編輯嚴選

當首爾仍是叫漢城的那些年（卅柒）

上世紀九十年代嘅南韓，對香港人嚟講，係個半神祕國度。香港人對日本嘅喜愛程度毋庸置疑，但係對與日本一海之隔嘅南韓，則仍然處於「新相識」、「唔係好熟」嘅階段。

論潮流文化，九十年代好多香港人都只係識個趙容弼，最多因為黎明嘅緋聞，可能會聽過金喜善；論工業產品，三星同 GoldStar（LG 前身）都仍然處於「有待改善」嘅階段；港女用緊嘅，仍然係 Shiseido 唔係 Laneige；比較多人認識嘅係一個時裝 accessories 品牌 MOOK，因為抄得似 Prada；論食 — 真該煨，香港人覺得，「漢陽苑」呢啲就係「韓國菜」、「韓燒」。

Y2K 初，我份 CV 寫住我識韓文，有 HR 問我：點解你學啲咁偏門嘅語言？

所以，當香港人（講緊我呢個戇鳩香港人；你哋個個都好很醒，得未？）去到韓國，稍為深入留意一吓當地文化，赫然發現，韓國將儒家文化 — 好與壞、精粹與糟粕（尤其係糟粕），都一一保存落嚟嗰陣，嗰種 cultural shock，唔會少得過你第一次移居歐美。

十一月，漢城，初冬降臨。雖然氣溫仍然唔算得上好凍，但亦都已經唔係一件薄外套就可以頂得到嘅季節。

今日，Chloe 拉咗我去梨泰院某間皮具店，佢話早兩日經過，見到有件好靚嘅羊皮 bomber，覺得好啱我。

女人就係咁，當你同佢行近一步嗰陣，佢就急不及待咁接管你生活嘅一切，首先從衣櫃開始。

「係咪呀！真係好靚喎！又軟熟又暖。」Chloe 仲 sell 得落力過個 sales。

「咁厚，你唔覺得好臃腫咩？」坦白講，就算漫天風雪嘅天時，我都未使著咁厚衫。

「唔係㗎，呢度冬天好凍㗎！你著住佢又夠暖，又成隻綿羊咁，可以俾我攬住，我伏喺啲羊毛上面，好舒服！」See?! 有私心嘅。

「我有話過俾你攬咩？」講真，攬你咪攬你囉，乜要俾嘅咩？嗌非禮吖笨！

「唔俾咪唔俾囉……」Chloe 使出韓妹三大絕學：嘟嘴、可憐樣、星星眼；佢其實係 Passive-Aggressive 嘅高手。

「得，我投降，你話點就點。」我認我耳仔軟，都係買件褸啫。

「哈！蠢蛋呀蠢蛋，都話咗你走唔出我嘅控制範圍㗎啦！」小勝一仗即刻鬆毛鬆翼就係呢啲。

買完衫跌完錢，我哋繼續行街；Chloe 又好順手咁拖住我。

「又話唔使我為你做啲乜嘅？咁你做乜拖我？」話分兩頭，佢十指纖纖嘅手，又真係好好拖。

「我係唔使你為我做啲乜喎，我拖你之嘛，又冇叫你拖我。」佢好得戚咁笑、完全冇放手嘅意圖。

Chloe 同 Colette 最相似嘅一點，係除咗大家都有個法國名之外，就係口是心非。一個話同我分手，結果一有機會就擒我，差啲搞大埋個肚；一個把口話冇叫我為佢做乜，結果而家差唔多係我個 de facto 女朋友。

Chloe 之所以仲未係我嘅正式女朋友，係因為當日美恩再三叮囑嘅說話，仍然好似魔咒咁纏繞住我，令我同 Chloe 保持最後距離。

唔知而家 Colette 做緊乜呢？其實經過嗰晚之後，我哋冇停止聯絡，只不過係次數少咗、時間短咗；始終，大家都要時間去適應，冇咗對方嘅生活。

晚上八點幾，行完街食埋飯，我同 Chloe 打算搵戲睇。自從上次 Chloe 應承我少睇韓片多睇西片之後，佢真係身體力行咁次次都揀西片睇。咁咪好囉，嗰啲動不動就「又要生、又要死、又要刀仔拮大脾」嘅戲，睇得多會上腦㗎。

當我哋行緊去戲院嘅時候，電話響，係 Chloe 嘅。

「여보세요！누구세요？……다시？……예~！언니？언니！……어떻게？！……괜찮 니？……너 지금 어디 있니？」Chloe 聲線好緊張；憑我學咗幾個星期嘅有限公司韓文，我聽到嘅係「姐姐？點呀你？！你喺邊呀？」Chloe 係獨女，所以佢口中嘅姐姐，應該係美恩。

（題外話，韓文原本係冇乜標點嘅，我上面嘅標點係為咗表達語氣，真正韓文書面語唔會咁用。）

「係美恩姐姐，」Chloe 收線後同我講。「佢飲醉酒，我哋快啲去接佢。」Ricky 有事返咗菲律賓兩日，美恩就飲醉酒，搞乜呢？

「佢喺邊呀？」我問。

「弘濟洞。」Chloe 答我，邊截的士。

上咗車之後，我問佢：「點解個個飲醉酒都關你事嘅呢？」

「我點知呀，你唔問吓你自己？」Chloe 答我。「可能我夠溫柔可愛啩……」

九點，弘濟洞某處街頭。

的士兜咗一陣，我哋終於喺某路口，搵到「柱女」美恩 — 佢醉到攬住碌燈柱坐咗喺地下。

我哋行到埋去佢身邊企咗喺度，我覺得我同 Chloe 都應該諗緊同一樣嘢：點收科？

呢個時候，我忍唔住 kit 一聲笑咗出嚟。Chloe 用手掙撞咗我一嘢，但係過唔到三秒，佢都 kit 一聲笑咗出嚟。

「我哋有冇相機喺度呀？」佢仲冇同情心過我囉。

開完玩笑，我哋夾手夾腳挾咗美恩上的士，去梨泰院，因為嗰度係最容易搵到通宵 cafe 嘅地方。美恩咁醉，冇幾個鐘應該整佢唔醒。

喺的士上面，美恩醒咗，但係冇講嘢，淨係喊；好似細路扭計嗰隻喊。

「點樣𠱁一個卅歲女人唔好喊㗎？」同我中間隔住咗個美恩嘅 Chloe 輕聲問。

「同𠱁一個三歲嘅差唔多啩……」我嘅唯一經驗，係一個十八歲嘅喊住𢱕我心口，其他嘅我真係唔知。

「美恩乖，美恩唔好喊……」Chloe 真係聽我點，一邊𠱁一邊摸美恩個頭。

然後美恩伏咗喺佢膊頭繼續喊；Chloe 啤住我，細聲講咗句：「shitty idea!」

咁唔係點喎？起碼佢唔係伏喺我膊頭喊先啦。

去到cafe，侍應姐姐可能見慣世面，二話不說帶咗我哋去一張角位檯坐低，然後好快就拎咗啲熱毛巾俾我哋；我哋幫美恩敷熱毛巾，過冇耐佢就再瞓過。

呼~終於鬆一口氣。

凌晨兩點，美恩終於醒喇。

佢坐咗起身、視察四周環境，然後見到我哋坐咗喺佢對面。

「弟弟、妹妹，我瞓咗幾耐呀？」美恩仍然懵懵懂懂。

「幾個鐘喇，姐姐你冇事吖嘛？」Chloe 關切咁問。

呢個時候，我幫美恩叫杯 house coffee 做回魂咖啡，Chloe 更正我，要 double espresso。

「係啦，姐姐，做乜飲咁多酒呀？」其實我都想知發生咩事。

「我……我今日撞返……以前嘅男朋友……」美恩有少少欲言又止。

「我知喇！」Chloe 傻勁發作。「梗係佢重新追求你，你唔知點面對佢同 Ricky，於是借酒消愁。」

輪到美恩 kit 一聲笑咗出嚟：「我嘅傻妹妹，你睇得太多電視劇喇！」我點頭贊同，Chloe 伸一伸脷。

美恩開始隨隨道出佢嘅故事……

美恩當年係醫學院學生，喺佢廿三歲嗰年，佢屋企透過相親，介紹咗個男仔俾佢，然後佢地開始發展感情。起初一切順利，個男仔同美恩感情與日俱增，甚至去到談婚論嫁嘅地步；兩家人欣喜萬分，為兩人準備婚禮。美恩甚至放棄學業，一心出嫁從夫。

（按：當時嘅韓國，仍然係「男主外、女主內」嘅世界；呢個情況直至亞洲金融風暴之後開始有所改變；無他，啲韓佬失業嘛。）

點知，喺婚禮前大約兩個月，有一晚，個男仔飲醉酒，上咗美恩屋企，想同美恩親熱；美恩唔肯，結果個男仔打傷美恩。美恩鼻骨爆裂，仲斷咗兩隻門牙，接受咗兩次整容手術。個男仔事後向美恩道歉，雙方家人認為多一事不如少一事，決定唔再追究，婚禮如期舉行。

（按：男人老狗打女人已經唔啱，佢仲要擸嘢打！打完當冇事？美恩其實有冇檢查過個冚家祥有冇 JJ？）

但係美恩喺受重傷之後，堅決唔肯嫁俾個男仔。喺說服父母唔成功之後，美恩離家出走，搬咗出嚟住。男方嘅家人喺婚事取消後深深不忿，於是到處以「棄婦」之名誹謗美恩。

（按：自己得唔到就攬炒！而我不知道乜撚嘢叫「棄婦」；都未嫁俾你，點「棄婦」唧屌你！仲要個個都信！廿年後寫返出嚟我都仲有火！）

大家都知，蜚短流長，棄婦之名好快四處傳揚。因為咁，美恩之後三次相親失敗，由於醫學院學業中斷，加上個人經濟狀況唔容許美恩繼續學業，所以只能報讀護士學校，任職護士。一年前，美恩喺醫院認識打波受傷嘅 Ricky，一對有情人就係咁開始一齊。

（按：好彩天有眼，Ricky 係個好好先生。）

我越聽越唔敢相信自己對耳。我一直以為，呢啲故事只不過係 TVB 用嚟呃牛頭角順嫂嘅爛劇橋段，就算係真事都應該係民初嘅事，從來冇諗過會發生喺二十世紀九十年代。

我點起一支薄荷萬定驚，扯咗冇兩啖，Chloe 搶咗我支煙，狠狠咁扯咗一啖，煙頭星火通紅；我諗我哋兩個都承受唔到，美恩呢個咁沉重嘅故事。

清晨五點，我哋送咗美恩返屋企，我同 Chloe 行咗去纛島嘅江濱。我哋兩個一直都冇傾計，只係手拖手咁行；呢段路程可能係我哋認識以嚟，最靜嘅十分鐘。

去到江濱，我停咗落嚟，Chloe 企咗喺我面前。我問佢：

「你驚唔驚會有同樣嘅遭遇？」

「你會打我？」佢問我；我堅定搖頭。

Chloe 冇答我，只係緊緊咁攬住我。

一陣之後，佢放開我，用好倔強嘅眼神望住我，好堅定咁同我講：

「我唔驚。」

（待續）