “So-îⁿ-á” koh ū chò kong-chhin ê ì-sù, 2 pêng ê lī-ek leh chhiâu bē pêⁿ ê sî, kiò tē 3 chiá khì tiâu-kái, 1 pêng thè 1 pō͘, hō͘ tāi-chì ē oân-boán, to̍h ē-tàng kóng sī kiò tē 3 chiá khì “so-îⁿ-á”, beh kóng khah kán-séng--eh, kóng kiò lâng khì “so” mā ē-sái.
Lēng-gōa 1 khoán sī, chhiú-bīn ū mi̍h-kiāⁿ, beh boah khì lēng-gōa 1 ê mi̍h-kiāⁿ téng-thâu, chhiūⁿ kóng hî-á so iâm, to̍h sī chhiú hē kóa iâm, pêng-kin boah tī hî sin, thang khòaⁿ koh lâi beh chian a̍h beh chhá, nā ū koan-chat sng-thiàⁿ a̍h-sī ki-thé thàng-thiàⁿ, mā thèng-hó the̍h io̍h-sé so-so thui-thui--leh, ûn-ná ke-kiám-á ū èng-hāu.
