台語文學
徛佇三川門的簾簷跤，挩窗共虎爿雲一拗兩拗、拗拗做拭仔遐細塊，收入去橐袋仔內面。紲來，共龍爿雲𢯾咧，哈囉就來指示：「我行頭前來𤆬路，你踮後壁綴我的尾溜，拚命衝就是。毋通探頭探耳，無，會去予路邊的野鬼牽去……。」
「好！聽你的！蹽落去！」挩窗略略仔跍咧，學放粉鳥彼種屈勢，共雲拋出去：龍爿雲對天頂直直衝直直衝，尾溜硞硞噴水硞硞噴，半空中的鬼王瞭著，火猶袂赴噴，雲就拚去伊的頭殼頂，面子盡掃落地，青面的鬼王起呸面，令旗攑懸，靴仔噴火，衝去逐。
仝一个時間，佇人間的民雄，寶釵阿媽共大士爺廟揣透透，四界去問人，就是無挩窗的形影，心肝頭想講：「這个猴死囡仔，到底是走佗位去……啊！百面是去保生大帝路遐去看人耍Bingo，嘛無共我講一聲，死囡仔！」
阿媽出廟門倒斡，Bingo遐揣無人，紲一个擔仔一个一个揣：標仔射雞胿、佈箍仔、珠仔檯攏無。行啊行無幾步，來到保生大帝廟的牆圍，邊仔開一縫，賣綿花糖的頭家提一支竹攕，佇機器內底抐，抐啊抐牽一條一條的絲，愈牽愈大粒，五花十色、絲絲綿綿，阿媽的目睭煞花去。
目睭挼挼咧，阿媽敢若眼著挩窗的影跡，焦慒的心情轉做風火頭：「當時仔是走來遮耍！嘛無共我講！實在是皮咧癢！欲予伊好看！」
就佇這个時陣，踮神明界的打貓，挩窗專心綴哈囉的尾溜，走甲真緊、真順，保生大帝廟就佇面頭前矣，挩窗歡喜過頭，門口的戶橂煞無注意，跤去踢著，拋兩个輾斗，佇磨石仔的塗跤面趨，直直趨到廟的上內面……。
