當首爾仍是叫漢城的那些年（叄）

既然決定咗留低，我就需要打電話返香港同美國，交待吓啲身後事。

打返香港，主要係想同我阿媽交待一下，佢早幾日先問過我，畢業後有咩打算。我係刻意咁盡量避開我老豆，如果大家仲有記憶的話，應該記得我有個鍾意 verbally 屌我多過鍾意 physically 屌我老母嘅老爸。喺呢個邁向人生新一頁嘅敏感時期，我唔係太肯定我嘅情緒能夠洽當咁處理佢嘅語言暴力。

至於美國，我就要搵我嗰個再見亦是朋友嘅 ex。

佢係我嘅 AP 同大學同學，我哋拍咗拖幾年，半年前協議分手，因為覺得我哋都即將離開校園，各有各發展，喺呢個時候迫對方 keep 住一個承諾好唔公平。分手之後，我哋仍然一齊住，仍然會上床，但係彼此之間再冇任何承諾。佢喺我離開美國之前應承續租我間屋，直到我返去；我而家要叫佢幫我寄啲衫過嚟。就算撇除分咗手仲繼續上床呢啲 bonus，佢真係我一個知心嘅朋友。

但係當有人問起我同佢係咩關係嘅時候，我又真係唔識答。女友？分咗手喇喎；好友，又好似唔止喎；炮友？又冇咁簡單。媽，我好亂呀！

交待完身後事，我就開始利用我仲有兩日嘅空閒時間，周圍咁四處遊盪。由於我盲字都唔識多個（한글；中英文我梗係識啦），我所能夠倚靠嘅，就係到埗時喺觀光公社攞嘅地圖同地鐵路線圖。我沿住地鐵線，睇吓有邊啲近地鐵站而我又有興趣嘅景點去觀光。

喺搭地鐵嘅過程中，我第一樣發現嘅韓國人缺點，就係佢哋行路好粗魯，橫衝直撞，男嘅係咁，女嘅都係咁。短短一個上午，我俾人狠狠地撞咗七八次！最奇怪嘅係啲女係完全唔會保護自己，同啲麻甩佬一樣咁亂撞。有兩三次仲係兜心口車埋我嘅身邊，我隻手臂完完全全可以感受到，佢哋對波一邊又一邊咁掃過我！

老老實實，妳唔介意省我波餅，我介意大庭廣眾咁俾你省呢；我唔係一個咁隨便嘅男人嚟！

喺韓國呢三年係我呢世人接觸（係接觸，唔係摸）最多唔同女性胸部嘅一段日子；紀錄至今仍然未破。

亂行亂盪，我去咗東大門運動場（而家叫「東大門歷史文化公園」），因為本觀光書話我聽呢度有平衫賣，我需要一啲斯文少少嘅衫：我太老定，以為兩三日就走，只係帶咗三件 tee 一條牛，星期五返新工連件似樣啲嘅衫都冇。

行到某商場門口，見到有台燈聲有人勁歌熱舞緊，出於好奇，我停低睇埋一份；其實韓國人嘅歌舞天份都唔錯，睇咗一陣都覺得有板有眼。

音樂停咗落嚟，人群開始散去，我都想離開之際，突然間，前面有個行路唔帶眼兼冇裝倒後鏡嘅女仔，冇打燈冇盛就近距離轉身，結果佢同佢手上嗰杯類似思樂冰物體，一齊猛力撞入我懷內……

我嘅制約反應係好大聲咁「屌」咗一聲，然後退後一步，努力咁想將嗰啲潑喺我身上嘅綠色思樂冰從我件白色polo上面撥走。個女仔同時都撥緊佢自己個身，把口好似念咒咁不斷「I’m sorry! I’m sorry! I didn’t mean it!」𠵱？識英文喎！

佢係我喺韓國接觸到第三個識英文嘅人。我去 KFC 啲店員都唔識英文呀！

我稍稍收斂我嘅怒氣，向個女仔望過去……

然後……到我呆咗。

（待續）