我們還需要有花田十輝的 Love Live! 嗎？

自從2009年 《K-ON！輕音部（けいおん!）》 嘅成功之後，唔同嘅動畫製作公司突然發現，市場上需要嘅並唔係各式各樣嘅戰鬥番或者機器人番，而只係可能需要將唔同嘅妹子畫得好萌好可愛已經可以賺大錢、發大財。所以自從2009年之後，偶像類型嘅動畫就好似雨後春筍咁樣遍地開花，而且連帶比 K-ON! 更早成立嘅 THE IDOLM@STER（偶像大師系列，下稱：IM@S ）人氣亦都急速上升，唔同類型嘅偶像番亦都越來越多。但雖然競爭龐大，但其實御宅族嘅人數一直都無一個明顯嘅大幅增加或者減少嘅趨勢，係咁嘅情況之下，即使有唔同類型嘅偶像動畫作品誕生，但畢竟大家對唔同類型嘅偶像都有唔同嘅希望，所以咁多年以來能夠成功屹立不倒嘅作品其實真係一隻手都數得晒，而當中嘅佼佼者就當然係 IM@S 偶像大師系列、主打 DJ 活動嘅 Dig Delight Direct Drive DJ （簡稱：D4DJ ）同今日要講嘅 Love Live! 系列。呢個其實有少少似宗教戰爭，因為幾派人都有少少水火不容，雖然都有唔少人邊一邊都會留意，但絕大部份人都因為時間問題所以只會留意自己鍾意果方面，所以係唔同地方其實好容易見到幾派人都會有磨擦出現。

相信講起偶像番，相信對於大部份對於ACG文化唔係咁深入了解或者只係純粹有興趣會睇嘅人來講，對佢地來講，一定無可能對成個系列作品或者整個跨媒體企畫都好熟悉。舉個例咁講：佢地認識嘅可能只有一出門口就比車撞嘅《佐賀偶像是傳奇》（ゾンビランドサガ）、我成日都係度鬧嘅 22/7、動畫工房永遠都唔會承認曾經製作過嘅 《SELECTION PROJECT（セレクション・プロジェクト）》 同講述地下偶像與粉絲互動的 《神推偶像登上武道館我就死而無憾（推しが武道館いってくれたら死ぬ）》等等。但基本上現時市場絕大部份嘅動畫，背後目的都係為了宣傳整套作品（例如：漫畫、輕小說）而製作的，咁所以好多時只是做一季12集或者兩季24集已經完結。但相比 Love Live! 或者偶像大師系列呢一種後面有龐大資金同唔同公司都有份參與跨媒體企劃來講，動畫唔單只係宣傳咁簡單，背後嘅心態絕對係想令到更多人踏入或者了解呢一套作品。不過，兩者相比起其他作品，當然係小巫見大巫。

之但係，成也動畫，敗也動畫。一套動畫嘅成敗絕對可以影響整套動畫嘅後續發展。例如22/7，雖然整個企劃係由AKB48、SKE48等等日本著名女子偶像團體嘅總製作人秋元康負責，但 22/7 就絕對成為了他的滑鐵盧之作。雖然背後亦都有 Sony Music 嘅龐大協助和資金，但缺乏了人氣和運氣，導致動畫播放完畢之後雖然曾經有人氣嘅高峰，但畢竟有成員接二連三離開，但又不找新成員替補，而且更曾經傳出各 成員本身不和 和 成員和營運不和 傳聞，導致人氣大幅度下降，基本上已經難以回到當時輝煌的景象，而且佢嘅定位係處於2.5次元，相比任何一套偶像番組，絕對係處於一個劣勢；即使最近有新成員加入，但我仍然相信泛力無天，距離結束嘅日子唔會太遙遠。

Love Live!（ラブライブ！），全名：Love Live! School idol project （ラブライブ！ School idol project），係一個由2010年開始嘅超大型跨媒體作品，背後主要由日本動畫公司日昇動畫（萬代南夢工影像製作）、唱片公司 Lantis 同電擊文庫《電擊G's magazine》共同參與嘅作品。截至目前為止，合共有五個企劃（企劃名稱／組合名稱），分別係：Love Live! School idol project／μ's、Love Live! Sunshine!!／Aqours、Love Live! 虹咲學園學園偶像同好會／虹咲學園學園偶像同好會、Love Live! Superstar!!／Liella! 同 虛擬學園偶像（目前仍然尚未公布詳情，預計今年秋季左右開始有更多消息釋出），當中 μ's 同 Aqours 已經完結。對於大部份人來講，一講起 Love Live!，相信大部份人都會立即想起就係 μ's。無他嘅，因為已經唔單止成為了一代人嘅回憶，而且更係一種曾經嘅潮流。

首先等我簡單介紹 Love Live! 系列先。第一個作品：μ's，原名取自希臘文，是希臘神話中九位主司藝術與科學的文藝女神總稱。「μ's」的名稱由一位名為「御兒勇馬」的粉絲提供，並在之後的投票中獲選。故事大約係講述「音乃木坂學院」因為少子化問題，入學人數驟減而需要廢校，之後九個人組成了校園偶像拯救學校，藉偶像的名氣增加生源來挽救校園的故事。第二個作品：Aqours，講述「浦之星女學院」九位少女，憑藉校園偶像 Aqours 的身份以避免廢校為的故事。第三個作品：虹咲學園學園偶像同好會，相比起前面兩個，既沒有需要參加Love Live! 嘅負擔，亦都沒有廢後嘅危機。只是因為學園偶像魅力而心動，正式踏入學園偶像這個廣大的世界，並與朋友一起追逐夢想。第四部作品：Liella! ，相信大部份人對於佢第一印象，並唔係同第一、二部作品類似嘅故事，而係一個梗：你好，謝謝，小籠包，再見。不過最終都係有話題但係無收視。Love Live! 原本係成個系列嘅名稱，或者咁講，係唔同嘅作品入邊，Love Live! 都係一個比賽，一個日本全國嘅校園偶像嘅比賽。但係好多時因為 μ's 實在太出名，所以好多人直接將 μ's 等於 Love Live!，雖然唔可以話絕對錯誤，但要搞清楚 Love Live! 其實係成個企劃嘅名稱，一個大型跨媒體作品，由動畫、漫畫、CD、電影、遊戲到演唱會應有盡有，相比之下，應該只有偶像大師可以有類似嘅輝煌成就。

對於 μ's，大家當時都覺得呢一類題材好新穎，加上大部份演員都係一線嘅聲優，所以當時都吸引了不少人氣，曾經有好多非官方來源表示，在 μ's 大紅大紫的期間（主要是 2012ー2016年期間），整個企劃對日本嘅 GDP 帶來最少 1ー2% 嘅貢獻，可以睇得出佢嘅人氣或者周邊有幾熱賣。雖然2016年隨著《LoveLive! μ's Final LoveLive!〜μ'sic Forever♪♪♪♪♪♪♪♪♪〜》演唱會完結，但對好多人來說：μ'sic forever，永遠都係大家心目中留下一個不可磨滅嘅印記。當中有好多好經典嘅歌曲，但係講到當中嘅佼佼者絕對係《Snow halation》，不過出名嘅原因絕對唔係首歌嘅旋律有幾美妙有幾動聽，而係因為踏入後半段嘅時候，觀眾們會拿出 UO（大閃光極UO 螢光棒，超高亮螢光棒），一秒換色來應援高坂穗乃果的橙色，令到現場忠實地重現 PV 的情況，這種壯觀嘅程度都目前為止仍然極少數演唱會可以媲美。之後嘅 Aqours 雖然都有繼承了 μ's 部份嘅人氣，但對於大部份人來講，美好嘅印象只存在 μ's ，所以其實那時會繼續睇 Love Liver! 系列嘅人數一下子大幅下降，加上故事都係差唔多嘅內容，所以都算係一個頗大嘅轉捩點。之後應該就是說虹咲學園學園偶像同好會，但係因為牽涉到更多嘅歷史問題，所以留返最尾先講。講了 Liella 先，正如我頭先咁講，Liella 繼續繼承了優良的傳統：廢校。好老實講，就算呢個題材你能夠有幾好嘅發揮都好，但係千篇一律或者類似嘅內容第一次、第二次觀眾都仲可能接受，但去到第三次嘅時候，觀眾一定唔會再接受，所以令到人氣更加急速下降，而且採用新人聲優，人氣更受打擊。更甚者，於2022年4月28日，官方週刊「Lovelive Days! vol.28」首次曝光二期生的消息，但由於沒有事前公佈二期生任何的消息，導致許多粉絲感到驚訝和憤怒，當日官方 Twitter 貼文更有許多負面回覆。雖然我唔係話而家 Love Live! 無人氣，但係絕大部份嘅都係來自虹咲學園學園偶像同好會。大家都係 Love Live! 系列，點解虹咲學園可以繼續有咁大人氣？最主要原因係因為佢同其餘三套講述嘅故事唔一樣，佢唔係要參加 Love Live! 大賽，亦都唔係要面對廢校嘅危機，只係一班喜歡唱歌嘅人加入，然後做自己鍾意做的事情。係呀，就係咁無聊，但係偏偏而家市場上對呢一種劇情好受落。不過講到尾，最主要都係因為虹咲學園嘅背後控制嘅人就同其餘三套唔同。Love Live! 成個系列係一個由好多公司負責嘅企劃，所以所有作品都主要由萬代藍夢工（株式会社バンダイナムコフィルムワークス）管理。唯獨虹咲學園就係例外，由武士道（株式会社ブシロード）管理（係呀，你無睇錯，係管理 D4DJ 果一個武士道），所以相對上大部份動畫嘅人設或者監督都同另外三套唔同。所以虹咲學園第一季動畫係首播嘅時候，令人有一種耳目一新嘅感覺。而且第二季動畫雖然只是播放了幾集，但每一集在日本著名網站Nico Nico上面嘅評分已經比Aqours 同 Liella! 每一集播放時嘅總評分高，甚至乎貼近 μ's，可見市場上對於千篇一律嘅劇本已經無興趣。

講返花田十輝，一個日本嘅編劇統籌、系列構成、編劇。係佢嘅筆下，有大大小小唔同嘅作品。如果當中要揀佢成名嘅作品，絕對係2009年嘅 K-ON！輕音部。之後當然亦都有好多成為經典嘅動畫，例如開播三集就要臨急臨忙改片頭曲動畫嘅《中二病也想談戀愛！中二病でも恋がしたい！）》系列、被譽為史上最高難度嘅音樂作品ー《吹響吧！上低音號（響け！ユーフォニアム）》、一套大家都唔會承認曾經正式出版，只會當同人作品嘅《艦隊Collection（艦隊これくしょん）》、評價好兩極嘅《比宇宙更遠的地方（宇宙よりも遠い場所）》同埋今日要講嘅 LoveLive系列。其實係唔同嘅作品入邊，我地絕對可以睇得出花田十輝對於青春同校園類型嘅作品絕對係得心應手，甚至乎可以話已經成為行業嘅頂峰。基本上，只要見到花田十輝個名，十不離九都可以肯定係青春或者校園嘅作品，不過係唔係每一個都啱睇，就真係見仁見智。

由2010年最開始就有留意成個系列，到而家雖然無以前咁熱衷，但係都會繼續留意最新消息嘅 Love Live! 系列骨灰級嘅 fans 黎講，花田十輝無疑係令到 Love Live! 系列開始多人留意，但當第一次成功嘅模式複製到第二次、第三次嘅時候，就算係一個好好好喜歡偶像番的人，都總會覺得十分沉悶，都會有厭倦嘅一刻。當初 μ's 的而且確帶俾我好大嘅衝擊，甚至乎睇完 μ's 最後一場 live之後都有喊出來。但係當時我諗邊個都無諗過，第二套續作竟然已經開始水準下降。水準下降唔係話動畫畫風或者作畫問題，而係將類似故事再重複一次，雖然已經開始有少少沉悶，但係都仲勉強可以接受。甚至乎當年更加有幸飛到台灣親身參加連續兩日嘅海外Live，所以都算達成要去台灣看一次 Live 的心願。第三套續作，虹咲學園，當初動畫真係抱着一種以為都係講廢校嘅心態去睇，畢竟當初只係遊戲入邊一個小配角，但結果真係出乎意料，出奇地好睇。但係去到第四套嘅時候，再一次回到基本步，將故事再一次退回沉悶嘅輪迴當中。

虹咲學園正正就係做到呢一點，創作一個與別不同嘅故事。虹咲學園最初其實只在遊戲入邊一個毫不起眼嘅隊伍，之後演唱會同動畫播放之後先至開始多人了解。正如我一直都咁講，市場上每季會看動畫嘅人數其實每一季都係差唔多，要點樣係呢個市場上面脫穎而出，呢個先至係問題。花田十輝對於製作青春同校園類型嘅作品無疑是頂峰，但容許我直接啲咁講，第三次做相同或者類似嘅題材嘅時候，其實觀眾一定唔會想睇。雖然 Love Live! 係一個跨媒體嘅超大型企劃，但無可否認嘅係如果想令到呢個系列有更加多人接觸或者了解，動畫宣傳係一定需要嘅，畢竟大部份人都係透過動畫了解整套作品。之但係，第一次嘅成功完全未能夠複製第三次，所以難聽啲咁講，虹咲學園絕對係拯救咗整個系列。虹咲學園每一集其實都係無乜太特別嘅內容，甚至乎每一集動畫都可以話係為了賣 CD 而製作，雖然大家都一定聞到都有一種好濃烈嘅商業味道，但係佢成個故事係可以睇到大家好舒服，完全唔使諗，絕對可以放空自己伀。相比起而家好多唔同嘅番組，例如異世界或者戰鬥看，虹咲學園絕對令人眼前一亮。當然我唔係話花田十輝嘅才華開始沒落，但自從比宇宙更遙遠的地方動畫播放完之後，其實大家開始慢慢發現花田十輝嘅老問題，就係佢自己在每一套動畫入邊嘅世界觀都係好美好，雖然對於廣大觀眾來講係一件好事，但係調返轉我覺得係無亮點，雖然比宇宙更遙遠嘅地方絕對都係一套催淚嘅作品，但其實有好多細節上嘅嘢都係草草了事甚至乎沒有講述，所以令到好多人都開始厭倦佢嘅作品。

去到後期到 Liella 嘅時候，其實好多人都問花田十輝可唔可以唔好再拎呢一類作品出來，因為已經睇到大家好悶好厭倦。我自己覺得啦，青春同校園絕對係佢嘅武器，對於其他作品大家都一定好歡迎，但對於love Light 系列來講，如果都繼續由佢負責嘅，我相信總有一日都會步22/7 嘅後塵。我當然唔係話 Love Live! 呢個系列會終結，而係觀眾人數逐漸減少，最終乏力無天，變成一個三不像。虹咲學園其實正正就係一個啟示，就算係同一個系列嘅作品，只要由唔同嘅人製作，最終嘅成果都會唔同。雖然我唔敢話到底係萬代嘅問題而影響花田十輝，定係武士道想成功係 Love Live! 系列中脫穎而出，成為第二高評價嘅 Love Live! 系列（雖然已經成功）。我真係唔知道，但係可以肯定嘅係，一定唔可以繼續比花田十輝繼續落去。Liella 第二部動畫亦都好快會播放，近期亦都宣布新增五名成員，但係換來嘅係一片罵聲，可以見到就算係續作都好，只要前作做得唔好，就算之後有幾好嘅聲優或者動畫補救都係無補於事。所以容許我自私啲咁講，花田十輝，你去創作其他作品，我相信一定可以順利繼續成為經典作品，但係要繼續搞 Love Live! 系列，應該只會搞死佢。

雖然相比起偶像大師，兩邊都有唔同嘅黑歷史，例如新田恵海事件和成海瑠奈事件，我們可以睇到嘅係前者係絕對嘅包容，但後面事件係絕對嘅炎上，所以真係好睇過一套作品對於觀眾嘅熱愛程度。當初虹咲學園公布部份歌曲將唔會全部再由接近 Love Live! 御用嘅作曲填詞人畑亞貴嘅時候，其實其實大家都感到愕然，始終雖然動畫評價評價不斷下降，但如果再失去畑亞貴，大家當初真係好擔心會真正步向滅亡。但係幸好結果出來令人意想不到，所以某程度上都可以肯定畑亞貴絕對係花田十輝影響嘅。因為即使一路創作嘅音樂旋律有幾美妙動聽都好，但係如果動畫不能夠宣傳，都係徒勞無功。

最後真係要同大家講聲抱歉，因為我最初接觸到嘅係 Love Live! 系列；至於偶像大師系列，其實我只有留意灰姑娘女孩同埋郁原 ゆう，所以當中如果對偶像大師嘅粉絲如有任何冒犯，請見諒，畢竟我對偶像大師嘅認識絕對無你地咁深入。今次就講到呢度先，走之前希望大家可以慷慨解囊係下面Likecoin果度拍五吓手，作為支持我創作嘅原動力，多謝。今日就講到呢度先，下次再見。