《這篇文章以香港廣府話撰寫》
「岩岩訓醒，而家打埋最後一日機。」我剛剛聽明仔咁講。
2021年將近結束，我有一樣嘢想搵大家幫幫忙！我認識嘅一位畢咗業嘅中學生（化名明仔）聽日會判刑，事情係咁嘅：－
2019年某日，明仔喺示威現場被捕，冇證據證明佢做過啲乜嘢，只有警察嘅證供，就被控暴動同埋拒捕。唯一嘅物證就係一條影片，影到明仔喺佈滿催淚煙嘅現場見到一個警察未及時配上裝備，狀甚痛苦，明仔於是上前遞上生理鹽水幫佢洗眼。就係呢一條明仔好心幫警察嘅片可以證明到明仔喺現場！
2019年尾，明仔被釋放後，我有好幾個月逢星期二陪伴佢去警署報到。初時見佢，兩腿下肢有唔少瘀傷（被捕時被打傷），行路拐吓拐吓。另外醫生話佢吸得太多催淚煙，肺部同埋支氣管都花晒。最令我心噏嘅係明仔行路嘅時候，行唔夠十步就擰轉頭，東張西望，佢係怕俾人跟蹤......
「暴動同埋拘捕如果告得入，分分鐘要坐成3年，我讀緊嘅副學士就付諸流水......打得甩嘅機會好微，因為係個愛國嘅法官，仲要係會重鎚出擊個隻！」明仔講俾我聽嘅時候講得好「輕鬆」。我前幾日幫佢寫緊封法庭求情信嘅時候，腦海一直諗住佢同我講嘢嘅時候嗰一種故作輕鬆嘅畫面......
除咗公眾人物同埋組織正在受苦，亦請大家唔好忘記有更多名不經傳嘅弱小嘅兄弟姊妹受緊苦。
2021年最後一日係明仔嘅判刑日子，我哋冇乜嘢可以做到，我淨係懇切邀請你幫忙為佢祈禱／祝禱／祝願。
2021年將近結束，未知你喺今年過成點。謹祝來年內心平安、身體健康！
