編輯嚴選

當首爾仍是叫漢城的那些年（柒）

住喺高陽市同全世界最唔同嘅地方，就係呢度永遠都有啲蛛絲馬跡提醒你，你同危險只係一線之隔。我住嘅位置，同板門店或者最近嘅南北韓邊界，直線距離都只不過係三十公里左右。由於南北韓喺技術上仍然係處於交戰狀態，喺距離前線唔算遠嘅高陽市唔多唔少都會有啲你喺其他城市未必見到嘅嘢。

例如喺市外圍通往板門店嘅公路「自由路」，係我見過唯一一條兩邊有戰壕嘅公路。每年總有啲日子，你會見到裝甲車喺戰壕行走；某啲夜晚，你亦會見到照明彈高掛喺漢江嘅天空中。日後故事發展落去，亦因為呢個獨特嘅地理環境而發生一啲我認為幾浪漫，你會笑我戇鳩嘅事情。

星期六上晝十一點幾，喺離開馬頭一個地鐵站嘅「注葉」某商場裡面，Sophie 同我喺度聽緊一個電話 sales 介紹緊某款「三叔」手機嘅功能。不經不覺咁過咗一個星期，我覺得係時候需要一個電話傍吓身。由於我已經領教過韓國人高超嘅英語水平，所以我決定情商 Sophie 幫手。

又由於我嘅工作簽證仲未搞掂，理論上我仲係黑工，所以出唔到電話合約，要用 prepaid service（五萬圜六百分鐘，KT 嘅 011 係當年最好又最貴嘅 carrier），個電話亦冇得分期，要一炮過俾幾十萬圜；呢期我簽卡簽到爆晒廠。

為咗多謝 Sophie 放假都陪我出嚟 shopping，我點都要請佢食餐晏，咁啱又竟然俾我喺呢個山旮旯地帶搵到間 Marché，於是我哋去咗 Marché 食自助 lunch。席間嘅閒談話題當然少不免互相套料收風。

我約莫咁講咗我嘅身世俾佢聽。唔知點解，韓國女性不論年紀最關心嘅，係我有冇女朋友。喺學校，我已經唔止一次俾啲學生妹問我呢個問題（當然唔係我嗰班仲未戒晒尿片嘅妹妹仔），連唔係我教嘅都會走埋嚟問；而家到 Sophie 問。

我當然唔會話佢聽，我有個 no strings attached 嘅鬼妹 ex 等緊我返去床戰啦！就算我再遲鈍，我都感覺到，韓國人某程度上思想比香港人保守；更何況我係教書嘅。

講開又講，呢個幾星期我俾人問得最多嘅，係除咗有冇女之外，就係幾歲。韓國人有鋪癮，就係初相識就問你幾歲同結婚未，男女老幼都係咁問；我最初不明所以，後來先知道，原來佢哋（尤其是中年及以上嘅人）係靠呢兩條問題嚟俾個社會階級定位你。屌！果然係儒家思想社會，屙篤尿都要分階級。

我當年對呢啲問題其實冇咩話反唔反感，可能因為年紀仲細；我有啲外國朋友（如我同事 Kirsty）對呢類問題就非常反感。都啱嘅，我幾歲結婚未關你蛋治咩！

Sophie 亦都解釋咗俾我知，點解學校要開到母雷公咁遠嘅高陽，而唔喺漢城。同香港一樣，漢城本身嘅人口已經接近飽和，好多年輕家庭都會般去新市鎮定居；高陽就係其中嘅一個。一山一帶嘅高陽市係小康至中產嘅，近年喺香港幾出名、好多港女打卡嘅「盆唐」就係另一個比較 well off 嘅新市鎮。喺漢城，有個錢嘅人一般都係聚居喺狎鷗亭同江南一帶（PSY 嘅 Gangnam Style 係有一定嘅歷史背景）。由於漢城大部份地區都已經有一定數量嘅語言學校落咗腳，新市鎮嘅發展空間大好多。

唔怪得之連我呢啲門外漢都有搵食空間啦。除咗小魔怪班，我每日都有另外兩班 TOEFL 同 IELTS 雞精班（即係主要做各式模擬練習），共六班（幼稚園當四班計）要教。

（待續）