悼 #FatherNaylor

【讀者投稿】
#10月8日

〈悼 #FatherNaylor〉
作者： 史葛

一直認為老神父係香港相當 underappeciated 嘅老師。
稱讚佢係慈祥嘅老師？渠當然係慈祥嘅老師，重會家訪學生添。稱讚渠用四十三年光陰春風化雨？無私奉獻半世人比教育，當然係無庸置疑地偉大。
但老神父絕對係 Something more.
渠關心 #自然保育，創辦香港最早嘅自然保育組織，喺報紙寫專欄關心「環保」議題，然後上堂個陣會帶學生去公園欣賞大自然，去公園做體操。
渠係 #大公主義 者，但對宗教嘅寬容之心不限於基督教內，上堂個陣會帶學生參觀本地寺廟，甚至伊斯蘭廟，俾學生同伊瑪目謦偈交流。
渠熱愛「華夏文化」，喺全世界中學都費事教《論語》嘅時候，渠唔教《十誡》，反而播 #何文匯 教 《#論語 》講「孝道」，重要喺黑板學寫歪哩歪斜嘅「孝」字，成校唐人老師唔教，由個鬼佬神父教，當時已經覺得充滿喜感。
嗰個年代鬼佬，尤其係神父，大概喺香港社會確係有尐特權，可以用光環做唐人同事唔敢做嘅事。但老神父唔係用特權嚟吞pork偷走去沖涼揼骨，或者叫職員幫手搬行李，反而用特權嚟填補班房「監倉式」教育嘅不足，帶學生走出班房。他處嘅旅行，係學校施捨比學生嘅週年福利，同課程完全割離，老神父帶嘅旅行，卻係課程核心，設計處處隱含住自己嘅教育理念，以前只會覺得有得出外搗蛋好過癮，長大咗諗返先會明白渠嘅心意何在。
做人「知行合一」已經好難，老神父一生實踐自己信念，獻身教育，追求宗教內合一，重要延伸至將教育理念同課堂合一，真正嘅 teach out of the box。唐人老師冇膽嘅不願做，有膽嘅無權做。老神父運用特權，不在剝奪，志在奉獻，基督精神不正是如此？
想繼承渠做法？sorry，以「免責」為主軸、追求「量化成績」嘅僵化教育制度根本唔會容許老師恁做。
隨著老神父退休辭世，成為絶響嘅唔單只係渠本人嘅肉身，更加係一種香港絶無僅有嘅教育方式。承先，遺憾不能啟後。唔知老神父天上有知，會唔會覺得唏噓？
不知不覺又一個時代逝去。損失嘅又何止 #九龍華仁？有緣受教，絶對係榮幸。請安息。