佮宜蘭縣礁溪有關係的代誌—４
＜我誠家婆＞
有一擺，我坐火車轉來礁溪。坐我邊仔是一个佮我差不多歲數的查某人，對面有２个少年人，講話講甲誠歡喜，一个查埔，一个查某，in３个是仝陣的，有紮行李，我咧看in是啥物關係？
我佮彼个oo-bá-sáng講話，幾分鐘了後，伊講：「我小孩吵著要來玩。」喔！是後生佮查某囝。
「你們要去哪裏玩？」
「不知道。」
改問這个問題：「要在哪一站下車？」
「不知道。」
我沒想著有這種回答，毋知影欲去佗位，欲佇佗位落車，人叫伊落車，伊就茖車，叫伊行，伊就行，我實在擋袂牢，共講：「你出門搭車，車票要自己拿，要知道要在哪裏下車。」
阮一路開講。到礁溪站的時，我落車，in嘛落車，原來欲來礁溪𨑨迌。我想著人伊啥物攏毋知，日子嘛過甲好好，我共伊講，出門坐車，車票愛家己提著，實在誠家婆，矣！
（2025.1.6.）
— — —
＜厚話加三八＞
１．伊是招的
我國中讀宜蘭國中。有一擺請假，英語課無上，老師叫我禮拜日去in兜補課，補課敢若是我家己要求的。
我到樓下，看著幾號幾樓，有一个查埔人問我欲揣啥人？我講：「Ｘ老師。」
伊指樓上，講：「伊是招的。」
我無講話，𬦰樓梯起去（khí-khì ），感覺彼个人足奇怪，看會出來，我是老師的學生，共學生講這句話是啥物意思？
２．二小姐回來了
我的阿姨無生，阿舅共伊的第２个查某囝予阿姨，報出生。這件代誌瞞袂牢，逐家攏知影。
較大漢了後，逐擺表妹自外口轉來，隔壁的阿姨就喝：「二小姐回來了。」
表妹問阿姨：「是按怎伊叫我『二小姐』？」
「可能咧叫我，我是第２个查某囝」阿姨按呢應，阿姨拄好是排行第２个。
阿姨去共隔壁講，叫伊莫按呢叫：「囡仔毋知影。」
「是喔！伊毋知影，我想講伊知影。」
家婆閣加三八。
遐的人誠奇怪，共人厝內面的代誌四界講，驚人毋知影。英語老師是招的，阮同學嘛知影，聽講老師in兜較艱苦，囡仔濟，表妹是孤查某囝，讀大學的錢是表妹出的。老師教英語，嘛佇補習班教，是有名的老師，家己賺誠濟錢。有２个後生，有一擺上課的時，伊講：「給兒子配眼鏡，他一直打破，好，這次配最貴、最耐用的，結果不見了。
」
伊捌講：「我大學的時候訂婚，畢業後就結婚。」
阮姨丈咧表妹小學的時調去台北，全家搬去台北，毋知影佮厝邊頭尾逐家不時講伊的查某囝有關係無？
（2025.1.10）
￭查辭典，
