校園ê情份 創作日期:2017/08/03

Tī chi̍t it ê tiong-ha̍k lāi-té, ha̍k-seng chi-kan ê kám-chêng, tàu-té ē ū siáⁿ-mi̍h tek-pia̍t--neh?

“Aih, lí khòaⁿ hit ê ha̍k-tiúⁿ ū kàu iân-tâu--ê, A-hun lí kám-kak hit ê lâng án-chóaⁿ--ah? ”A-thô kóng kah teh-beh lâu chhùi-nōa--ah!

“Lí--o͘ !Ná chhiⁿ-chhiūⁿ A-hoe kâng-khóaⁿ, lóng sī teh siūⁿ lí ê ha̍k-tiúⁿ! ”

A-hun kî-si̍t khòaⁿ-tio̍h hit ê cha-po͘-lâng tō tò-tōaⁿ--ah!

Ū chi̍t kang, A-hun khì i ê kàu-sek siōng-khò ê sî-chūn, khì lòng-tio̍h hit ê A-thô kah-ì ê ha̍k-tiúⁿ.

“Aih, lí lóng bô teh khuànn lō͘--o͘!Lòng-tio̍h góa ê sin-khu chiok tōa-la̍t koh chiok thiàⁿ--ê --lah! ”Hit ê ha̍k-tiúⁿ chiok siūⁿ-khì--ê, i koh kiò A-hun khì piān-só͘ chhōe--i, siūⁿ beh chhut chi̍t kháu-khuì.

Hit ê A-hun kám-kak i ū kàu khióng-pò͘--ê, m̄-koh mā koai-koai khì piān-só͘ chhōe--i.

“Ha ha ha! Lí lâi--ah!Góa mn̄g lí chi̍t--ê, lí thâu-tú-á kā góa lòng--tio̍h, beh iōng siáⁿ-mi̍h hong-sek kā góa hōe sit-lé-- neh? ”Hit ê ha̍k-tiúⁿ jú óa jú kīn, A-hun si̍t-chāi chiok kín-tiúⁿ--ê, i siūⁿ kóng beh án-ná kóng khah hó!

“Hak-tiúⁿ, pháiⁿ-sè--lah! Hit ê sî-chūn góa teh kóaⁿ-kông beh siōng-khò, bô sè-lī lòng-tio̍h--lí, lí mài siūⁿ-khí--lah--hoⁿh! ”

A-hun tng-teh kóng ê sî-chūn, hō͘ A-thô khòaⁿ--tio̍h, i m̄ kam-gōan i ài ê ha̍k-tiúⁿ hām i tī piān-só͘ ê gōa-kháu kóng-ōe.

A-thô siūⁿ beh tuì i ê pêng-iú A-hun pìⁿ-khang, m̄-koh i kiaⁿ ē hō͘ lâng hoat-hiān, tō m̄-káⁿ--ah！Hit ê ha̍k-tiúⁿ kiò chò A-tang, i tī ha̍k-hāu sī chi̍t ê chiâⁿ siū hoaⁿ-gêng ê cha-po͘ gín-á!

“Eh, lí khòaⁿ hit ê sam-pat A-hoe lâi--ah--neh！Khì kah i chhòng-tī chi̍t--ē! ”Hit ê kóng-ōe ê lâng mā sī kah-ì ha̍k-tiúⁿ ê lâng, i kiò chò A-thêng, i mā chiok oàn-tò͘ A-hun thài-ē hām ha̍k-tiúⁿ kiâⁿ hiah kīn.

Kî-si̍t hit ê ha̍k-tiúⁿ chí-sī siūⁿ beh tuì A-hun chia̍h-chheⁿ-kha niā niā, bô teh kah-ì A-hun, m̄-koh tuì kî-tha ê cha-bó͘-gín-á lâi kóng sī chiok bōe-sóng ê tāi-chì!

Hit ê A-hun hoat-hian i í-keng ū chi̍t-tiám-á teh kah-ì ha̍k-tiúⁿ, i mā m̄ chāi-iáⁿ i sī siáⁿ-mi̍h sî-chūn ài--tio̍h--ê.

“Góa kah-ì ha̍k-tiúⁿ ê tāi-chì chhian-bān m̄-thang kóng, ah bô góa tō ē chiok chhi-chhám--ê! ”A-hun sim-lāi teh siūⁿ tsit-kiāⁿ tāi-chì.

Hit ê ha̍k-tiúⁿ A-tang chòe-kīn hoat-hiān A-hun sió-khóa kòai-kòai, thài-ē tuì i chiok pháiⁿ-sè--ê, chiâⁿ pì-sù ê khóaⁿ.

Ū chi̍t kang, A-thô hiông-hiông hoat-hiān i ê hó-pêng-iú A-hun ê phō͘-á lāi-té khòaⁿ-tio̍h chi̍t kù ōe：“Góa kài-sêng kah-ì tio̍h A-tang ha̍k-tiúⁿ--ah--neh!”

Ah hó, chi̍t siann chhám--ah, hō͘ lâng chá tō giâu-gî A-hun sī kah-ì ha̍k-tiúⁿ ê tāi-chì piak-khang--ah!

“Aih, tán--leh lán lâi-khì kā A-hun kà-sī tsi̍t-ê , lâi, lán lâi-khì! ”

A-thô kóng kah teh khì-chhoah-chhoah!

Hit ê A-hun kiâⁿ kòe beh khì kàu-sek ê lâu-thui, soah hō͘ A-thô hām i ê pêng-iú chhòng-tī kah chiok chhi-chhám, kā chúi-tháng ê chúi tò teh i ê sin-khu, hāi i ê saⁿ lóng tām-lok-lok--ah!

A-hun m̄ chai-iáⁿ uī-siáⁿ-mi̍h i ê hó-pêng-iú thái-ē tuì i án-ne.

Āu--lâi, i siūⁿ-tio̍h A-thô kám sī thau-khòaⁿ i ê phō͘-á lāi-bīn siá ê mi̍h-kiāⁿ.

Chit ê sî-chūn, A-tang chai-iáⁿ A-hun hō͘ lâng khi-hū, hiông-hiông-kông-kông khì khòaⁿ A-hun ū án-chóaⁿ bô.

Kî-si̍t A-tang pún-lâi bô teh kah-ì A-hun, m̄-koh āu--lâi hām i tàu-tīn, i kám-kak i ê lâng chiok un-loán--ê, tō saⁿh-tio̍h A-hun. A-hun kàu chit-má koh m̄ chai-iáⁿ, i aì ê lâng mā teh kah-ì--i. Nā-sī i chai, it-tēng chiok hoaⁿ-hí--ê.

Hit ê A-tang kā A-hun chia̍h-chheⁿ-kha ê lâng mā kah chiâⁿ tuā-siaⁿ, chin hùn-nō͘, chhōe hiah ê lâng sǹg-siàu.

Āu-lâi, in nn̄g ê lâng tō chò-hóe--ah, A-tang sī chin-sim teh kah-ì A-hun, A-hun mā kám-kak chiok hēng-hok--ê. Liân i ê pêng-iú A-thô mā chin-sim chiok-hok in nn̄g lâng ē-tàng hēng-hok.

Ha̍k-tiúⁿ A-tang khó--tio̍h ê tāi-ha̍k, āu-lâi A-hun mā khó--tio̍h, in nn̄g ê lâng ê ài-chêng kò͘-sū mā thoân kah choân ha̍k-hāu lóng chai-iáⁿ--ah! Ta̍k ê lóng chiok ho̍k--in neh!

漢羅版

佇這个中學內底，學生之間ê感情，到底會有啥物特別--neh？

「Aih，你看彼个學長有夠緣投--ê，阿芬你感覺彼个人按怎ah？」阿桃講kah teh 欲流喙瀾矣！

「你o͘！那親像阿花仝款，攏是咧想你ê學長!」

阿芬其實看tio̍h彼个查埔人就倒彈矣！

有一工，阿芬去伊ê教室上課ê時陣，去挵tio̍h彼个阿桃佮意ê學長。

「Aih，你攏無咧看路嗚！挵tio̍h我ê身軀足大力koh足疼--ê啦！」彼个學長足siūⁿ氣--ê，伊koh叫阿芬去便所揣伊，想beh出一口氣。

彼个阿芬感覺伊有夠恐怖--ê，m̄-koh mā 乖乖去便所揣伊。

「哈哈哈！你來矣！我問你一下，你頭拄仔kā我挵--tio̍h，beh用啥物方式kā我會失禮--neh？」彼个學長愈倚愈近，阿芬實在足緊張--ê，伊想講beh按怎講khah好!

「學長，歹勢啦！彼个時陣我咧趕狂beh上課，無細膩挵tio̍h你，你mài siūⁿ氣啦hooⁿh!」

阿芬當咧講ê時陣，予阿桃看tio̍h，伊m̄甘願伊愛ê學長和伊佇便所ê外口講話。

阿桃想欲對伊ê朋友阿芬變空，m̄-koh 伊驚會予人發現，就m̄敢矣！彼个學長叫做阿東，伊佇學校是一个誠受歡迎ê查埔囝仔！

「Eh，你看彼个三八阿花來矣--neh！去kah伊創治一下！」彼个講話ê人mā是佮意學長ê人，伊叫做阿亭，伊mā足怨妒阿芬thài會和學長行遐近。

其實彼个學長只是想beh對阿芬食生跤爾爾，無咧佮意阿芬，m̄-koh對其他ê查某囝仔來講是足袂爽ê代誌！

彼个阿芬發現伊已經有一點仔咧佮意學長，伊mā m̄知影伊是啥物時陣愛--tio̍h ê。

「我佮意學長ê代誌千萬m̄通講，ah無我就會足悽慘 --ê！」阿芬心內咧想這件代誌。

彼个學長阿東最近發現阿芬小可怪怪，thài會對伊足歹勢--ê，誠pì-sù仝款。

有一工，阿桃雄雄發現伊ê好朋友阿芬ê簿仔內底看tio̍h一句話：「我kài成佮意tio̍h阿東學長矣neh！」

Ah好，這聲慘矣，予人早就憢疑阿芬是佮意學長ê代誌piak空矣！

「Aih，等咧來去共阿芬教示一下，來，咱來去！」

阿桃講kah咧氣掇掇！

彼个阿芬行過beh去教室ê樓梯，煞予阿桃和伊ê朋友創治kah足悽慘，kā水桶ê水倒咧身軀，害伊ê衫攏澹漉漉矣！

阿芬m̄知影為啥物伊ê好朋友thài會對伊按呢。後來，伊想tio̍h阿桃敢是偷看伊ê簿仔內面寫ê物件。

這个時陣，阿東知影阿芬予人欺負，雄雄狂狂去看阿芬有按怎無。

其實阿東本來無咧佮意阿芬，m̄-koh後來和伊鬥陣，伊感覺伊ê人足溫暖--ê，就saⁿh-tio̍h阿芬。

阿芬到這馬koh m̄知影，伊愛ê人mā咧佮意伊。若是伊知，一定足歡喜--ê。

彼个阿東kā阿芬食生跤ê人罵kah誠大聲，真憤怒，揣遐ê人算數。

後來，怹兩个人就做hóe矣，阿東是真心咧佮意阿芬，阿芬mā感覺足幸福--ê。連伊ê朋友阿桃mā真心祝福in兩人會當幸福。

學長阿東考--tio̍h ê大學，後來阿芬mā 考--tio̍h，in兩ê人ê愛情故事mā傳kah全學校攏知影矣！逐家攏祝福--in --neh!

＊刊tī台文罔報NO.318(2020/9月)