Góa sī to̍k-sin-á, sī iáu-bōe chhōa bó͘ ê lâng, ka-tī chit ê lâng tùi Tâi-lâm kàu Ko-hiông phah-piàⁿ, sui-bóng sin-khó͘, m̄-koh mā sī ka-tī ê koat-tēng.
M̄-koh ū chi̍t kiāⁿ chiok pi-chhám ê tāi-chì, tī i ko-tiong chhut-gia̍p bô-jōa-kú ê sî hoat-seng--ê. I tī ko-tiong tha̍k-chheh ê sî-chūn kau-tio̍h chi̍t ê lâm-pêng-iú, kóng jōa ài --i tú jōa ài--i, góa chiah bô teh kā i sìn-táu--leh! In-ūi i hāi-sí gún sió-mōe.
Che kóng--khì--lâi tō siong-sim!
Tō-sī i ko-tiong se̍k-sāi chit ê tōa i 5 hòe ê cha-poo-lâng, hit ê lâng ko-tiong chhut-gia̍p tō teh chia̍h thâu-lō͘--ah!
Chia̍h ê thâu-lō͘ , I sī tī o͘-tó͘-bái-á tiàm chò o͘-chhiú--ê, lâng-pān koh-sǹg ē-sái, m̄-koh ài chia̍h-hun. In 2 ê sī án-chóaⁿ se̍k-sāi ê kòe-têng--neh? Kóng--khì--lâi koh sī chit ê kò͘-sū--ah!
Ū chi̍t kang gún sió-mōe pôe i ê ha̍k-tiúⁿ khì siu-lí o͘-tó͘-bái, hit keng o͘-tó͘-bái-á tiàm ê thâu-ke kap hit ê ha̍k-tiúⁿ ê lāu-pē ū se̍k-sāi, sī pêng-iú, só͘-í nā-sī o͘-tó͘-bái-á ū būn-tê, lóng ē-chhōe hit keng tiàm siu-lí. Tō tī hit-kang, sin-lâi ê o͘-chhiú--ê khòaⁿ-tio̍h gún sió-mōe, chŏaⁿ saⁿh--tio̍h, i kám-kak gún sió-mōe seⁿ-chó chin súi, ū chheng-chhun siàu-lú ê khì-chit , o͘-chhiú--ê ba̍k-chiu lóng bô lî-khui i ê sin-khu, it-ti̍t teh kā siòng, che sī gún sió-mōe i chāi-seⁿ ê sî kā góa kóng--ê.
Siūⁿ-tio̍h che, góa kiông beh háu--chhut-lâi--ah, i sī góa siōng ài ê sió-mōe, m̄-koh chin siáu-liân tō lî-khui chit ê sè-kan--ah!
Sió-mōe kā góa kóng, tūi hit kang o͘-chhiú--ê kā i thó tiān-ōe liáu-āu, tō tiāⁿ-tiāⁿ iok i chhut--lâi, i o-ló sió-mōe chin súi koh chin khiáu, jî-chhiáⁿ put-sî-á kóng tiⁿ-bi̍t ê ōe, koh sàng sió-mōe ài ê mi̍h-kiāⁿ, chit-chióng tui-kiû ê hong-se̍k, tōe chi̍t ê siàu-lú bē kám-kak tah-sim? tong-jiân mā sī tòng-bōe-tiâu tō hām i chò-hóe--ah! Ah tong-chho͘ sió-mōe pôe khì siu-lí o͘-tó͘-bái-á tiàm ê ha̍k-tiúⁿ--leh? Tong-jiân mā sī teh kah-ì gún sió-mōe, m̄-koh i ê ài iah-bōe kóng--chhut--khì, tō hō͘ hit ê cha-po͘-lâng chhiúⁿ--khì--ah!
Chin khó-sioh hit ê ha̍k-tiúⁿ A-lô lâng-pān chin hó, seⁿ chò chin iân-tâu koh chiâⁿ lò, pún-té i kap gún sió-mōe teh khan, soah hō͘ hit ê o͘-chhiú--ê phò-hoāi.
Koh lâi kóng-tio̍h gún sió-mōe A-hong, sī án-chóaⁿ khiau--khì--ê. I tī ko-saⁿ chhut-ia̍p, chha-put-to 10 kang, tī hit kang hām in lâm-pêng-iú A-hoat chhut--khì, hām lâng sio-lòng, chŏaⁿ lòng chi̍t-ê A-hong poe--chhut-khì, koh hō͘ chi̍t tâi lu bah-khuh ê hòe-chhia kàu--tio̍h, ah chit siaⁿ chhám--ah! Bô sí mā ún sí--ah! Hit kang chhut tāi-chì, A-hoat chin kín-tiūⁿ, i kín khà tiān-ōe kiò lâng kā i sàng-khì pēⁿ-īⁿ, bóe--á mā sī kiù bōe tńg--lâi. Góa ē kì-tit gún sió-mōe A-hong thâu-chhit hit kang, gún A-pah kap A-bú sī khàu kah ba̍k-sái lâu ba̍k-sái tih, chin-chiàⁿ chiok siong-sim, siūⁿ bē-kàu i án-ne tō sí--khì--ah! Chi̍t ê chheng-chhun siàu-lú ê sìⁿ-miā tō án-ne bô--khì--ah! Bōe--á A-hoat mā in-ūi chit kiāⁿ tāi-chì hông lia̍h khì koaiⁿ--ah!
阮可憐 ê 小妹 作者:Ko Ka-hui
我是獨身仔，是猶未 chhōa 某 ê 人，家己一 ê 人對台南到高雄打拚，雖罔辛苦， m̄-koh嘛是家己 ê 決定。
我厝 --nih 有一 ê 小妹，阿爸 kap 阿母 kan-taⁿ 生阮 2 ê gín-á 爾。Chū 細漢我 kap 小妹 ê感情就足好 --ê，伊嘛真乖真優秀，讀高中ê 時陣 lóng 提頭名，得到 bōe少 ê 獎金，嘛 kā 一寡錢交hō͘ 爸母。
M̄-koh有一件足悲慘 ê 代誌，tī 伊高中卒業無偌久ê 時發生 --ê。伊 tī 高中讀冊ê 時陣交到一 ê 男朋友，講偌愛伊拄偌愛伊，我才無teh kā 伊信篤--leh! 因為伊害死阮小妹。
Che 講 -- 起-來就傷心!
就是伊高中熟識一 ê 大伊5 歲ê 查埔人，彼 ê 人 高中卒業就 teh 食頭路 --ah!
食 ê 頭路，伊是tī o͘-tó͘-bái-á 店作黑手 --ê，人範 koh-sǹg 會使 --ê，m̄-koh 愛食薰。In 2 ê 是按怎熟識 ê 過程neh? 講 -- 起-來 koh 是一 ê 故事--ah!
有一工阮小妹陪伊 ê 學長去修理 o͘-tó͘-bái，彼工 o͘-tó͘-bái-á 店ê 頭家 kap 彼 ê 學長 ê 老爸有熟識，是朋友，所擺若是 o͘-tó͘-bái-á 有問題，lóng 會chhōe 彼間店修理。就tī 彼工，新來 ê 黑手看著阮小妹，chŏaⁿ saⁿh--tio̍h，伊感覺阮小妹生做真 súi，有青春少女 ê 氣質，黑手 --ê ba̍k-chiu lóng 無離開伊 ê 身軀，一直 teh kā siòng，這是阮小妹在生 ê 時 kā 我講 --ê。
想到 che，我kiông beh吼 -- 出 - 來--ah，伊是我上愛 ê 小妹， m̄-koh 真少年 tō 離開這chit ê 世間--ah!
小妹 kā 我講，tūi彼工黑手 --ê kā 伊討電話了後，就 tiāⁿ-tiāⁿ 約伊出 -- 來，伊 o-ló 小妹真súi koh 真巧，而且不時仔講甜蜜 ê 話， koh送小妹愛 ê 物件，這種追求 ê 方式，tōe 一chit ê 少女 bē 感覺貼心? 當然嘛是 tòng-bōe-tiâu 就 hām 伊做伙--ah! Ah 當初小妹陪去修理 o͘-tó͘-bái-á 店 ê 學長-- leh? 當然嘛是 teh kah-ì 阮小妹， m̄-koh伊 ê 愛意猶未講 -- 出 - 去，就 hō͘ 彼ê 查埔人搶去--ah!
真可惜彼 ê 學長阿羅人範真好，生做誠緣投 koh 誠 lò,，本底伊 kap 阮小妹teh 牽， soah hō͘ 彼 ê 黑手 --ê 破壞。
Koh 來講著阮小妹阿芳，是按怎 khiau--khì--ê。伊 tī 高三卒業，差不多10工，tī 彼工 hām in 男朋友阿發， hām人相lòng，chŏaⁿ lòng 一 ê 阿芳飛 -- 出 - 去， koh hō͘ 一台 lu bah-khuh ê 貨車kàu--tio̍h，ah 這聲慘--ah! 無死嘛穩死--ah! 彼工出代誌，阿發真緊張，伊緊敲電話叫人kā 伊送去病院，bóe--á 嘛是救bōe 轉來。我會記得阮小妹阿芳頭七彼工，阮阿爸kap 阿母是哭 kah 目屎流目屎滴，真正足傷心，想不到伊按呢就死 -- 去--ah! 一 ê 青春少女ê 性命就按呢無 -- 去--ah! Bōe--á 阿發嘛因為這件代誌 hông lia̍h 去關--ah!
*刊tī教會公報社第NO.3556期(2020/4/20~4/26)
