不專業足球筆記（六）
1. 今個星期最大粒花生，一定係港聯對國際邁阿密既呢場表演賽。
2. 我諗就算有睇開波既球迷，都未必會留意開國際邁阿密響美職聯MLS既表現。但實際上我有印象響美斯加盟之前呢隊波應該係響MLS東岸包緊尾，美斯黎咗之後係多咗贏波同和波，佢本人都入咗唔少波，但美斯傷咗之後，球隊成績又衰過，google返資料，佢哋上年收季既時候響東岸都係排緊尾二，15隊入面排第14。
3. 雖然美國既足球水平係好過香港，但我諗都好明顯，如果國際邁阿密唔係有美斯、蘇亞雷斯、佐迪艾巴同布斯基斯呢幾位前巴塞既超級球星，應該唔會有人有興趣用4880蚊港紙入場睇呢場波。
4. 其實美斯唔係冇黎過香港比賽，響2014年10月14日，阿根廷國家隊曾經來港獻技，果陣入場最貴既票價都只不過係1800蚊，仲有好多當打球星好似希古恩、迪馬利亞等等，但只係得二萬人左右到場。
5. 好明顯，今次國際邁阿密黎香港既宣傳係勁好多，而且差唔多完全集中響美斯上面。梗係喇，而家香港死氣沉沉，政府話要刺激經濟，證明香港仲係國際盛事之都，梗係落足本錢去宣傳喇，睇楊潤雄個樣，佢諗住呢次係大搞，可以起到宣傳香港既效果，令到香港可以反底，係張皇牌之中既皇牌黎架。你睇幾多高官連特首都黎埋就知喇。
6. 所以美斯最後冇出場，政府都好罕有咁勁大反應連出兩個聲明，又話要扣贊助又乜乜物物。跟住連主辦單位Tatler都要走出黎搞個記者會交待，點解美斯唔出場bla bla bla。
7. 嗱，美斯其實響國際邁阿密都有唔少時間受傷既，你問我信唔信佢係未傷癒，其實我係信既。而為免響呢啲無聊既比賽受傷，真係避戰都唔係冇理由。
8. 但問題黎嘞，呢場只係表演賽，既然早一日仲練到波既，響下半場補時落場踩幾分鐘草都好吖。再退一萬步黎講，就算真係傷到出唔到既，其實繞個場同大家揮下手都好吖，至少都叫做對果啲買咗咁貴既波飛入場既觀眾。
9. 係，我知你係球王，都知你一向唔鍾意應酬或者應付傳媒，更加知你乜嘢個人、比賽獎項都拎過，你都可能好唔想黎香港，不過唔黎都黎咗喇，做個樣都好吖，成場40000人我諗超過90%都係入黎睇你，都唔駛你真係落場唔駛你講嘢，唔通落場行個圈好難為你咩。
10. 不過老老實實，今次國際邁阿密黎其實好多方面都叫做幾唔比面下，我諗好多訪港既歐洲勁旅都冇佢哋咁寸。
11. 對於有人笑買飛入場果啲係做咗水魚，其實做咗水魚就梗，但我又唔認為佢哋可笑。佢哋比咗咁多錢，就係為咗想親眼近距離見到自己鍾意既球星獻技。大佬，啲飛真係好Q貴架，佢哋嬲同發火叫回水都好正常。
12. 其實講堅，今次呢次比賽，我覺得其實無論係賽前同賽後都搞得好差。尤其是本身只係一場黎cap水既商業比賽，響政府既介入之下突然上升到同香港既榮辱直接掛鈎，睇咗ReNews，入面有兩段好值得睇︰「於是乎，好大喜功、急於求成，不問好醜、愈快愈好，連一檔過去無主辦過體育盛事、「雞棚」味甚濃的主辦單位，都輕鬆獲得港府加持課金（小背景：近日中國大陸多次有搭個雞棚請球星訪華後出事的例子，美斯原訂去年底訪華取消已是一例），就有如小說、肥皂劇情節，家道中落的二世祖想幹一番大事，往往最易出事或遇到騙子，灣仔夜繽紛無電、越野車賽道只得一半、港珠澳馬拉松唔夠廁所、美斯因傷缺陣，其實一以貫之。
而更難堪的是，權力方實在太渴望這種「香港仍然得」的畫面，將所有事推到整個城市的榮辱興衰都和美斯雙腳息息相關的程度，結果美斯這一傷亦一腳將香港踢入十八層地獄。事事講政治，將太多場外價值加諸在商業行為之上，結果被一場以商業利益為本（波飛貴、食水深、受傷／唔夠錢就不上陣）的「盛事」一鑊翹起，只是剛剛好。」原文︰https://www.facebook.com/story.php?story_fbid=377889788329651&id=100083258981625&paipv=0&eav=Afb-gqqr-0Azwnz-0aabAFB_gNXFG_zNjeigD2ap6QloKdisMliwMDt2tcbXvm-KtgM&_rdr
13. 支持香港足球既，唔好唔記得星期三晚省港盃次回合對廣東啊。
#不專業足球筆記
#香港隊勁揪 #香港隊
#國際邁阿密 #美斯
#回水
廣告時間 -
ig: leafopen3
instagram.com/leafopen3
fb: leafopenleafopen
facebook.com/leafopenleafopen
方格子︰ https://vocus.cc/salon/leafopenleafopen
如果有興趣睇下我既其他寫作作品，可以上 leafopenleafopen.com 或者 https://www.penana.com/user/52938/%E8%91%89%E9%96%8B%E8%91%89%E9%96%8B
如果覺得我寫嘢OK想請我飲杯咖啡支持下我既，可以上 https://www.penana.com/membership_plan?id=52938 或者 https://m.penana.com/stream?id=52938
