基隆慶安宮
（台文POJ版）
Kin-nî sǹg sī góa khai-sí cháu-biō-hōe ê thâu-chi̍t-tang, thâu-tāi-seng sī khì tòe Báng-kah Chheng-san-ông àm-hóng ê kiâⁿ-ta̍h oa̍h-tāng, eng-kai sī Tó-sū-sàn-pō͘ pān--ê, mā chin tú-hó sin-khu-piⁿ ū se̍k-sāi tùi biō-hōe oa̍h-tāng ū gián-kiù ê iú-chì kā góa siāu-kài khan-kà koh chhōa góa khì sûi-hiuⁿ pài-biō, góa chiah tau̍h-tau̍h-á sán-seng hèng-chhù.
Sui-bóng kàu taⁿ chiah bô khì-kòe kúi-keng biō, m̄-koh tùi sì-kè hiuⁿ-hóe lóng chok ōng ê Má-chó͘-keng ìn-siōng chiâⁿ-chhim, ta̍k keng lóng ū bô-kâng ê te̍k-sek, kiong-biō kiàn-tio̍k lāi-té ê bí-kám siat-kè kap chong-hông pò͘-tì mā-sī án-chóaⁿ khòaⁿ to khòaⁿ-bōe-siān.Chit-pái lâi-kàu Ke-lâng Khèng-an-kiong, kan-na khiā tī biō-tiâⁿ góa tō ē-tàng kám-siū tio̍h kui-keng-biō sì-kho͘-ûi-á ê 「Sîn-ui hián-hek」（ ū-iáⁿ sī án-ne, bô phiàn--lín）. Chū gōa-kháu ùi biō-lāi khòaⁿ--ji̍p-khì, tē it khàm ê Thiⁿ-kong-lô͘, tē jī-khàm ê tōa-thiaⁿ, lāi-tiān ê Sîn-bêng-toh khòaⁿ kah thàu-thàu, ká-ná sī Má-chó͘-pô chē tī hia ùi lāi-té teh kā góa khòaⁿ ê khoán, góa kui-ê-lâng chi̍t-sî hiông-hiông bōe-tín-tāng, hō͘ i khòaⁿ-ji̍p sim-koaⁿ-lāi bô-thang siám-bih.
對大廳看入去主殿
Chi̍t-ba̍k-nih koh tò-tńg-lâi hiān-si̍t chiah khòaⁿ-tio̍h biō chiàⁿ-bīn ê kiàn-tio̍k chú-thé, kî-si̍t nā beh kap kî-thaⁿ ê biō sio-pí-phēng, Khèng-an-kiong bô-sǹg-sī siōng tōa keng--ê m̄-koh in-ūi le̍k-sú kú-tn̂g koh sī Tâi-oân hoat-tián chin-tiōng-iàu ê káng-to͘, chē-chē sìn-chiòng ê ì-chì hō͘-chhî kap chàn-chō͘ siu-lí, sò-tī sui-bóng Ke-lâng-siâⁿ ê kéng-tì hō͘-lâng phú-phú lah-sap ê kám-kak, Khèng-an-kiong soah hō͘ góa chheng-khì-siōng, kong-bêng-bān-tiāng ê ìn-siōng.
Kiàn-tio̍k nn̄g-pêng chhù-bóe-téng, thoân-thóng chián-liâm chè-chok ê Chhian-lí-gán kap Sūn-hong-ní bīn-tùi biō-tiâⁿ khiā--leh khì-sè ui-giâm, khah phah-sǹg sī biō-tiâⁿ sì-chiu-ûi kap téng-koân khong-kan lóng hō͘ hiān-tāi lâu-á-chhù pau--khí-lâi koh ū kúi-ki thiāu-á chhāi tiàm hia chin gāi-gio̍h, lio̍k-á phò-hāi khong-kan bí-kám.
Khèng-an-kiong sī ta̍k-nî Ke-lâng Tiong-goân-phó͘-tō͘ 15 sèⁿ Táu-teng it-tēng ài tò-tńg-lâi chham-pài ê só͘-chāi, só͘-tì chit chi̍t kang biō-lāi ê kang-chò jîn-goân lóng bô-êng-chhih-chhah, ū hū-chek hip-siòng--ê, an-pâi lō͘-sòaⁿ kap hū-chek chí-hui--ê, piàⁿ-sàu a-î-á sì-kè sûn-sī, hiuⁿ-kheh mā leh biō-lāi lōa-lōa-sô, góa kap pêng-iú nn̄g-lâng mā-sī kiâⁿ-lâi-kiâⁿ-khì hip-siòng kì-lo̍k, sui-jiân chhia-tūi iáu-bōe-kàu, ta̍k-ke lóng chok kî-thāi, kap biō-tiâⁿ teh hioh-khùn chia̍h-liâng--ê ê hiuⁿ-teng-kha sio-tùi-khòaⁿ mā sī kái sim-sek.
廟口 Tiâⁿ（埕）
Biō-lāi tû-liáu chú-sîn Ke-lâng-má, koh ū chē-chē chiòng-sîn thang hō͘ lâng chham-pài, chū it-lâu pài kàu jī-lâu, Bûn-chhiong-tè-kun tiān, Châi-sîn-tiān kap Gio̍k-hông-tiān piⁿ-á lâu-thui-piah-téng khek kah chin iù chin ū kó͘-tián khì-bī ê tiau-khek-pâi-á ka-thiam sìn-ióng ê bûn-hòa khì-chit, Táu-bú-tiān hián-hiān ùi In-tō͘ thoân--kòe-lâi ê sìn-ióng iông-ha̍p ê kha-jiah, Koan-im + Hu̍t-chó͘ ê hòa-sin hō͘-lâng kám-siū pêng-chēng an-sim ê sim-lêng kéng-kài, Chù-seng-niû-niû kap Goa̍t-ló khan-sêng chiàu-kò͘ chē-chē lâm-lâm-lú-lú kám-chêng sè-sū, pó-pì ka-têng sūn-sī hô-lo̍k.
Nǹg-kòe thàu-kng thian-pông-ē ê thong-tō, khòaⁿ ē tio̍h gōa-kháu chhù-bóe-téng thoân-thóng chián-liâm gē-su̍t ê chok-phín kap kāu-chhiú-kang ê Ka-chí-tô he lóng-sī tng beh siau-sit--khì ê kó͘-chá bîn-sio̍k gē-su̍t, chi̍t-sî soah kám-kak tām-po̍h-á m̄-kam, m̄-chai lán Tâi-gí ê bûn-hòa kám ē kiâⁿ ǹg chit-ê kāng-khoán ê miā-ūn lō͘-kháu？
厝尾頂 ê Chiàn-liâm（剪黏）kap Ka-chí-tô（交趾陶）
Kiâⁿ-kòe Tē-chông-tiān chin-chiàⁿ ū kám-siū som-som giâm-siok ê khì-hun, kui ê khong-kan lio̍k-á o͘-im tîm-tāng pit-kèng Tiong-goân-phó͘-tō͘ kî-kan sī Tē-chông-ông ê 「Chú-tiûⁿ」. Lo̍h-lâi kàu Thài-sòe-tiān kap Koan-sèng-tè-kun-tiān chham-pài kî-kiû kim-nî sū-sū-pêng-an kòe-koan-chám-chiòng, mā kî-kiû lán Tâi-oân ē-tàng tō͘-kòe chi̍t-kái koh chi̍t-kái ê gōa-lâi gûi-ki.
地藏王殿
