另一個境界的 LoveLive!ー虹ヶ咲学園スクールアイドル同好会第二季

啱啱過去嘅 2022 年4 月春季新番，最多人留意嘅新番應該就係《SPY×FAMILY間諜家家酒（スパイファミリー）》同埋《派對咖孔明（パリピ孔明）》，但係對於我來講，對呢兩套我係完全無興趣，反而我留意嘅音樂類型嘅番組，例如今日要講嘅：虹ヶ咲学園スクールアイドル同好会第二季（下稱：虹ヶ咲学園）。

正如我之前介紹 LoveLive! 嘅文章都有提及過，作為一個十年前已經開始睇 LoveLive! 系列嘅人來講，虹ヶ咲学園相比起其他，既沒有參加 LoveLive! 大賽嘅憂慮，而且感覺上係同觀眾一齊成長，絕對係令好多人眼前一亮。雖然第二季有三個新角色加入，成為歷史上最多人嘅 LoveLive! 團體，一共十三人，不過正確來講應該係12＋1，因為第十三人是作曲的一人，並沒有參與表演。我相信大家經歷過《Love Live! Superstar!!》唐可可之後，大家對於LoveLive! 系列再加入香港人呢件事相信係好介懷，不過大家擔心嘅原因絕對唔係因為地區問題，而係因為好驚好似上次咁成為一個meme。雖然今次廣東話同普通話混合嘅情況仍然時有出現，而且亦都算係有少少突兀，但係相比起星團，今次鐘嵐珠嘅加入絕對可以安排得幾好。而且負責鐘嵐珠嘅聲優ー法元明菜，根據維基百科嘅資料，係佢細個嘅時候的而且確係廣東省生活過，感覺上發音亦都比較正確，所以雖然有陣時都係突然聽到一句中文會好唔習慣，但係最少我地聽到嘅係正音。（可能只係我自己執着，但係無論係咩語言都好，正音，尤其是係電台或者電視台節目，正音呢一種發音真係好重要，因為往往好多人學習語言或者學習說話最大嘅來源就係電視或者電台。如果一個主持或者聲優發音唔正確，久而久之就會令到好多人跟他們的說話，發音有懶音而自己都唔知道，當知道嘅時候已經為時已晚難以修改。所以鐘嵐珠相比起唐可可，佢係一個比較討人喜歡嘅角色。）

至於第二期嘅故事其實真係無乜特別，開頭就是講學園祭，然後分成唔同小組表演。係表演之前，大約講解作曲過程等等，同埋大量嘅妹子貼貼。之後亦都因為場地問題，搞到要同另外五間學校聯手一齊舉辦學園祭。學園祭之後就係新人加入，雖然當中個故事有少少奇怪，但都算係比較經典嘅一個流程。相比起每一集嘅歌曲，新人加入呢一個流程好似先至係變成了每一季 LoveLive! 系列最重要嘅部份。新人加入之後就係開感謝祭，而最後一集當然亦都有最經典嘅大合唱環節。不過今日就想特別講第十三集，因為真係創造了許多不可能。容許我作少少吐槽，就係你製作組真係好鍾意係最後一集專登製作意外出嚟，虹ヶ咲学園第一季13集就落大雨，第二季13集就璃奈塊故障Www

對於一集動畫來說，三十分鐘嘅時間，一集大約二十四分鐘左右，撇除主題曲和片尾曲，還有宣傳不同商品的廣告時間，七除八扣之後每一集實際大約只剩下二十分鐘左右。要在二十分鐘內放進十三首歌，聽起上來絕對係天方夜譚，一係就每一首歌剪到餘下一分鐘左右，然後其他時間推進劇情；或者整集也是在唱歌。正當我們以為沒有可能之際，製作組竟然選擇了前者和後者同時兼顧。雖然今集相比起其餘十二集，劇情只佔好少部份，而且頭十二首個人的歌曲，平均只有不足一分鐘的時間。但是透過有限的時間，製作組竟然可以能夠將每一首歌最精粹的地方表達出來，忽然之間整個違和感消失了，睇到好舒服。而且很明顯就是搬回以前各場演唱會的場景、甚至搬回第一次演唱會海外越洋衞星轉播和各國的場景，而且還有向一直以來都不停付出嘅繪師致謝之類的感覺。而且節省下來的時間，最後一首大合唱竟然可以完整播放，音樂表演方面真的無可挑剔，繼續一貫 LoveLive! 系列高水準的表現。正當我們以後劇情沒有太特別推進嘅時候，竟然有一個大家異想唔到嘅劇情，就係對高咲侑表達感謝之心。（呢個情況就有如連載超過八年嘅《果然我的青春戀愛喜劇搞錯了》，在第14卷結尾的時候，原作家渡航第一次喺作品中同各位觀眾講再見一樣。）高咲侑雖然也是虹ヶ咲学園スクールアイドル同好会其中一員，但她一直以來都只是負責創作，並不是會上台表演的一員，一直默默站在旁邊，支持自己喜歡的偶像。

其實相比起其他任何一套 LoveLive! 系列嘅作品，虹ヶ咲学園比較着重在觀眾層面出發，當然當中大部分功勞都要歸功於田中仁。曾經有人講過，虹ヶ咲学園着重的地方係陪伴觀眾成長；而唔係講述如何參加 LoveLive! 大賽，成為一個閃閃發光嘅偶像。無可否認，兩季合共二十四集，其實相比起其他嘅 LoveLive! 作品，虹ヶ咲学園由最初已經決定唔參加 LoveLive! 大賽嘅一刻開始，其實可以見到彷彿就係一直支持她們的觀眾作出感謝。田中仁亦都把完整的把虹ヶ咲学園的主旨給表現出來：做人有夢想，就應該去實現。那怕大家都是學院偶像，不管你是文學類還是演劇類，只要你有心，你也能成爲學院偶像。虹ヶ咲学園成功在於，成功將這一點昇華到另一個境界，而高咲侑就像是我們，默默的支持自己喜歡的偶像，所以觀衆的代入感十分強烈。亦都點解睇到最後嘅時候，大家真係會睇到喊出黎。今次喊出來嘅原因絕對唔係因為要分開，而係可以見到自己喜歡嘅偶像團體成長過程。

動畫完結之後，沒有好似其他系列咁馬上公布劇場版製作，彷彿就留咗一條後路。如果根據以前 LoveLive! 系列作品嘅歷史，唔係馬上公布下一季動畫製作決定就係公布劇場版製作決定，但係今次乜都無，彷彿就要大家等到 5th live 先至公布之後企劃。畢竟相比起其他 LoveLive! 系列，如果以故事嘅時間先來講只係推進了一年，如果要成為第一套有第三季 LoveLive! 系列嘅動畫，內容絕對係十分足夠；就算只是製作劇場版，但是根據動畫的伏筆，也不是太大問題。但係彷彿今次就係希望大家可以耐心等候，應該會有更大的消息會公布。我個人而言，當然希望有第三季，畢竟成為了史上最高評分嘅一集，希望可以再度刷新紀錄。（不過反觀咁多套偶像為主嘅動畫，其實達到92分以上嘅作品真係少之又少，反觀虹ヶ咲学園，每一集平均分也有90分或者以上，絕對係成為近年難得一見高評分的作品）

如果大家有機會，真係不妨花少少時間欣賞下與別不同嘅成長經歷，當係將自己重新回到學生成長時期，重新享受一次成長嘅經歷；或者純粹當陪伴一對偶像團體從零開始到成功一刻，可能最後你會有唔同嘅領悟。